Read Te Tusi Tapu I Te Gana Tuvalu Lomiga Lua NUMELA 21 Bible Online

NUMELA 21 - Te Tusi Tapu I Te Gana Tuvalu Lomiga Lua bible

NUMELA 21

¹ I te lagonaga ne te tupu o Alata, te fa'kai o Kanana i saute, i tino Isalaelu kola e aumai mai Atalima. Ne fai taua atu tena potukau ki ei kae e isi eiloa ne ana tino ne puke fakapagota.

²Ne fai te tautoga a te kau Isalaelu ki te Aliki penei: “Kafai e tuku mai ne koe a tino konei ke fakatakavale ne matou, kae e toetuku katoatoa atu ne matou a latou,[17] fakatasi mo olotou fa'kai ki a koe, kae 'ta fakapalele latou.”

³Ne lagona ne te Aliki olotou muna, tena ne fesoasoani ei a ia o fakatakavale a tino Kanana. Tena ne 'ta fakapalele ei latou ne tino Isalaelu kae fakamasei olotou fa'kai, kae fakaigoa te koga tena ko Holema.[18]

⁴ Ne tiakina ne tino Isalaelu a te Mauga o Holo i te auala tela e fano ki te Mataosoga o Akapa, ko te mea ke olo latou mai tua o te fenua o Etoma. Kae i te taimi ne olo atu ei latou i te auala,

⁵ ne toe mui'mui foki a tino Isalaelu ki te Atua mo Mose. Muna a latou, “Ai a ne aumai ei ne koe a matou mai Aikupito ke mate i te vao tenei, te koga e seai ne meakai, seai foki ne vai? Ko se mafai ne matou o toe kai ki meakai masei konei!”

⁶Tena, ne aumai ei ne te Aliki a gata poisini, ke ū ne latou a tino Isalaelu. E tokouke eiloa a tino Isalaelu ne mate me ne ū ne gata kona.

⁷Tena, ne o'mai a tino Isalaelu ki a Mose kae fai mai penei, “A matou ko agasala i a matou ne muimui atu ki te Aliki, pena foki ki a koe. Fakamolemole, talo atu ki te Aliki ke ave keatea a gata konei.” Tena, ne talo eiloa a Mose mo tino Isalaelu.

⁸Tena, ne fai atu ei a te Aliki ki a Mose ke faite se gata fiti, kae fakatautau ki se lakau loa, ko te mea ko so se tino ne ū ne se gata ka lei manafai e kilo ki te gata fiti tena.

⁹ Tena, ne faite ei ne Mose se gata palasi kae fakatautau atu ki luga i se lakau loa. A tino kola ne ū ka lei olotou koga ne ū manafai e kilo latou ki te gata fiti.

¹⁰Ne ma'laga atu a tino Isalaelu ki Opoto, faka'tu ei olotou faleie i kona.

¹¹Ne toe tiakina ne latou te koga tena, o olo atu o faka'tu olotou faleie i koga ne fakamasei i Apalima, i te vao i te feitu ki te saegala o Moapi.

¹²Mai kona ne toe olo atu latou ki te Vanu o Seleta, nofo foki latou i kona.

¹³Ne toe ma'laga atu foki latou mai kona, o nofo i te feitu ki matu o te vaitafe o Alinona, i te vao tela e oko atu ki te fenua o tino Amoli. A te Vaitafe o Alinona, ko te tuakoi tena i te va o tino Moapi mo tino Amoli.

¹⁴Tena te mea e faipatigina ei i loto i Te tusi o Taua a te Aliki e faipati ki te “... fa'kai o Uaepa i loto i Sufo, mo vanu; a te Vaitafe o Alinona,

¹⁵mo te sifoga o vanu tena e oko atu eiloa ki te fa'kai o Ala o fano ki te tuakoi o Moapi.”

¹⁶Mai te koga tena, ne toe ma'laga atu latou ki te koga e igoa ki Vaikeli, te koga ne faipati atu ei a te Aliki ki a Mose penei, “Fakamaopoopo mai a tino ke tuku atu ne au ne vai mo olotou inu.”

