Read Te Tusi Tapu I Te Gana Tuvalu Lomiga Lua NUMELA 10 Bible Online

NUMELA 10 - Te Tusi Tapu I Te Gana Tuvalu Lomiga Lua bible

NUMELA 10

¹Muna a te Aliki ki a Mose,

²“Faite ne pu e lua ki siliva ke fakaaoga mo fakamaopoopo sale a tino, pela foki manafai ko fakatoka o fano te lotou malaga.

³Kafai e fakatagi a pu kona e lua i se taimi leva, ko tena uiga e tau mo te fenua katoa o maopoopo i te mataloa o te Faleie o te Aliki.

⁴Kae kafai e tasi te pu e fakatagi, ko tena uiga ko takitaki fua o kaukaiga e tau o maopoopo atu ki a koe.

⁵Kafai e fakatagi fakamotumotu a pu, ko tena uiga ko matakaiga kola e nofo i te feitu ki te saegala ka fakatoka o tiaki te koga tena e nofo ei latou.

⁶Kafai ko toe fakatagi atu a pu fakamotumotu i te lua o taimi, ko matakaiga ki saute ka fakatoka o tiaki te koga e nofo ei latou. Tena la, ko pu e fakatagi fakamotumotu, ko tena uiga ko tau mo tino Isalaelu o fakatoka o tiaki te koga e nofo ei latou,

⁷ka ko pu kola e fakatagi fakaloa'loa, ko te fakamaopoopoga o te fenua katoa.

⁸A pu kona e tau o faka'tagi ne tama tagata a Alona, kola ko faitaulaga. “Tenei te fakatonuga e tau o tausi ne koutou i taimi katoa fakamuli.

⁹Kafai ko faitaua mai se fili o koutou i te otou fenua, masaua o fakatagi te pu o te taua i pu kona. Ko au, te Aliki, ka taumafai o fakasao koutou mai otou fili.

¹⁰E tau foki o fakaaoga ne koutou a pu kona i aso e fakamanatu ei ne koutou a Kaiga Fiafia o Masina Fou, mo nisi kaiga fiafia aka foki. E fakatagi ne koutou a pu i taimi e ofo mai ei otou taulaga sunu mo taulaga fakafetai. Tena, ka fesoasoani atu ei au ki a koutou. Au ko te Aliki te otou Atua.”

¹¹I te po luasefulu o te lua o masina, ka ko tusa ei mo te lua tausaga ne tiakina ei ne tino Isalaelu a te fenua o Aikupito, ne masagi aka ei a te kaumana mai luga o te Faleie o te Aliki,

¹²tena ne ma'laga atu ei a tino Isalaelu keatea mo te Vao o Sinai. Ne toe fanaifo te kaumana tena i te Vao o Palana.

¹³A te taimi e ma'laga ei latou, e fakatonu mai eiloa ne te Aliki e auala i a Mose.

¹⁴I taimi katoa e fano ei te malaga a latou, e olo eiloa latou i olotou tulaga. A latou kola i lalo o te fuka a te vaega tela e takitaki ne te matakaiga o Iuta, e kamata ne latou te solo, kae solo eiloa i potukau takitasi. Ko te takitaki o latou, ko Nasona te tama tagata a Aminatapu.

¹⁵Netanelu, te tama a Sualo e takitaki i te matakaiga o Isakala,

¹⁶ka ko Eliapo, te tama tagata a Helona e takitaki i te matakaiga o Sepulona.

¹⁷Tena, ko te Faleie o te Aliki ka tuku ifo ki lalo, ka ko kaukaiga o Kelesona mo Melali kola e amo ne latou, ka kamata o ma'laga.

¹⁸Tao atu i tua, ko latou kola i lalo o te fuka o te vaega tela e takitaki ne te matakaiga o Leupena, e solo eiloa i olotou potukau. Ko Elisula, te tama tagata a Setulo e takitaki i a latou.

¹⁹Ko Selumielu, te tama tagata a Sulisatai e takitaki i te matakaiga o Simeona,

²⁰ka ko Eliasafo, te tama tagata a Teuelu e takitaki i te matakaiga o Kato.

²¹Tena, ka tao atu i tua ko te kaukaiga o Koate, i te matakaiga o Levi, mo kope tapu o te Faleie o te Aliki. I te taimi e oko atu ei latou ki te koga ka toe ma'nava ei latou, ka ko te Faleie ko tau o oti ne fakatu.

²²Ka tao atu i tua o latou kona, ko te vaega tela e takitaki ne te matakaiga o Efalaima. E solo eiloa latou i olotou potukau takitasi, ka ko Elisaia, te tama tagata a Amiuta ko te takitaki o latou.

²³Ko Kamalielu, te tama tagata a Petasula e takitaki i te matakaiga o Manase,

²⁴ka ko Apitano, te tama a Kiteone e takitaki i te matakaiga o Peniamina.

²⁵A latou kola i lalo o te fuka o te vaega tela e takitaki ne te matakaiga o Tanu, e fakaoti ne latou te solo. E solo eiloa latou i olotou potukau takitasi, ka ko Aiesa, te tama tagata a Amisatai ko te takitaki o latou.

²⁶A Pagielu, te tama tagata a Okilani ko te takitaki o te matakaiga o Asela,

²⁷ka ko Aila, te tama tagata a Enanu ko te takitaki o te matakaiga o Nafatali.

²⁸Tena te fakasologa o te solo a te fenua o Isalaelu i te taimi e tiakina ei ne latou te koga ne ma'nava ei latou.

²⁹Ne faipati atu a Mose ki tena ma ko Hopapu, te tama tagata a Ietelo te tagata Mitiana penei: “A matou nei ka fai o ma'laga atu ki te koga ne tauto mai ei te Aliki ke tuku mai mo matou. Ne tauto te Aliki me ka fakamaumea ne ia Isalaelu, tela la, vau ke olo tasi tatou, ke faitasi tatou i te motou manuia.”

³⁰Muna a Hopapu, “Ikai, au ka foki ki toku fenua tonu.”

³¹Muna a Mose, “Fakamolemole, sa fano kae tiakina mai matou. A koe e malamalama i kogā koga lei e tau o ma'nava ei matou, kae e talia foki ne matou ke takitaki ne koe matou.

³²Kafai e vau koe i a matou, ka manuia fakatasi tatou i te manuia tela ka aumai ne te Aliki ki a matou.”

³³I te tiakinaga ne tino Isalaelu a te Mauga tapu o Sinai, ne faimalaga latou i aso e tolu. A te Pusa o te Feagaiga a te Aliki e fano faeloa i olotou mua o salasala se koga lei mo olotou fakama'nava.

³⁴I te taimi e ma'laga atu ei latou mai i koga ne fakama'nava ei latou, ka ko te kaumana a te Aliki e fano eiloa i luga o latou i te ao.

³⁵ I so se taimi e kamata ei o malaga a te Pusa o te Feagaiga, ka ko Mose e fai sale penei, “Te Aliki, tu mai o afuli ou fili, pela foki mo latou kola e takalialia i a koe!”

³⁶Kae kafai ko tuku ki lalo a te Pusa o te Feagaiga, ko Mose ka fai penei, “Te Aliki, toe foki mai ki tino Isalaelu.”[2]