Read Te Tusi Tapu I Te Gana Tuvalu Lomiga Lua NUMELA 13 Bible Online

NUMELA 13 - Te Tusi Tapu I Te Gana Tuvalu Lomiga Lua bible

NUMELA 13

¹Muna a te Aliki ki a Mose,

²“Fili aka ne takitaki taki tokotasi mai matakaiga takitasi ke olo o sukesuke a te fenua o Kanana, tenei ka avatu ne au mo tino Isalaelu.”

³Ne fakalogo eiloa a Mose ki te fakatonuga a te Aliki, tela ne uga ei ne ia a takitaki Isalaelu, mai i te vao o Palana. [Matakaiga] — [Takitaki] Leupena — Samua te tama tagata a Sakula Simeona — Safata te tama tagata a Holi Iuta — Kalepo te tama tagata a Iefune Isakala — Ikala tama tagata a Iosefa Efalaima — Hosia te tama tagata a Nuno Peniamina — Palati te tama tagata a Lafo Sepulona — Katieli te tama tagata a Soti Manase — Kate te tama tagata a Susi Tanu — Amielu te tama tagata a Kemali Asela — Setualo te tama tagata a Mikaeli Nafatali — Naapi te tama tagata a Vopisi Kato — Keuli te tama tagata a Maki

¹⁶Kona a igoa o tagata kola ne uga ne Mose ke olo o onoono faka'lei ki te fenua o Kanana. Ne fuli ne ia a te igoa o Hosia te tama a Nuno ki a Iosua.

¹⁷I te ugaaga ne Mose a latou kona, ne fai atu a ia penei, “Olo faka matu, ki te feitu ki saute o te fenua ko Kanana, ko fakaoko atu foki eiloa koutou ki te fenua maugā.

¹⁸Onoono faka'lei me se fenua pefea, e tokofia tino i ei, kae e pefea foki te lotou malosi.

¹⁹Onoono faka'lei me se laukele lei me ikai; onoono foki me ko tino e 'nofo i fa'kai e isi ne pui me ikai.

²⁰Onoono faka'lei foki ki te laukele me ola me ikai; onoono foki me e uke a lakau lasi me ikai. Kae masaua o aumai ne fuaga lakau o lakau kona e ola i kona.” (A te taimi tena ko te taimi ko kamata ei o sulu a fuagavine).

²¹Tena ne olo atu ei a latou kona ki matu, o sukesuke faka'lei a te fenua, e kamata mai i te Vao o Sina i saute ke oko ki Lehopa, tela e pili ki te auala i Hamata i matu.

²²Ne mua atu latou ki te feitu ki saute o te fenua, oko atu ei latou ki Hepelona, te koga e nofo ei a kaukaiga o Aimanu, Sesai mo Talamai. A kaukaiga kona ne tupu mai i te gafa o tagata mafi kae lasi kola e igoa ko tagata Anaki. A Hepelona ne kamata o fakatu, e tusa mo te fitu tausaga mai mua atu o Soani i Aikupito.

²³Ne oko atu latou ki te Vanu o Esekolo, kae i kona ne kati ei ne latou te kaula o te vine tela e tautau ei te fui o ia e tasi; kae ko oko eiloa i te mafa o te fui tena, tela e amo ne te tokolua ki te amo. Ne aumai foki ne latou ne fuaga o te pomekalanete mo te mati.

²⁴A te koga tena ne fakaigoa ko te Vanu o Esekolo[10] e pogai mai i te kaufui vine tena ne kati ne tino Isalaelu mai i kona.

²⁵I te otiga ne iloilo faka'lei ne tagata kona a te fenua i aso e fasefulu,

²⁶ko latou eiloa ko foki atu ki a Mose, mo Alona mo te fenua katoa o Isalaelu kola e nofo i Katesa, i te vao o Palana. Ne fakaasi atu ne latou a mea katoa kola ne matea ne latou, kae fakaasi atu foki mo fuaga lakau kola ne aumai ne latou.

²⁷Muna a latou ki a Mose, “Ne iloilo faka'lei eiloa ne matou a te laukele kae maua atu me ko oko eiloa i te maumea kae laukele ola. Konei a fuaga lakau ne aumai i ei.

²⁸A tino e nofo i kona, ko oko eiloa te ma'losi, mo olotou fa'kai e lasi kae pui faka'lei. Kae tafaga atu foki la i te faigata, ko te gafa o tino mafi kae lasi tena ne matea ne matou i kona.

²⁹A tino Amaleka e nofo i te feitu ki saute o te fenua o tino Heti, mo tino Iepuse mo tino Amoli e nofo i te koga maugā; ka ko tino Kanana e nofo pili ki te Tai Metitilani, i tafa o te Vaitafe ko te Iolitana.”

³⁰Ne fakafilemu ne Kalepo a tino kola e kalaga[11] ki a Mose i mea e se ma'lie ei latou, kae fai atu penei, “E tau nei o na olo tatou o puke a te fenua; e lava eiloa te tou malosi o fakatakavale a tino kona e nofo i ei.”

³¹Ka ko tino kola ne olo tasi mo Kalepo o iloilo a te fenua ne fai aka penei, “Ikai, e se lava te tou malosi o faitaua ki fenua kona; a tino i kona e malosi atu i a tatou.”

³²Tena ne fakasalalau ei ne latou se lipoti se tonu ki tino Isalaelu e uiga ki te fenua tena ne olo latou o sukesuke. Muna a latou penei, “E se taitai o lava a tino kona e nofo i kona i te mea e fua mai ne te laukele. A tino katoa ne matea ne matou ne tino 'loa katoa.

³³ E isi foki ne tagata mafi ne matea ne matou, ko tino o te gafa o Anaki. A matou e pela eiloa me ne se i te foniki i tafa o tagata kona.”