Read Te Tusi Tapu I Te Gana Tuvalu Lomiga Lua NUMELA 17 Bible Online

NUMELA 17 - Te Tusi Tapu I Te Gana Tuvalu Lomiga Lua bible

NUMELA 17

¹Muna a te Aliki ki a Mose penei,

²“Fai ki tino Isalaelu ke avatu ki a koe e sefulu lua tokotoko, e takitasi mai matakaiga katoa. Tusi a te igoa o te tino i luga i tena tokotoko,

³ka ko te igoa o Alona ke tusi i luga i te tokotoko tela e aumai mai te matakaiga o Levi. E tau o takitasi a tokotoko a takitaki o matakaiga.

⁴Ave a tokotoko kona ki toku Faleie, kae tuku i mua o te Pusa o te Feagaiga, te koga e fetaui sale ei taua.

⁵Tena la, ko te tokotoko a te tagata tela ko oti ne filifilia ne au ka 'tupu aka ona lau mo fuaga. I te faiga tena e fakagata ei ne au a te muimui soko atu o tino Isalaelu ki a koe.”

⁶Tena ne faipati atu ei a Mose ki tino Isalaelu, kae ne o'mai a takitaki taki tokotasi mai matakaiga takitasi o ave olotou tokotoko ki a Mose. A te tokotoko o Alona e tuku tasi mo tokotoko katoa kona.

⁷Tena, ne tuku ei ne Mose a tokotoko katoa kona i mua o te Pusa o te Feagaiga a te Aliki, i loto i te Faleie.

⁸ I te sua aso, i te uluatuga a Mose ki loto i te Faleie o te Aliki, ne matea ei ne ia i te tokotoko o Alona, tela e tu mo te matakaiga o Levi, ko tupu aka ona lau kae ko fua mai foki a fuaga matua o te alamoni!

⁹Ne puke aka ne Mose a tokotoko katoa o fakaasi atu ki tino Isalaelu. Ne matea ne latou a te mea ko oti ne tupu, tena ne o'mai a takitaki o taki puke olotou tokotoko.

¹⁰Muna a te Aliki ki a Mose, “A te tokotoko o Alona ke fakafoki atu ki mua o te Pusa o te Feagaiga. Ka tausi i kona e fai mo fakailoga ki tino Isalaelu kola e fia teke me kafai e se fakagata te lotou mui'mui ko latou ka mate.”

¹¹Tena ne fai eiloa ne Mose e pela mo te fakatonuga a te Aliki.

¹²Muna a tino Isalaelu ki a Mose penei, “Kaati tena eiloa te gataga o matou!

¹³Kafai e tonu me i so se tino e fakapilipili atu ki te Faleie o te Aliki e tamate, ko tena uiga ko tau tatou o mate atu katoa!”