Read Te Tusi Tapu I Te Gana Tuvalu Lomiga Lua NUMELA 20 Bible Online

NUMELA 20 - Te Tusi Tapu I Te Gana Tuvalu Lomiga Lua bible

NUMELA 20

¹I te masina muamua ne oko atu ei a te fenua katoa o Isalaelu ki te Vao o Sina, tena ne ma'nava ei latou i Katesa. A Miliama ne mate i kona, ne tanu foki i te koga tena.

² E seai eiloa ne vai i te koga tena ne ma'nava ei latou, tena, ne maopoopo atu ei a te fenua ki a Mose mo Alona

³kae fakaasi atu mo te se ma'lie o latou; muna a latou penei, “E lei atu moi ne mate tasi atu eiloa tatou mo 'tou taina Isalaelu kola ne mate i mua o te Faleie o te Aliki.

⁴Ai a ne aumai ei ne koe matou ki te vao? Ke mate fua matou i konei fakatasi mo omotou manu?

⁵Ai a ne aumai ei ne koe matou keatea mai Aikupito ki te koga masei tenei e seai ne mea e ola i ei? E seai ne saito, e seai ne mati, e seai ne vine, e seai foki ne pomekalanete. E seai foki ne vai mo 'tou inu!”

⁶Ne fakamao atu a Mose mo Alona mai tino o tu i te mataloa o te Faleie o te Aliki. Ne punou ifo a Alona mo Mose, ko te mainaga eiloa o te Aliki ko fakasae atu ki a laua.

⁷Muna a te Aliki ki a Mose,

⁸“Puke mai a te tokotoko tena i mua o te Pusa o te Feagaiga, ko fakamaopoopo ei ne koulua a te fenua katoa. Ka faipati atu a koe ki te kaupapa i olotou mua, ko te vai eiloa ko 'tafe mai ki tua. I te faiga tena e aumai ei ne koe a te vai mo fainu a tino Isalaelu mo olotou manu.”

⁹Tena, ne fano eiloa a Mose o puke mai a te tokotoko, e pela eiloa mo te fakatonuga a te Aliki.

¹⁰Tena, ne fakamaopoopo ei ne Mose mo Alona a te fenua katoa i mua o te kaupapa, kae fai atu mo Mose penei, “Faka'logo mai koutou tino faiga'ta. Ka aumai ne au te vai mo koutou mai te kaupapa tenei.”

¹¹Tena, ne kini ei ne Mose a te kaupapa e fakalua taimi ki te tokotoko, ko te vai eiloa ko 'tafe mai i ei, tena ne inu ei a tino katoa pela foki mo manu.

¹²Ka ko te Aliki ne ita ki a Mose mo Alona, kae fai atu penei, “Mai luga o te se lava o te lua fakatuanaki o fakaasi toku mana i mua o tino Isalaelu, ka se oko koulua ki loto i te fenua ne tauto au ke tuku mo latou.”

¹³A te mea tena ne tupu i Melipa,[15] te koga ne mui'mui ei a tino Isalaelu ki te Aliki, te koga foki tena ne fakaasi ei ne te Aliki ki a latou i a ia e malu.

¹⁴Ne uga ne Mose ana avefekau mai Katesa ke olo ki te tupu o Etoma. Muna a latou penei, “A te fekau tenei ne aumai mai ou kaiga, kola ko matakaiga o Isalaelu. E iloa ne koe a puapuaga ne feagai mo matou,

¹⁵mai i te taimi ne olo ei omotou tupuga ki Aikupito, te fenua ne nofo ei matou i tausaga e uke. Ne fai fakamasei ne tino Aikupito a omotou tupuga pela foki matou,

¹⁶tena ne ka'laga ei matou ki te Aliki mo se fesoasoani. Ne lagona ne ia omotou tagi, tela ne uga mai ei ne ia te agelu ke taki matou keatea mai Aikupito. A matou konei e nofo nei i Katesa, se fa'kai e pili ki te tuakoi o tou fenua.

¹⁷Fakamolemole, talia mai ke ui atu matou i loto i tou fenua. A matou mo omotou manu ka se fakapiko eiloa keatea mo te auala, io me olo ki otou fatoaga io me ko toga vine, kae ka se inu foki eiloa matou i otou vaikeli.[16] Ka olo tonu eiloa matou i te auala ke oko ki te taimi e to atu ei matou ki tua mo tou fa'kai.”

¹⁸Kae ne tali mai a tino Etoma penei, “E se talia ne matou ke ulu mai koutou i loto i te motou fenua! Kafai e taumafai eiloa koutou o o'mai o ulu i loto i te motou fenua, ko matou ka olo atu o faitaua ki a koutou.”

¹⁹Muna a tino Isalaelu penei, “A matou e olo tonu eiloa i te auala, kae kafai e isi ne tino i a matou io me ne manu e inu i otou vai, ka togi ne matou te agasala tena. A te mea e ma'nako matou ki ei, ko matou fua ke ui atu i loto i te otou fenua.”

²⁰Ne toe tali mai a tino Etoma me e se talia eiloa ne latou, tena ne olo atu ei te lotou kautau ma'losi o taua ki tino Isalaelu.

²¹Ka ko tino Isalaelu ne foki atu ki tua o olo i te isi auala fakaatea, me ko se talia latou ne tino Etoma ke ui atu i loto i te lotou fenua.

²²Ne tiakina ne te fenua o Isalaelu a Katesa, te koga ne nofo ei latou, o olo atu ki te Mauga o Holo,

²³i te tuakoi o Etoma. I kona, ne faipati mai ei a te Aliki ki a Mose mo Alona penei,

²⁴“A Alona ka se ulu atu ki loto i te fenua tela ne tauto au ke tuku mo tino Isalaelu; ko pili nei a ia o mate, me i a koulua ne teke ki taku fakatonuga i Melipa.

²⁵Puke a Alona mo tena tama tagata ko Eleasalo o ave ki luga i te Mauga o Holo.

²⁶Kiloke, tapale ne koe a gatu fakafaitaulaga o Alona kae fakapei atu ki a Eleasalo. A Alona ko pili o mate.”

²⁷Ne fai eiloa ne Mose a te mea ne fakatonu atu ne te Aliki. Ne olo atu latou ki luga i te Mauga o Holo, i mua o te fenua katoa,

²⁸ tena ne tapale ei ne Mose a gatu faka faitaulaga o Alona kae fakapei atu ki a Eleasalo. I kona foki eiloa, i luga i te Mauga tena, ne mate ei a Alona; tena, ne foki ifo ei a Mose mo Eleasalo ki lalo.

²⁹Ne logo te fenua katoa i a Alona ko mate, tena ne tagi fanoanoa katoa ei latou i aso e tolu sefulu.