Read Te Tusi Tapu I Te Gana Tuvalu Lomiga Lua NUMELA 1 Bible Online

NUMELA 1 - Te Tusi Tapu I Te Gana Tuvalu Lomiga Lua bible

NUMELA 1

¹ I te po muamua o te lua o masina, ka ko tusa ei mo te lua tausaga ne tiakina ei ne tino Isalaelu a te fenua o Aikupito, ne faipati mai ei a te Aliki ki a Mose i te Faleie, i te Vao o Sinai. Muna a ia,

²“E tau o fai ne koulua mo Alona se lauga o tino Isalaelu i olotou kaukaiga mo kaiga. Fakamau katoa ki lalo a igoa o tagata

³kola ko luasefulu tausaga o fano ki luga, kola ko tau o kau i kautau.

⁴Fai atu ki pule taki tokotasi mai kaukaiga takitasi ke fesoasoani atu ki a koe.”

⁵Konei a igoa o tagata, kola ko takitaki i olotou matakaiga takitokotasi, kola ne filifilia mo te galuega tenei: [Te Matakaiga] — [Pule O Kaukaiga] Leupena — Elisula, te tama tagata a Setulo Simeona — Selumielu, te tama tagata a Sulisatai Iuta — Nasona, te tama tagata a Aminatapu Isakala — Netanelu, te tama tagata a Sualo Sepulona — Eliapo, te tama tagata a Helona Efalaima — Elisama, te tama tagata a Amiuta Manase — Kamalielu, te tama tagata a Petasula Peniamina — Apitano, te tama tagata a Kiteoni Tanu — Aiesa, te tama tagata a Amisatai Asela — Pagielu te tama tagata a Okilani Kato — Eliasafo, te tama tagata a Teuelu Nafatali — Aila, te tama tagata a Enanu

¹⁷Mai luga i te fesoasoani o te tinogafulu mo te tokolua tagata konei,

¹⁸tena ne fakamaopoopo ei ne Mose mo Alona a te fenua katoa i te po muamua o te lua o masina kae fakamau a igoa o tino katoa i olotou kaukaiga mo kaiga. A tagata katoa kola ko luasefulu tausaga o fano ki luga, ko oti katoa ne lau kae fakamau olotou igoa,

¹⁹e pela eiloa mo te fakatonuga a te Aliki. I te koga lavaki o Sinai ne fakamau ei ne Mose a igoa o tino.

²⁰A tagata mai te luasefulu tausaga o fano ki luga, kola ko tau o kau i kautau, ka fakamau katoa olotou igoa i olotou matakaiga mo kaiga, kae kamata i te matakaiga o Leupena, te ulumatua a Iakopo. Te aofaki katoa penei: [Te Matakaiga] — [Te Aofaki] Leupena — 46,500 Simeona — 59,300 Kato — 45,650 Iuta — 74,600 Isakala — 54,400 Sepulona — 57,400 Efalaima — 40,500 Manase — 32,200 Peniamina — 35,400 Tanu — 62,700 Asela — 41,500 Nafatali — 53,400 Te aofaki katoa e tusa mo te: — 603,550

⁴⁷A te kau sa Levi e seki fakamau fakatasi olotou igoa mo matakaiga kona,

⁴⁸me i te Aliki ko oti ne faipati ki a Mose penei,

⁴⁹“Kafai ko lau ne koe a tagata e tau o kau i kautau, masaua i te kau sa Levi e se aofia i te lauga tena.

⁵⁰Tuku atu latou ke pule i toku Faleie mo mea katoa i ei. E amo ne latou i taimi e malaga sale ei latou, pela foki mo mea katoa i ei; e tavini latou i loto i ei, ka ko olotou faleie e fakatu fakatamilo i ei.

⁵¹I so se taimi e malaga ei koutou, ko te kau sa Levi e tuku ifo ne latou toku Faleie, kae e fakatu foki ne latou i te koga e toe manava ei koutou. So se tino fakaatea aka e fakapilipili mai ki tafa o toku Faleie e tamate.

⁵²A te toega o tino Isalaelu e tau o fakatu olotou faleie i olotou potukau. Ko te takitaki mo tena potukau mo te fuka o latou.

⁵³Ka ko te kau sa Levi e fakatu olotou faleie i tafa o toku Faleie o leoleo ne latou, ko te mea ke seai se tino e fakapilipili ki ei i a au ma kaitaua kae fakaoko toku ita ki te fenua o Isalaelu.”

⁵⁴Tena ne fai eiloa ne tino Isalaelu a mea kola ne fakatonu ne te Aliki ki a Mose.