Read Te Tusi Tapu I Te Gana Tuvalu Lomiga Lua NUMELA 14 Bible Online

NUMELA 14 - Te Tusi Tapu I Te Gana Tuvalu Lomiga Lua bible

NUMELA 14

¹I te po katoa, a tino e tagi faeloa i te puapuaga.

²Ne fakatagi atu latou ki a Mose mo Alona mo te se ma'lie, muna a latou penei, “E lei atu moi ne mate atu eiloa tatou i Aikupito, io me i te vao i konei!

³Ai a e aumai ei tatou ne te Aliki ki te fenua tena? Ka mate fua tatou i te taua, ka ko otou avaga mo tama'liki ka puke fakapagota. Kaati e lei atu ma toe foki tatou ki Aikupito.”

⁴Tena ne faipati aka ei latou penei, “Tatou ka fili se takitaki ke taki ne ia tatou ki Aikupito!”

⁵Tena ne fakasiga ifo a Mose mo Alona ki te laukele i mua o te fenua katoa.

⁶Ka ko Iosua, te tama tagata a Nuno, mo Kalepo te tama tagata a Iefune, kola ko tino lamalama e tokolua mai te tinogafulu mo te tokolua, ne saesae o la gatu i te fanoanoa

⁷kae fai atu ki tino Isalaelu penei, “A te fenua ne olo matou o iloilo, se fenua tafasili i te lei.

⁸Kafai e fiafia mai a te Aliki ki a tatou, e ave eiloa ne ia a tatou ki te fenua maumea kae laukele ola tena, kae e tuku mai eiloa ne ia mo tatou.

⁹ Sa teke ki te Aliki, kae sa ma'taku foki ki tino kona e nofo i te fenua tena. E fakatakavale gofie fua ne tatou. A te Aliki e kau mai ki a tatou. Ko oti ne fakatakavale ne ia a atua o latou, tela la, sa ma'taku.”

¹⁰A te fenua kātoa o Isalaelu ko taumafai o peipei laua kona ki fatu ke mate, kae e poi eiloa a tino i te mainaga o te Aliki e sae ake i luga o te Faleie.

¹¹Muna a te Aliki ki a Mose, “E gata mafea te loto teke o tino ki a au? Tefea te taimi ka talitonu mai ei latou ki a au; ko fia nei a mea fakaofoofogia ne fai ne au mo latou?

¹²Ka aumai ne au se famai tela ka ta fakapalele ei latou. Ka ko koe ka fai ne au mo tupuga o se malo e lasi kae malosi atu i a latou!”

¹³ Kae ne fai atu a Mose ki te Aliki penei, “Ne aumai ne koe a tino konei mai Aikupito ki tou mana. Kafai e lagona ne tino Aikupito te mea tenei ka fai ne koe ki ou tino,

¹⁴ka fakailoa ne latou ki tino konei e nofo i te fenua tenei. A tino i konei ko leva ne iloa ne latou i a koe, e te Aliki, e fakatasi mai ki a matou. E matea faka'lei ne latou a koe manafai e tu tou kaumana i luga o matou. E iloa foki ne latou me i a koe e fano i omotou mua e foliga ki te pou kaumana i te ao ka ko te po e foliga ki te pou afi.

¹⁵Kafai e tamate nei ne koe ou tino, a malo kola ko oti ne logo i tou mana ka faipati aka pela

¹⁶me ne tamate ne koe ou tino i te vao me ko se maua ne koe o fakaoko latou ki te fenua ne tauto ei koe ke tuku mo latou.

¹⁷Tela la, e te Aliki, au e talo atu ke fakaasi mai tou mana o fai te mea ne tauto mai ei koe i tau fai maiga penei,

¹⁸ ‘Au, te Aliki, e se kaitaua vave, kae e fakaasi ne au te fakamaoni mo te alofa, kae e fakamagalo foki ne au a agasala mo amioga teke a tino. Kae e fakasala eiloa ne au a fanau mo mokopuna i te tolu mo te fa o tupulaga e tusa mo te agasala a olotou matua.’

¹⁹Tela la, e te Aliki, e tusa mo te lasi o tou alofa tumau, ko talo atu ei au nei, ke fakamagalo mai a agasala a tino konei, e pela eiloa mo te fakamagaloga sale ne koe latou talu mai te taimi ne tiaki ei ne latou te fenua o Aikupito.”

²⁰Ne tali mai a te Aliki penei, “Ka fakamagalo ne au a latou, e pena mo tau fakamolemole.

²¹ Ka ko au e tauto atu me e pela eiloa mo te tonu o te muna tenei, i te lalolagi e fonu i toku mainaga,

²²e pena foki te tonu o taku muna tenei me e seai eiloa se tino i tino konei e ola ka ulu ki loto i te fenua tena. Ko oti ne matea ne latou a toku mainaga, mo mea fakaofoofogia kola ne fai ne au i Aikupito, pela foki i te vao, kae ne o'mai faeloa o tofotofo mai au kae se faka'logo mai ki a au.

