Read Te Tusi Tapu I Te Gana Tuvalu Lomiga Lua IONA 2 Bible Online

IONA 2 - Te Tusi Tapu I Te Gana Tuvalu Lomiga Lua bible

IONA 2

¹Ne talo a Iona ki te Aliki tena Atua, mai i loto i te tinae o te ika:

²“Te Aliki, i toku puapuaga ne kalaga atu ei au ki a koe, Kae ne tali mai koe ki a au. Mai lalo i te lalolagi o tino mate Ne tagi au ki se fesoasoani, kae ne lagona ne koe.

³Ne pei au ne koe ki koga poko o te moana, Ki te takele papa o te tai; Ne nikoi ei au ne te tai Kae fati mai ou galu malosi i luga i au.

⁴Ne manatu au pela i a au ko tiakina ne koe Ka se toe lavea ne au tou Faletapu malu.

⁵Ne galo au ki lalo i te tai, tela ne itia ei toku manava; Ne galo katoatoa au ki lalo i te tai, Ne kofu toku ulu ne limu o te tai.

⁶Ne oko ifo eiloa au ki fakavae o mauga I te fenua tela e pono faeloa ona mataloa.[4] Ka ko koe te Aliki toku Atua, Ne fakafoki mai ne koe au mai koga poko mo te ola.

⁷I te taimi ne lagona ei ne au i toku mate ka oko mai, Ne talo atu ei au ki a koe e te Aliki, Ka ne lagona ne koe au i tou Faletapu.

⁸Latou kola e tapuaki ki tupua se aoga Ko se fakamaoni ki a koe.

⁹Ka ko au e usu pese o tavae ki a koe; Ka ofo atu ne au taulaga ki a koe Kae fakamaoni foki o fai a mea ne tauto atu ei au. Te fakaolataga e vau mai te Aliki!”

¹⁰Tela fakatonu atu ei te Aliki ki te ika ke luaki atu a Iona ki te matafaga, kae ne fai eiloa pena.