Read Te Tusi Tapu I Te Gana Tuvalu Lomiga Lua AMOSA 6 Bible Online

AMOSA 6 - Te Tusi Tapu I Te Gana Tuvalu Lomiga Lua bible

AMOSA 6

¹Kalofa eiloa i a koutou kola e nofo i te olaga solo 'lei i Siona, mo koutou foki kola e nofo i te olaga saogalemu i Samalia, pela foki mo koutou tino ma'luga o te malo sili ko Isalaelu, kola e olo atu ki ei a tino e fia maua se fesoasoani!

²Olo o kilo'kilo ki te fa'kai ko Kalene. Ka oti ko olo atu ei foki koutou ki te fa'kai lasi ko Hamato, kae mumea ifo foki ki te fa'kai o tino Filisitia ko Kata. E a, e tai sili atu a fa'kai kona i te malo o Iuta mo te malo o Isalaelu? E a, e sili atu te lasi o te laukele o latou i te laukele o koutou?

³E se talia ne koutou o fai ake pela i te aso o te malaia ko pili mai, ka ko faifaiga a koutou se lei, tena ko gasolo eiloa o pili mai ei te aso tena.

⁴Kalofa eiloa i a koutou kola e moe i otou moega gali mo te logotonu, kae kai fiafia ki tama pulumakau mo tama mamoe!

⁵E fia'fia koutou o fatu a pese e pela mo te mea ne fai ne Tavita, kae tā ki kitala.

⁶E inu koutou ki ipu lasi ko fonu i uaina, kae fakasausau ki sausau ma'nogi, kae se fanoa'noa eiloa koutou i te malaia o Isalaelu.

⁷Tela la, ko koutou ka mua o olo i te tafeaga. Ka fakagata a fakaala mo 'kaiga fia'fia a koutou.

⁸Ko oti ne oko mai te fakailoaga 'malu a te Aliki te Atua Malosi penei: “E takalialia au ki te fakamata'mata o tino Isalaelu; e takalialia foki au i olotou fale gali. Ka tuku atu ne au te olotou laumua mo mea katoa i ei ki te fili.”

⁹Kafai e 'toe a tagata e tinogafulu i se kāiga, e mate katoa a latou.

¹⁰A te kāiga o tagata kola ne mate, tela e pule ne ia te fakatokaga o te tanūga o tino kona, ka ave ne ia keatea te foitino mate mai te fale. Ka kalaga atu a ia penei manafai e isi se tino koi 'toe i loto i te fale: “E isi se tagata koi 'nofo mo koutou i kona?” Kae tali mai te leo, “Seai!” Ko fai atu ei a ia, “Sa uā la! E 'tau mo taua o fakaeteete ke mo a eiloa e taku te igoa o te Aliki.”

¹¹I te taimi e oko mai ei te fakatonuga a te Aliki, a fale 'lasi mo tama fale foki ka māofa valevale.

¹²E a, e mafai ne solofanua o tele i luga o kaupapa? E a, e mafai ne tino o fakamalu te tai ki pulumakau e pela me se fatoaga? Ka ko koutou ko oti ne 'fuli ne koutou te amiotonu ki te masei, mo te mea tonu ki te mea 'se.

¹³E fakamata'mata koutou i te pukega fakapagota ne koutou te fa'kai ko Lotepa.[3] Ne fai'pati fakamata'mata koutou penei: “Ne lava lei eiloa te motou malosi o puke malō te fa'kai ko Kanaima.”[4]

¹⁴Muna a te Aliki te Atua Malosi, “Tino o Isalaelu, ka uga mai ne au se kautau mai fenua fakaatea o puke malo te otou fenua. Ka fakasauagina koutou mai Hamato i matu ke oko ki te Vanu o Alapa i saute.”