Read Te Tusi Tapu I Te Gana Tuvalu Lomiga Lua NUMELA 15 Bible Online

NUMELA 15 - Te Tusi Tapu I Te Gana Tuvalu Lomiga Lua bible

NUMELA 15

¹Ne tuku mai ne te Aliki ki a Mose

²a fakatonuga konei ke tausi ne tino Isalaelu i te fenua tela ka avatu ne ia mo latou.

³Konei a manu e mafai o ofo atu ki te Aliki; se pulumakau tagata, io me se mamoe tagata io me se mamoe io me se kouti, ke fai mo taulaga sunu io me se taulaga o te fakataunuga o se feagaiga, io me se taulaga loto malie, io me se taulaga i taimi o kaiga fiafia faka‐te‐lotu; ko te manogi o taulaga meakai konei e fiafia ki ei te Aliki.

⁴So se tino e ofo atu ne ia se mamoe io me se kouti ke fai mo taulaga sunu ki te Aliki, e tau o aumai fakatasi ne ia mo te mamoe io me ko te kouti tena se kilokalame o falaoa e palu tasi mo se lita e tasi o te sinu olive, ke fai mo taulaga saito, fakatasi mo te lita uaina e tasi.

⁵Tela la, a te tasi vae fa o te sinu o te uaina ke fai mo taulaga o mea inu, e sunu fakatasi mo te taulaga io me ko te isi taulaga, pela mo mamoe takitasi

⁶Kafai se mamoe tagata e ofo atu ke fai mo taulaga, ko tena uiga e lua kilokalame falaoa e palu tasi mo te sinu olive e tasi mo te afā lita ke fai mo taulaga saito,

⁷fakatasi mo te uaina e tasi mo te afā lita. Ko te manogi o taulaga kona e fiafia ki ei a te Aliki.

⁸Kafai se pulumakau tagata e ofo atu ki te Aliki ke fai mo taulaga sunu io me se taulaga o te fakataunuga o se feagaiga io me se taulaga fakafetai,

⁹ko tena uiga a te taulaga saito e tau o tolu kilokalame o falaoa e palu tasi mo se lua lita o sinu olive,

¹⁰fakatasi mo se lua lita o te uaina. Ko te manogi o te taulaga tenei e fiafia ki ei a te Aliki.

¹¹Kona a mea e tau o ofo fakatasi atu mo se pulumakau tagata, se mamoe tagata, se mamoe, io me se kouti.

¹²Kafai e silia atu i te tasi o manu e ofo mo fai taulaga, ko tena uiga a mea e fakatasi ki ei e fua eiloa pela mo te mea ne fakasino atu.

¹³So se tino Isalaelu e tau o fai ne ia a mea kona, manafai e ofo atu sena taulaga meakai ki te Aliki, ko te manogi e fiafia ki ei te Aliki.

¹⁴So se tino fakaalofa e nofo tasi mo koutou, faitalia me e nofo tumau me ikai, kae fai sena taulaga meakai ki te Aliki, e tau o tautali i fakatonuga kona.

¹⁵I taimi katoa fakamuli,[12] a fakatonuga kona e mautakitaki eiloa, e tau eiloa o tau'tali koutou io me ko tino fakaalofa e nofo tasi koutou. A koutou mo latou e pau katoa i mua o te Aliki;

¹⁶ ko tulafono kona e fakasino ki a koutou fakatasi mo latou.

¹⁷Ne tuku mai ne te Aliki ki a Mose

¹⁸a fakatonuga konei ke tausi ne tino Isalaelu i te fenua tela ka tuku atu ne ia mo latou.

¹⁹Kafai e isi ne meakai ko maua ne koutou i te fenua tena, masaua o tuku fakaatea ne mu mea mai ei ke fai mo tusaga fakapitoa ki te Aliki.

²⁰Kafai ko tao ne otou falaoa, masaua te puta falaoa muamua o te falaoa muamua tela ne faite mai te saito, ke tuku atu ke fai mo meaalofa fakapito ki te Aliki. A te mea tena e tau o ofo atu e pela mo te ofoatuga o te tusaga fakapitoa mai i tau saito ne tuki.

²¹A te meaalofa fakapitoa tena ki te Aliki mai au falaoa ne tao, e tau o fai faeloa i taimi katoa fakamuli.