²³Ka se ulu eiloa latou ki loto i te fenua ne tauto atu ne au ki olotou tupuga. E seai eiloa se tino i a latou kola ne teke mai ki a au e ulu ki loto i te fenua tena.

²⁴ Ko taku tavini fua ko Kalepo e kese ona mafaufauga, kae e tumau eiloa tena fakamaoni mai ki a au, tela la, ka avatu ne au a ia ki loto i te fenua tena ne onoono a ia ki ei, ka ko tena gafa ka fai mo latou a te fenua tena,

²⁵tela e nofo ei a tino Amaleka mo tino Kanana i vanu. Taeao, ko 'foki atu koutou ki te vao ite auala e fakasaga ki te Mataosoga o Akapa.”

²⁶Muna a te Aliki ki a Mose mo Alona,

²⁷“E gata afea te mui'mui mai o tino konei ki a au? Ko fiu oku taliga i fakatagi a latou!

²⁸Tenei te tali ka tuku atu ne koulua ki a latou: ‘Au e tauto atu, me ka fai eiloa ne au a te mea e tau o fai ne au ki a koutou. Ko au, te Aliki, tenei e faipati atu.

²⁹ A koutou ka 'mate, ka ko otou foitino mate ka salalau i te vao. Ona ko koutou ne tagi mo te se ma'lie ki a au, e seai eiloa se tino mai luga o te luasefulu tausaga e ulu ki loto i te fenua.

³⁰Au ne tauto ke faka'nofo koutou i te fenua tena, kae e seai eiloa se tino o koutou e talia ne ia, na ko Kalepo eiloa mo Iosua.

³¹A koutou ne fai mai i otou tamaliki e puke fakapagota mafai ko takavale koutou, kae e fai atu au penei me ka ave ne au latou ki loto i te fenua tena ne se ma'nako koutou ki ei, kae ka fai mo fenua o latou.

³²A koutou ka mate i konei, i te vao tenei.

³³ A otou fanau ka maumau solo i te vao i tausaga e fasefulu. Ka puapuaga eiloa latou e pogai mai i te se fakamaoni o koutou, ke oko eiloa ki te taimi e palele atu koutou ne mate.

³⁴Ka puapuaga koutou i tausaga e fasefulu, ona ko otou agasala. E fasefulu aso ne iloilo ei a te fenua ne otou tino lamalama, tela la, a aso kona ka fuli ki tausaga ka puapuaga ei koutou. Ka iloa foki ne koutou te se 'lei manafai ko kaitaua au ki a koutou!

³⁵Au e tonu me e fai eiloa ne au a te mea tenei ki tino masei kola ne kau fakatasi o teke mai ki a au. Tenei te vao ka mate katoa ei a tino o koutou. Ko au te Aliki, kona aku pati!’ ”

³⁶A tagata kola ne uga ne Mose ke iloilo faka'lei a te fenua, ne o'mai mo te lipoti se tonu, tela ne mafua ei te se ma'lie o tino ki te Aliki.

³⁷Tena la, ne aumai ne te Aliki a te famai, tena ne mate katoa ei a tino lamalama kona.

³⁸Ko Iosua fua mo Kalepo ne sao mai i te tinogafulu mo te tokolua kona.

³⁹I te fa'kailoaatuga ne Mose ki tino Isalaelu a muna a te Aliki, tena ne tagi mautuutu ei latou.

⁴⁰I te tafataeao o te sua aso ne olo ei latou o puke a te fenua maugā, olotou muna, “Ko toka nei matou o olo ki te koga ne fai mai ei te Aliki. Ko iloa ne matou i a matou ko oti ne agasala.”

⁴¹Kae ne fai atu a Mose penei, “Ai a ko se faka'logo ei koutou ki te Aliki i te taimi nei? A koutou se manumalo!

⁴²Sa olo. A te Aliki e se fakatasi atu ki a koutou, ka ko koutou ka takavale i otou fili.

⁴³Kafai e tau koutou mo tino Amaleka mo tino Kanana, a koutou e mate; a te Aliki ka se fakatasi atu ki a koutou, me i a koutou ne seki faka'logo ki a ia.”

⁴⁴Tena, ne olo eiloa latou ki te fenua maugā, ka ko te Pusa o te Feagaiga a te Aliki, pela foki mo Mose, ne nofo eiloa i te koga ne nofo ei latou.

⁴⁵Tena, ne fakatakavale eiloa latou ne tino Amaleka mo tino Kanana kola e nofo i kona, kae ne atuli atu latou ke oko eiloa ki Holema.