Read Te Tusi Tapu I Te Gana Tuvalu Lomiga Lua IOELU 3 Bible Online

IOELU 3 - Te Tusi Tapu I Te Gana Tuvalu Lomiga Lua bible

IOELU 3

¹Muna a te Aliki, “I te taimi tena, ka toe fakafoki ne au te manuia ki Iuta mo Ielusalema.

²Ka 'luku fakatasi ne au a malo katoa kae aumai latou ki te Vanu o Fakamasinoga. Ka fakamasino ne au a latou i kona, E tusa mo mea a latou ne fai ki oku tino. Ne fakasalalau ne latou a tino Isalaelu ki fenua fakaatea, Kae vaevae aka foki ne latou a toku fenua ko Isalaelu.

³Ne fai te vili a latou me ko oi e puke ne ia a pagota. Ne fakatau atu ne latou a tamaliki tagata mo tamaliki fafine ke fai mo pologa, Ka maua ne tupe e togi ei ne latou fafine tali tagata mo uaina.

⁴ “Tulo, Saitonu, mo fa'kai katoa o Filisitia, se a te otou mea e taumafai o fai mai ki a au? E a, e isi se mea masei e taumafai ei koutou o toe taui mai ki a au? Kafai e isi, ka fakaoko fakavave atu ne au ki a koutou se mea masei!

⁵Ko oti ne puke ne koutou aku siliva mo aulo kae ave ne koutou aku koloa ki loto i otou faletapu.

⁶Ne ave foki ne koutou a tino o Iuta mo Ielusalema ki fenua mao kae fakatau atu ne koutou ki tino Eleni.

⁷Nei, ka aumai keatea ne au a latou mai koga kola ne fakatau atu ei ne koutou. Ka taui atu ne au ki a koutou e tusa mo te mea ne fai ne koutou ki a latou.

⁸Ka tuku atu ne au otou tama tagata mo tama fafine ke fakatau atu ki tino Iuta; ka toe fakatau atu latou ki tino Sapeana kola e nofo i te koga mao. Ko au, te Aliki, ko oti ne faipati atu.

⁹“Fakailoa atu te fakapulaga tenei ki malo: ‘Fakatoka mō te taua; Ka'laga atu ki otou sotia; Fakamaopoopo otou sotia katoa kae olo!

¹⁰ Tuki a mata o otou mea fakamalu laukele ke liu pelu Ka ko otou naifi vele lakau mo tao. Ke oko eiloa ki tino vaivai, e tau o 'kau i te taua.

¹¹Fakavave mai,[3] Koutou fenua 'pili mai, O maopoopo i te vanu. ’ ” Te Aliki, tuku ifo tau kautau o ta latou.

¹²“A malo e tau o fakatoka O o'mai ki te Vanu o Fakamasinoga. I kona, ka sagasaga ei au, ko te Aliki, o fakamasino a malo katoa kola e pili mai.

¹³ A latou ko oko eiloa i te ma'sei; Katigia ki lalo e pela me ne saito i te taimi o taukai; Tuki atu latou e pela me ne vine e tuki i se koga tuki uaina Ke oko ki te taimi e 'sali ei te uaina ki tua.”

¹⁴E afe mo afe kola i te Vanu o Fakamasinoga. Tena te koga ko pili o oko mai ki ei a te Aso o te Aliki.

¹⁵A te la mo te masina ka pouli, Ka ko fetu ka se toe maina.

¹⁶ A te Aliki ko pakalaga mai i te Mauga o Siona; A tena leo e pa mai i Ielusalema; Te lagi mo te lalolagi ke pole'pole. E puipui eiloa ne ia tena fenua.

¹⁷“Ka iloa ei ne koe, e Isalaelu, i a au ko te Aliki tou Atua. Au e nofo i luga i Siona, toku mauga tapu. A Ielusalema ka fai mo fa'kai tapu; E se toe mafai o fakatakavale ne fenua fakaatea.

¹⁸I te taimi tena, a mauga ka fonu i togavine, Ka ko mauga katoa ka fonu i pulumakau; Ka uke te vai i vaitafe katoa o Iuta. A te vaitafe ka tafe mai i te Faletapu o te Aliki, Kae ka fakasusu ne ia a te Vanu o Akasia.

¹⁹“A Aikupito ka fai pela me se toafa, Ka ko Etoma ka masei valevale, Me ne taua atu ki te fenua o Iuta, Ta ne latou a tino amio 'lei i ei.

²⁰Ka taui ne au te 'mate o latou kola ne tamate, Ka se fakasao ne au a tino agasala. Kae ko Iuta mo Ielusalema ka nofogia faeloa ki te se gata mai, ka ko au, te Aliki, ka nofo i luga i te Mauga o Siona.”