Read Te Tusi Tapu I Te Gana Tuvalu Lomiga Lua NUMELA 19 Bible Online

NUMELA 19 - Te Tusi Tapu I Te Gana Tuvalu Lomiga Lua bible

NUMELA 19

¹Ne fakatonu ne te Aliki a Mose mo Alona

²ke tuku atu ki tino Isalaelu a fakatonuga konei. Aumai se pulumakau kula e seai sena pona, tela e seki fakagalue eiloa,

³kae ko tuku atu ne latou ki a Eleasalo te faitaulaga. E tau o ave ki tua o te fa'kai o ta i ona mua.[13]

⁴Kafai ko oti ne ta, ko puke ei ne Eleasalo ne mu toto i ei, o apiapi atu ki te feitu tela e tu ei te Faleie o te Aliki, e fakafitu taimi.

⁵A te manu kātoa tena, ko tena pakili, mo kano, mo tena toto mo ana totoga, e tau o sunu i mua o te faitaulaga tena.

⁶Tena, ka puke mai ne Eleasalo ne laupapa o te lakau ko te alasi, te kaula o te hisopo mo te uka kula, o pei ki luga i te afi.

⁷Ka oti, ko tau mo ia o 'ta ona gatu kae ligi mo ne vai ki luga i a ia, tena, ko mafai ei ne ia o toe ulu atu ki loto i te fa'kai. Ka ko ia la e lailai eiloa ke oko ki te afiafi.

⁸A te tagata tela ne sunu ne ia a te pulumakau e tau foki o 'ta ona gatu, kae ligi ne vai ki luga i tena foitino, kae e lailai eiloa a ia ke oko ki te afiafi.

⁹ Tena, ko te tagata e se lailai i feitu faka tapuakiga ka taetae ne ia a lefu o te pulumakau tena o ave ki se koga 'ma i tua o te fa'kai. Ka tausi a te lefu tena i kona ke fakaaoga sale ne tino Isalaelu i te faiga o te vai mo faka'ma sale a mea kola e lailai i feitu fakatapuakiga. A te sauniga tenei e fai sale mo ave keatea a agasala.

¹⁰A te tagata ne taetae ne ia a te lefu o te pulumakau e tau o 'ta ona gatu, kae e tumau eiloa tena lailai ke oko eiloa ki te afiafi. A te fakatonuga tenei e tumau mo taimi katoa fakamuli, e fakasino ki tino Isalaelu mo tino fakaatea kola e nofo tasi latou.

¹¹So se tino e patele ki se foitino o te tino mate ka lailai i aso e fitu.

¹²E tau mo ia o faka'ma tena foitino ki te vai faka'ma i te tolu o aso, pela foki i te fitu o aso, tena, ka 'ma ei a ia i feitu faka tapuakiga. Kae kafai e se faka'ma tena foitino i te tolu mo te fitu o aso, e se ma eiloa a ia.

¹³So se tino e patele ki se foitino o se tino mate kae seki faka'ma tena foitino, ko tena uiga e tumau eiloa tena lailai me e seki ligi tena foitino ki te vai faka'ma. I te feitu tena, e fakalailai ne ia a te Faleie o te Aliki, tela la, e se tau o toe taku a ia se tino o te fenua o te Atua.

¹⁴Kafai se tino ne mate i loto i se faleie, so se tino e nofo i loto i te faleie tena i te taimi ne mate ei te tagata tena, io me se tino e ulu atu ki loto i te faleie tena ka se 'ma i aso e fitu.

¹⁵A tia io me ne ulo i loto i te faleie tena kola e seai ne pono[14] ka lailai katoa.

¹⁶Kafai se tino e patele ki se foitino o se tino ne tamate io me se tino ne mate eiloa i a ia i te matafale, ka se ma i aso e fitu, e pena foki te tino ne patele ki se ivi o se tino io me ko te tānuga.

¹⁷E penei te faka'maga o se tino ne lailai i feitu faka‐tapuakiga: ke aumai se ulo kae fao ki ei ne lefu mai te pulumakau kula tela ne sunu mo te fakamagaloga o agasala, kae fakaopoopo atu foki ki ei mo ne vai fou.

¹⁸I te mea muamua, e tau se tino 'ma i feitu fakatapuakiga o puke se kaula o te hisopo, ufi ki loto i te vai, ko apiapi atu ei ne ia a te faleie, mo mea katoa i loto i ei, pela foki mo tino kona ne nofo i kona. Ka ko te faka'maga o te tino tela ne patele ki se ivi o se tino, io me se tino mate, io me ko te tānuga, e fai penei; ko te tino tela e 'ma i feitu fakatapuakiga ka apiapi ne ia ne vai ki luga i te tino tena ne lailai i feitu kona.

¹⁹Ko te tolu mo te fitu o aso e apiapi ei ne se tino 'ma i feitu fakatapuakiga ne vai ki te tino se 'ma. Ko te fitu o aso ka faka'ma ei ne ia a te tagata lailai. Kafai e to te la, ko 'ma ei a te tagata lailai tena, manafai ko oti ne 'ta ona gatu kae ligi ne vai ki luga i a ia.

²⁰Kafai se tino ko lailai i feitu faka tapuakiga kae e se taumafai ke faka'ma a ia, ko tena uiga e se 'ma eiloa a ia, me e seai se vai faka'ma kai ligi ki luga i a ia. I te feitu tena, e fakalailai ne ia a te Faleie o te Aliki, tela la, ka se toe taku a ia se tino o te fenua o te Atua.

²¹A te fakatonuga tena ke tausi faeloa ne koutou i taimi katoa fakamuli. A te tino e ligiligi ne ia a te vai mo faka'ma te tino lailai, e tau foki o 'ta ona gatu. So se tino e patele ki te vai tena e lailai i feitu fakatapuakiga ke oko eiloa ki te afiafi.

²²So se mea e patele ki ei a te tino lailai ka lailai, kae so se tino e patele ki mea kona ka lailai ke oko ki te afiafi.