Read Te Tusi Tapu I Te Gana Tuvalu Lomiga Lua AMOSA 5 Bible Online

AMOSA 5 - Te Tusi Tapu I Te Gana Tuvalu Lomiga Lua bible

AMOSA 5

¹Tino Isalaelu, faka'logo mai ke usu atu ne au te pese o te tino mate ki a koutou:

²Ko siga Isalaelu, te tamafine, E se toetu ake eiloa! E takato kae tiakina eiloa a ia i luga o te laukele, E seai se tino e toe fakatu ake ne ia ki luga.

³Muna a te Aliki Sili, “Ne uga atu a sotia e tokoafe mai se fa'kai o Isalaelu, kae toe foki mai fua te tokoselau; ne uga atu foki ne te sua fa'kai a te tokoselau, kae toe foki mai fua te tinogafulu.”

⁴Muna a te Aliki ki tino Isalaelu, “O'mai ki a au e ola ei koutou.

⁵Sa olo ki Pelesepa o tapuaki i ei. Sa taumafai o sala ki a au i Peteli, i a Peteli ka se toe aoga. Sa olo ki Kilikala, i ona tino ka fakamalaia ki te tafeaga.”

⁶Olo ki te Aliki e ola ei koutou. Kafai e se olo koutou ki a ia, ka oko mai a ia e pela mo se afi ki luga o tino Isalaelu. Ka sunu ne te afi a tino o Peteli, kae e seai eiloa se tino e mafai ne ia o tamate te afi tena.

⁷A koutou nei ko malaia, a koutou kona e fakamafuli ne koutou te amiotonu kae fakaloiloi ne koutou a tino i olotou saolotoga!

⁸ Ne faite ne te Aliki a fetu, Ko Mataliki mo Melemele Ne fuli ne ia te pouliga ki te mainaga Mo te ao ki te po. Ne kalaga a ia ki te suatai o te moana, Kae 'ligi ifo ki te laukele. A tona igoa ko te Aliki.

⁹E fakamasei ne ia tino malosi E pela foki mo olo malosi o latou.

¹⁰A koutou e takalialia ki tino amiotonu kola e faipati ki te mea tonu i fakamasinoga.

¹¹Ne fakasaua ne koutou a tino mativa kae fao malō olotou saito. Tela la, ka se nofo koutou i fale puliki gali e faite ne koutou, e se inu foki koutou ki uaina mai togavine gali e toki ne koutou.

¹²Ko iloa ne au te ma'sei o agasala a koutou, mo te uke foki o te ofa tulafono ne fai ne koutou. Ne fakasaua ne koutou tino amio lei, ne talia ne koutou a togi fa'kolekole fakatogafiti, kae taofi ne koutou tino ma'tiva ke se maua se avanoa o latou o fakaasi atu te mea tonu i fakamasinoga.

¹³Ko koutou ne tau o teke atu amioga masei pena, kae tela la, e seki fai ei ne koutou!

¹⁴Saga o fai te mea lei kae se ko te mea masei, ko te mea ke ola koutou. Ka fakatasi atu foki ei te Aliki te Atua Malosi ki a koutou e pela mo te manatu o koutou.

¹⁵Ke takalia'lia koutou i te amiotonu i faiga o fakamasinoga. Lavea ei ne koutou me ka manumalo te amiotonu i faiga o fakamasinoga. E se taumate ka alofa mai te Aliki ki tino o te fenua tenei kola koi ola.

¹⁶Tela la, muna a te Aliki te Atua Malosi, “Ka lagona te tagi mo te fanoanoa i auala o te fa'kai. A tino fai fatoaga ka kalagagina foki ke tagi fanoanoa ki tino mate fakatasi mo tino kola ne 'togi ke tagi fanoanoa.

¹⁷Ka lagona foki te leo o te tagi fanoanoa i togavine katoa. Ka 'tupu mea katoa konei me i au ka vau o fakasala koutou.” Kona pati a te Aliki.

¹⁸Ko oko eiloa i te faigata ki a koutou kola e fakatalitali ki te aso o te Aliki! Se a te lei ka maua ne koutou i te aso tena? A te tulaga o te aso tena ki a koutou, se aso o te pouliga kae sē o te mainaga.

¹⁹E pela me se tino e tele keatea mai te leona kae fakafetaui mai ne te ulosa! Io me e pela me se tino ko oko mai ki tena fale, puke atu ei tena lima ki te 'pui, kae ū ne te gata!

²⁰I te aso o te Aliki, ka oko mai, ka oko mai te pouliga kae se ko te mainaga; se aso o te fanoanoa kae seai se fiafia i ei.

²¹ Muna a te Aliki, “Au e takalialia ki otou kaiga fiafia faka‐te‐lotu; e seai eiloa soku fiafia ki ei!

²²Kafai e ofo mai ne koutou ki a au otou taulaga sunu mo taulaga ki meakai, e se talia lele eiloa ne au; e se talia foki ne au a manu vae fa ne fagai ne koutou ke puta mō fai otou taulaga ki a au.

²³Fakagata otou pese logoa; a au e se manako o fakalogo ki otou kitala.

²⁴Ka ko te mea e manako au ki ei, ke tafe ifo te fakamasinoga tonu e pela me se vai, mo te amiotonu foki ke pela me se vaitafe e se mafai o gata tena tafe.

²⁵ “Tino o Isalaelu, e seki manako malosi au ki taulaga ne fai ne koutou i te 'takiga ne au a koutou i loto i te koga lavaki i tausaga e fasefulu.

²⁶Kae nei, ona ko oti ne tapuaki koutou ki fakatusa o Sakuta, te otou tupu mo te otou atua; e pela foki mo Kaiuani te atua o fetu; e 'tau la mo koutou o ave a fakatusa kona,

²⁷manafai e fakata'fea ne au koutou ki te fenua i te feitu atu o Tamaseko.” Ko pati kona a te Aliki, ko tena igoa ko te Atua Malosi.