Read Te Tusi Tapu I Te Gana Tuvalu Lomiga Lua OPETAIA 1 Bible Online

OPETAIA 1 - Te Tusi Tapu I Te Gana Tuvalu Lomiga Lua bible

OPETAIA 1

¹Tenei te valoaga a Opetaia: ko pati a te Aliki Maluga e uiga ki te malo o Etoma. Ko oti ne uga ne te Aliki tena avefekau ki malo, Ko oti ne lagona ne tatou tena fekau: “Fakatoka! Tatou ka olo o tau ki a Etoma!”

²Muna a te Aliki ki a Etoma, “Ka fakavaivai ne au a koe; Tino katoa ka takalia'lia i a koe.

³A koe ko faka'se ne tou fakamatamata. A tou laumua se pa e faite ki kaupapa make'ke; A tou fa'kai e i luga i mauga, Tela te mea e fai aka ei koe pela, ‘Ko oi te tino e mafai ne ia o fakatakavale au?’

⁴E ui eiloa e fai tou fale ke maluga e pela me se ofaga o se aeto, Ko te mea ke pili atu ki fetu, Kae e futi ifo eiloa koe ne au.

⁵“A tino kai'soa ka o'mai i te po, E puke fua ne latou a mea e ma'nako latou ki ei. A tino ka olo o tae fuagā vine, E masani sale o faka'toe ne latou ne mu mea. Ka ko koutou ko oti ne ta fakapalele eiloa ne otou fili.

⁶Koutou te fanauga a Esau, a otou koloa ko oti ne fao malo.

⁷Ko oti koutou ne fakaloiloi ne otou taugasoa; Ko oti ne afuli ne latou a koutou keatea mai i te otou fenua. A tino kola ne nofo fealofani mo koutou, Ko oti nei ne 'ta ne latou a koutou. A otou taugasoa kola ne kai fakatasi mo koutou, Ko oti ne tao ne latou se malei mō koutou; Muna a latou, ‘Tefea tena poto lasi?’

⁸“I te aso e fakasala ei ne au a Etoma, Ka ta fakapalele ne au a olotou tino poto, Kae fulu faka'ma olotou poto katoa.

⁹A tino tau o Timanu ka mataku, Ka ko sotia katoa i Etoma ka 'mate katoa.

¹⁰“Ona koe se tino faomea kae ne tamate ne koe ou kaiga,[1] Kola ko te gafa o Iakopo, A koe ka fakamaseigina kae se fakaaloalogina ki te se gata mai.

¹¹A koutou ne faka'tafa keatea i te taimi ne ofa ei ne olotou fili a mataloa o olotou pui. A koutou e pau eiloa i te masei mo tino kola ne ave keatea ne latou te maumea o Ielusalema, Kae vaevae i a latou eiloa.

¹²Ne seki 'tau mo koutou o kata fakatauemu ki te takavalega o otou taina i Iuta. Ne seki 'tau mo koutou o fia'fia i te aso ne masei valevale ei latou. Ne seki 'tau foki mo koutou o kata ki a latou i olotou puapuaga.

¹³Ne seki tau mo koutou o ulu ki loto i te fa'kai o oku tino o kata fakatauemu ki olotou puapuaga, Kae 'fao malo olotou koloa i te aso ne takavale ei latou.

¹⁴ Ne seki 'tau mo koutou o tu i maga o auala o puke latou kola e taumafai o tele ke sao. Ne seki tau mo koutou o tuku atu latou ki te fili i te aso e puapuaga ei latou.

¹⁵“A te aso tela ka fakamasino ei ne au a malo katoa, ko pili mai. Etoma, te mea ne fai ne koe ka toe taui atu ki a koe. Ka toe oko atu ki a koe te mea tela ne tuku atu ne koe.

¹⁶A oku tino ko oti ne fakasala 'mafa i toku mauga tapu. Ka ko malo katoa kola i ona tafa ka inu i te ipu o te fakasalaga e silia atu i te 'kona; Ka inu latou i ei ko te mea eiloa ko galo atu.

¹⁷“E isi ne tino ka sola ki te Mauga o Siona, Kae ka fai mo koga tapu. A tino o Iakopo ka fai mō latou te fenua tela e o latou mua.

¹⁸A tino o Iakopo mo Iosefa ka pela me ne afi; Ka ta ne latou a tino o Esau e pela me se afi e sunu ne ia se fakaputuga kaiga. E seai se tino mai te gafa o Esau e ola. Ko au, ko te Aliki, ko oti ne faipati atu.

¹⁹“A tino o Iuta ki saute ka nofo i Etoma; A tino kola e nofo i tafito mauga i te feitu ki te togala, Ka puke ne latou a Filisitia; A tino Isalaelu ka puke mo latou Efalaima mo Samalia; Ka ko tino o Peniamina ka fai mō latou a Kileata.

²⁰A tino o Isalaelu ki matu kola ne ave i te tafeaga ka foki mai o puke Foinikia ke oko atu eiloa ki te fa'kai ko Salefata. A tino o Ielusalema kola ne ave i te tafeaga kae 'nofo nei i Salataisa ka fao malo ne latou a fa'kai o Iuta ki saute.

²¹A tino manumalo o Ielusalema ka ta ne latou Etoma kae pule i ei. Ka ko te Aliki eiloa ka fai mo Tupu.”