Read Te Tusi Tapu I Te Gana Tuvalu Lomiga Lua NUMELA 2 Bible Online

NUMELA 2 - Te Tusi Tapu I Te Gana Tuvalu Lomiga Lua bible

NUMELA 2

¹Ne tuku mai ne te Aliki ki a Mose mo Alona a fakatonuga konei.

²Kafai ko fakama'nava a tino Isalaelu o faka'tu olotou faleie, masaua me e tofu eiloa te matakaiga mo tena fuka, tela la, e tau eiloa koutou o nofo i te kogā koga tela e tu ei te otou fuka. A faleie katoa e faka'tu fakatamilo i te Faleie o te Aliki.

³I te feitu ki te saegala, ko latou kola mai lalo o te fuka o te potukau a Iuta ka maopoopo fakatasi i olotou vasega, i lalo o olotou takitaki, penei: [Te Matakaiga] — [Te Takitaki] — [Te Aofaki] Iuta — Nasona, te tama tagata a Aminatapu — 74,600 Isakala — Netanelu, te tamataga a Sualo — 54,400 Sepulona — Eliapo, te tama tagata a Helona — 57,400 — Te Aofaki katoa e tusa mo te: — 186,400 Te potukau a Iuta e fano i mua.

¹⁰I saute, ko latou kola i lalo o te fuka a te potukau a Leupena, ka maopoopo fakatasi i lalo o olotou takitaki, penei: [Te Matakaiga] — [Te Takitaki] — [Te Aofaki] Leupena — Elisula,te tama tagata a Setulo — 46,500 Simeona — Selumielu, te tama tagata a Sulisatai — 59,300 Kato — Eliasafo,te tama tagata a Teuelu — 45,650 — Te aofaki: — 151,450 Ko te kau a Leupena e 'tafa atu mai tua.

¹⁷I te vasia o te ava potukau muamua mo te ava potukau fakamuli, e maati ei te kau sa Levi mo te Faleie o te Aliki. A potukau takitasi i te taimi e maati ei latou, e tau eiloa o olo i motukukau, pela eiloa mo te taimi ne manava ei latou, kae ke fakavasega tonu eiloa i lalo o olotou tulaga 'tonu.

¹⁸A te kau a Efalaima e nofo i te feitu ki te togala i olotou potukau takitasi, i te pulega a olotou takitaki. Tenei te fakasologa: [Te Matakaiga] — [Te Takitaki] — [Te Aofaki] Efalaima — Elisama te tama tagata a Amiuta — 40,500 Manase — Kamalielu te tama tagata a Petasula — 32,200 Peniamina — Apitano te tama tagata a Kiteoni — 35,400 — Te aofaki katoa: — 108,100 Te potukau a Efalaima e oloatu i te tolu o vaega.

²⁵A te kau a Tanu e nofo i te feitu ki matu, i olotou potukau takitasi, i te pulaga a te olotou takitaki ko Tanu, konei latou: [Matakaiga] — [Takitaki] — [Te Aofaki] Tanu — Aisea te tama tagata a Amisatai — 62,700 Asela — Pagielu, te tama tagata a Okelani — 41,500 Nafatali — Aila, te tama tagata a Enanu — 53,400 — Te aofaki e tusa mote: — 157,600 A te kau a Tanu, ko latou eiloa e fakamuli atu.

³²A te katoaga o tino Isalaelu kola ne fakamau olotou igoa i olotou potukau kesekese, e tusa mo te 603,550.

³³A te kau sa Levi ne seki fakamau eiloa olotou igoa, i te taimi ne fakamau ei a igoa o tino Isalaelu, e pela eiloa mo te fakatonuga a te Aliki ki a Mose.

³⁴Tena, ne fai eiloa ne tino Isalaelu a mea katoa ne fakatonu ne te Aliki ki a Mose. Ne nofo eiloa latou i olotou potukau, ne mati foki eiloa latou i olotou kaukaiga.