Read Te Tusi Tapu I Te Gana Tuvalu Lomiga Lua IONA 1 Bible Online

IONA 1 - Te Tusi Tapu I Te Gana Tuvalu Lomiga Lua bible

IONA 1

¹ I te aso e tasi, ne faipati atu a te Aliki ki a Iona, te tama tagata a Amitai.

²Muna a te Aliki, “Fano ki Nineva, te fa'kai lasi tena, kae valo atu te lotou malaia; ko iloa ne au me ko oko eiloa te amio masei o tino i te fa'kai tena.”

³Ne seki fakalogo ki ei a Iona kae ne fano eiloa i te sua auala, ko te mea ke tele a ia keatea mai te Aliki. Ne fano a ia ki Iopa, maua ei ne ia i kona a te vaka e fai o fano ki Sepania. Ne togi tena pasese, sopo ki te vaka, olo tasi eiloa mo te kauvaka ki Sepania, mo tena manatu me e tena te koga ka mao ei a ia mo te Aliki.

⁴Ka ko te Aliki ne fai ne ia matagi ke agi malosi mo te vasa ke sou tela ko tai malepe ei te vaka.

⁵Ne ma'taku te kauvaka kae ne fakatau ka'laga te tino ki tena atua, mō se fesoasoani. Ne laku ne latou a kāko ki te tai ke mama te vaka. [1] Ne 'pei ne latou a kako[2] I te taimi tena, a Iona e to te moe i te ana o te vaka.

⁶Ne maua atu a ia ne te kapeni i kona, kae fai atu ki a ia, “E to pefea tau moe? Tu ki luga o 'talo ki tou atua ki se fesoasoani. Se taumate kaati ka alofa mai o fakasao tatou.”

⁷Ne fai'pati aka te kauvaka penei, “Tatou ka fai te vili ke iloa ake me e oi a mala konei.” Ne fai te vili, kae maua ake nei ko Iona.

⁸Fai atu ei latou ki a ia: “Taku mai nei ki a matou! E o koe a mala konei? Se a tau fekau i konei? Ko oi tou fenua? Ko oi tou malo?”

⁹Ne tali atu a Iona, “Au se tino Epelu, tela e tapuaki ki te Aliki te Atua o te lagi tela ne fai ne ia te laukele mo te tai.”

¹⁰Ne fakamatala atu ne ia ki a latou, i a ia ne tele keatea mai i te Aliki. [3] Ko oko eiloa te ma'taku o te kauvaka, tela ne fai atu ei penei ki a Iona, “Ko oko eiloa te masei o tau mea ne fai!”

¹¹Te afā ne gasolo ake eiloa o agi malosi, tela fesili atu ei te kauvaka ki a ia penei, “Se a te mea e 'tau o fai ne matou ki a koe ke malū te afā?”

¹²Ne tali atu a Iona, “Pei au ki te tai kae ka malū te moana. E iloa ne au me ko toku 'se tenei ko poko ei koutou ne te afā lasi tenei.”

¹³Ne seki fai ne latou te mea tena, kae ne taumafai malosi eiloa latou o ālo te vaka ke oko ki uta. Ka ko te afā ko gasolo eiloa o malosi, tela ko se mafai eiloa ne latou o ālo ki uta.

¹⁴Tela ka'laga ei latou ki te Aliki, “Te Aliki, ko talo atu matou ke sa fakasala matou ki te mate manafai e 'pei ne matou a Iona ki te 'tai! Te Aliki, ko koe eiloa e pule i te mea tenei e tupu, e a koe a faiga konei.”

¹⁵Tela pei ei ne latou a Iona ki te tai, te mea eiloa ko malu fakavave te afā.

¹⁶Ne fai te mea nei mo mea e ma'taku ei te kauvaka ki te Aliki, fai ei ne latou te taulaga ki te Aliki, kae tauto foki me ka tavini latou ki a ia.

¹⁷ Ne fakatonu ne te Aliki te ika lasi ke folo ne ia a Iona kae ne nofo a ia i te tinae o te ika e tolu ao tolu po.