²²Kae kafai la e isi se tino e seki tautali i nisi o fakatonuga konei ne tuku mai ne te Aliki ki a Mose mo te seiloa,

²³kae kafai foki la, i se taimi fakamuli, ko se fai ne te fenua katoa a mea katoa kola ne fakatonu mai ne te Aliki ki a Mose.

²⁴Kafai e isi se mea 'se pena e fai ne te fenua katoa ona ko te se malamalama, ko tau ei o ofo mai ne latou se pulumakau tagata mo fai te taulaga 'sunu, mo tena manogi e fiafia ki ei te Aliki, fakatasi mo te taulaga saito mo te taulaga uaina, e pela mo te fua ne fakasino atu, kae fakaopoopo atu mo se kouti tagata ke fai mo taulaga mo agasala.

²⁵A te faitaulaga ka fai ne ia a te sauniga o te faka'maga o te fenua katoa, tena ka magalo ei latou, me i te agasala e seki fai mo te loto kae ne aumai foki mo te lotou taulaga mo te fakamagaloga o agasala ke fai mo taulaga meakai ki te Aliki.

²⁶Tena la, ko te fenua katoa o Isalaelu mo tino fakaalofa e nofo tasi latou ka fakamagalo katoa, me e aofia katoa i te agasala tela ne fai.

²⁷ Kafai se tino tokotasi ne agasala kae se ko tena loto, e tau o ofo ne ia se kouti fafine ko tasi te tausaga ke fai mo taulaga o te fakamagaloga o agasala.

²⁸Ko te faitaulaga ka fai ne ia a te sauniga o te fakamaga o te tagata tena i luga i te fata-fai-taulaga, tena ka magalo ei a ia.

²⁹A te fakatonuga tena e fakasino ki so se tino ne fai ne ia se agasala kae se ko tena loto o fai, faitalia me se tino Isalaelu io me se tino fakaalofa e nofo tasi mo tino Isalaelu.

³⁰Ka ko so se tino e fai te agasala mo tena loto eiloa o fai, me se tino Isalaelu io me se fakaalofa e nofo tasi mo tino Isalaelu, e agasala a ia me e se manatu mafa ki fakatonuga a te Aliki, tela la, e tau a ia o tamate,

³¹me ko oti ne teke ne ia a muna a te Aliki ne fai, kae ne ofa ne ia mo tena loto eiloa a te fakatonuga e tasi mai i fakatonuga a te Aliki. E o ia eiloa te se tena ne mate ei a ia.

³²I te taimi e tasi, i aso koi nofo ei a tino Isalaelu i te vao, e isi se tino ne maua atu e fai fafie i te Sapati.

³³Ne ave a ia ki mua o Mose mo Alona mo te fenua katoa,

³⁴kae tausi fakapagota, me e se iloa tonu me se a te ikuga ka fai ki a ia.

³⁵Tena, ne fai mai ei a te Aliki ki a Mose penei, “A te tagata tena e tau o tamate; e tau o peipei ne te fenua katoa ki fatu i tua o te fa'kai ke mate.”

³⁶Tena, ne ave ei a ia ne te fenua katoa ki tua o te fa'kai, peipei ei ne latou ki fatu ke mate, e pela eiloa mo te fakatonuga a te Aliki.

³⁷Ne fakatonu mai a te Aliki ki a Mose

³⁸ ke fai atu ki tino Isalaelu penei: “Faite ne fele i matulimanu e fa o otou gatu kae sai atu se uka lanu usi ki fele takitasi. A te mea tena e tau o fai mo taimi katoa fakamuli.

³⁹A fele kona e fai mo mea fakamanatu, tela la, i taimi katoa e matea ei ne koutou a fele kona, ka manatua ei ne koutou aku fakatonuga katoa, tena ke faka'logo ei koutou ki ei, ka se fulitua mai foki koutou ki a au o fai mea e ma'nako ki ei otou loto.

⁴⁰A fele kona, e fakamanatu atu ki a koutou ke tausi aku fakatonuga katoa, kae ka fai eiloa koutou mo oku tino.

⁴¹Au ko te Aliki te otou Atua; ne aumai ne au koutou mai Aikupito ke fai au mo Atua o koutou. Au ko te Aliki.”