Read Te Tusi Tapu I Te Gana Tuvalu Lomiga Lua AMOSA 9 Bible Online

AMOSA 9 - Te Tusi Tapu I Te Gana Tuvalu Lomiga Lua bible

AMOSA 9

¹Ne lavea ne au te Aliki e tu i tafa o te fata-fai-taulaga. Ne fakatonu mai a ia penei: “Kini malosi a ulupou o te Faletapu kae ka gasuesue ei te fapaologa. Kini ke fati a pou ke siga ifo te falealuga ki ulu o tino. Ka tamate ne au a tino e toe mai i kona i te taua. E seai se tino e tele keatea; e seai eiloa se tino e sao.

²E ui eiloa e keli ifo se auala mo latou ki lalo i te lalolagi o tino mate, ka puke mai eiloa ne au a latou i kona. Kafai foki e olo ake latou ki luga i te lagi, ka toe aveifo eiloa ne au a latou.

³Kafai foki e muni latou i luga i te mauga o Kalamelu, ka sala ne au ke maua. Kafai foki e muni latou mai i a au i lalo i te tai, ka fakatonu ne au te manu fekai o te tai[7] ke ū ne ia a latou.

⁴Kafai foki e ave fakapagota a latou ne olotou fili, ka fakatonu ne au ke tamate a latou. Ko tonu eiloa i au ke 'ta fakapalele a latou kae se fesoasoani ki a latou.”

⁵Ne fakapatele mai te Aliki te Atua Malosi ki te lalolagi, Tela ko galulu ei te lalolagi; Ka ko tino katoa e 'nofo i ei ko fanoanoa. A te lalolagi katoa ko fanake ki luga kae fanaifo Ki lalo e pela mo te vaitafe ko te Naila.

⁶E faite ne te Aliki tena fale i te lagi, Kae faite ne ia te vanimonimo mai luga aka o te lalolagi Ne kalaga atu a ia ki suātai o te moana Kae 'ligi ifo ne ia ki luga i te lalolagi. A tena igoa ko te Aliki!

⁷Muna a te Aliki, “Tino o Isalaelu, a au e mafaufau malosi ki tino o Sutana e pela foki eiloa mo koutou. Ne aumai ne au a tino Filisitia mai Keleta, mo tino Sulia mai Kila, e pela eiloa mo te aumaiga ne au a koutou mai Aikupito.

⁸A au, te Aliki Sili, e kilokilo atu faeloa ki te malo agasala o Isalaelu, kae ka 'ta fakapalele ne au a Isalaelu mai te lalolagi. Kae se fakapalele katoatoa ne au te fanauga a Iakopo.

⁹“Ka tuku atu ne au te fakatonuga, kae lulu foki ne au a tino Isalaelu e pela mo saito i loto i te mea faka'ma saito. Ka lulu ne au latou mai malo katoa, ko te mea ke galo atu a tino e seai ne olotou aoga.

¹⁰A tino agasala i toku fenua ka mate i taua — ko latou kola e fai ake pela, ‘E se mafai ne te Atua o fakaoko mai se fakalavelave ki a tatou.’ ”

¹¹ Muna a te Aliki, “E oko mai te aso ka toe fakatu ei ne au a te malo o Tavita, e pela me se fale ne maofa valevale. Ka toe fakafou ne au ona pui kae toe fakatu ake. Ka toe faite ne au ke lei e pela eiloa mo tena tulaga i aso ko teka.

¹²Tela la, ka puke malo ne tino Isalaelu a mea koi 'toe i te fenua ko Etoma, e pela foki mo fenua katoa ne fai mo oku i aso mua.” Kona a muna a te Aliki tela ka fakatupu ne ia a mea kona.

¹³Muna a te Aliki, “Ka oko mai aso Ka vave o 'tupu a saito, Kae tuai te katiga. Ka vave o ma'tua te taukai vine Kae tuai te faitega o te uaina. Ka 'to ifo mai mauga te uaina magalo, Ko 'tafe atu ei ki mauga foliki.

¹⁴Ka toe fakafoki mai ne au oku tino ki te lotou fenua. Ka toe faite ne latou olotou fa'kai ne māofa valevale. Ke 'nofo latou i ei; Ka toki ne latou a togavine ke inu uaina ei latou; Ka toki foki ne latou a fatoaga ke kai latou i fuataga o lakau.

¹⁵Ka avatu ne au oku tino ki te laukele ne tuku atu ne au ki a latou, Kae ka se mafai o toe ave keatea a latou.” Kona a pati a te Aliki te otou Atua.