Read Te Tusi Tapu I Te Gana Tuvalu Lomiga Lua AMOSA 4 Bible Online

AMOSA 4 - Te Tusi Tapu I Te Gana Tuvalu Lomiga Lua bible

AMOSA 4

¹Faka'logo mai ki muna konei, a koutou fafine o Samalia, kola e puta malosi e pela mo pulumakau 'kai ma'kona o Pasana, ko koutou kona e fakapuapuagatia ne koutou a tino vaivai, kae fakasaua foki ne koutou a tino ma'tiva kae fakatonu foki ki otou avaga ke maua atu faeloa ne meainu ma'losi ma koutou!

²Ona ko te Aliki Sili e malu, ne folafola mai ei ne ia penei, “Ka oko mai aso e futi ei koutou ne tino ki kafilo, a koutou katoa ka pela eiloa mo ne ika e lave i kafilo.

³Ka toso atu koutou ki se puga o te olo e pili mai, ko 'pei ei koutou ki tua.”

⁴Muna a te Aliki Sili, “A koutou tino Isalaelu, olo ki te koga tapu i Peteli o fai agasala i ei, mafai se mea tau i a koutou! Olo ki Kilikala o fai agasala i ei ki te mea e mafai ne koutou! Na olo nei o aumai a manu vae fa mo fai taulaga i taeao katoa, aumai foki te tasi vae sefulu o au mea i te taki tolu o aso.

⁵Na olo o ofo atu a falaoa a koutou e fakafetai atu ei ki te Atua, kae fakamata'mata foki i taulaga fakaopoopo e ofo atu ne koutou ki a ia. Tenei te vaega mea e ma'nako koutou o fai.

⁶“Ko au tela ne aumai ne au te oge ki fa'kai katoa o koutou, kae seki toe foki mai eiloa koutou ki a au.

⁷Ne taofi foki ne au te vaiua ke se 'to i taimi tonu eiloa kola e manakogina malosi ei ne fatoaga a koutou. Ne faka'to ne au te vaiua ki se fa'kai, kae seai i te sua fa'kai. Ne 'to te vaiua i te fatoaga e tasi, kae malo pake'keke te sua fatoaga.

⁸Ona ko te vaivai i te fia inu, ne olo atu ei a tino mai nisi fa'kai ki te fa'kai tela e fakamoemoe latou me maua i ei ne vai, kae tela la, e se lava ei ne vai i ei mo inu. Kae e se fia foki mai eiloa koutou ki a au.

⁹“Ne fakaagi atu ne au te matagi 'vela ke magemage ei fuataga o fatoaga a koutou. Ne kaina foki ne sē akelise a otou fatoaga katoa, mo otou togavine, mo otou togamati, e pela foki mo otou togaolive. Kae se fia foki mai eiloa koutou ki a au.

¹⁰“Ne avatu ne au te mala ki a koutou e pela mo te mala ne tuku atu ne au ki Aikupito. Ne tamate ne au otou tamataene i taua, kae ave keatea ne au otou solofanua. Ne fakafonu ne au otou puisu ki te manogi masei o tino mate i koga e nofo ei koutou. Kae se fia foki mai eiloa koutou ki a au.

¹¹ Muna a te Aliki, “Ne fakamasei ne au nisi o koutou e pela mo te fakamaseiga ne au a Sotoma mo Komolo. A koutou kola ne sao mai i ei, e pela mo se potufafie ko tapale keatea mai te afi. Kae se fia foki mai eiloa koutou ki a au.”

¹²Ko toe fai mai te Aliki penei, “Tela la, a koutou tino Isalaelu, ka fakasala ne au a koutou. Ona ko te mea tena ka fai ne au, ke toka la koutou mō taku fakamasinoga!”

¹³A te Atua ko ia tela ne faite ne ia a mauga, E pela foki mo matagi. E fakailoa mai ne ia ona mafaufauga ki tino; E 'fuli foki ne ia te ao ki te po. E sasale a ia i mea ma'luga o te lalolagi. Tenei tena igoa: ko te Aliki te Atua Malosi!