¹⁷I te taimi tena, ne usu ei ne tino Isalaelu a te pese tenei: “Vaikeli e, puna mai tou vai Kae ka tali ne matou ki te pese

¹⁸Ko te Vaikeli ne keli ne Pelenise Mo takitaki o te fenua Ne keli ki te tokotoko fakatupu Mo olotou tokotoko.” Ne toe ma'laga atu latou mai te vao tena o olo ki Matana,

¹⁹kae mai kona ne toe ma'laga atu latou ki Nalielu. Mai Nalielu ne toe olo atu latou ki Pamota,

²⁰kae mai Pamota ki te vanu i te fenua o Moapi, mai lalo o te Mauga o Peseka. Mai kona, e lavea atu ne latou a te toafa tela e takato fakasau i olotou mua.

²¹Tena, ne uga atu ne tino Isalaelu olotou tino avefekau ke olo atu o fai ki a Sekono, te tupu o tino Amoli penei:

²²“Talia mai ke ui atu matou i loto i te otou fenua. A matou mo omotou manu ka se fakapiko eiloa keatea mo te auala, io me olo ki otou fatoaga io me ko otou toga vine, kae ka se inu foki eiloa matou i otou vaikeli; ka olo tonu eiloa matou i te auala ke oko ki te taimi e to atu ei matou ki tua mo te otou fa'kai.”

²³Kae ne seki talia ne Sekono ke ui atu a tino Isalaelu i loto i te lotou fenua. Ne fakamaopoopo ne ia tena kautau, te mea eiloa ko mati atu ki te koga e igoa ko Iasa i te vao o faitaua atu ki tino Isalaelu.

²⁴Kae e tokouke eiloa tino o te fili ne tamate ne tino Isalaelu i te taua, tena ne nofogia ei ne tino Isalaelu a te fenua o tino Amoli, mai i te Vaitafe o Alinona ke oko ki te Vaitafe o Iapoka i matu, ke oko atu eiloa ki tuakoi o te fenua o Amoni; ne 'lave latou i kona me e toka lei a kautau o Amoni o puipui te lotou fenua.[19]

²⁵Tena, ne fakatakavale ne tino Isalaelu a fa'kai katoa o tino Amoli, fakatasi mo te fa'kai o Hesepono, mo fa'kai katoa kola i tafatafa, tena, ne nofo ei latou i fa'kai kona.

²⁶A te fa'kai o Hesepono ko te laumua o te kogā laukele o Amoli tela e pule ne Sekono. A te tupu ko Sekono ne taua mo te tupu muamua atu o Moapi kae ne fao malo katoa ne ia a laukele o te tupu o Moapi, ke oko eiloa ki te Vaitafe o Alinona.

²⁷Tena te mea e usu sale ei ne tino fatu pese a kupu konei, “Vau ki Hesepono, ki te fa'kai o Sekono te Tupu! A matou e ma'nako ke toe faite kae fakaola.

²⁸ I te taimi e tasi, mai te fa'kai tenei ko Hesepono Ne olo atu ei a te kautau a Sekono e pela me se afi; O fakamasei a te fa'kai o Ala i Moapi Kae fakaseaoga a mauga i te feitu ki luga o Alinona.

²⁹Kalofa i a koutou tino Moapi! Koutou kola e tapuaki ki a Kemoso ka fakatakavale! A tagata ko puapuaga ne fai ne otou atua, Ka ko fafine ko fai mo pagota a te tupu o Amoli.

³⁰Kae nei a tino o olotou gafa ko takavale ma'sei eiloa, E kamata mai i Hesepono ki Tipono, Mai Nasima ki Nofa, i tafa o Metepa.”

³¹Tena, ne nofo ei a tino Isalaelu i te fenua o tino Amoli,

³²kae ne uga ne Mose a tagata ke olo o kilokilo faka'lei ki se auala tafasili i te lei e mafai ei ne latou o puke a te fa'kai o Iaseli. Ne fakatakavale eiloa ne tino Isalaelu a te fa'kai tena, mo fa'kai i ona tafa, kae atuli keatea ne latou a tino Amoli kola e nofo i kona.

³³Mai kona, ne ma'laga atu te kau Isalaelu ki Pasana, kae ne faitaua mai ki a latou a Oko, te Tupu o Pasana, i te fa'kai o Etelei.

³⁴Muna a te Aliki ki a Mose, “Sa mataku i a Oko. Ka tuku atu ne au te manumalo ki a koe. A te mea ne fai ne koe ki a Sekono, te tupu o Amoli tela e nofo i Hesepono, ke fai foki ne koe ki a ia.”

³⁵Tena, ne ta fakapalele ne te kau Isalaelu a Oko mo ana tamaliki, mo tino katoa o tena fenua, e seai eiloa se tino ne fakasao; tena nofo ei latou i te fenua tena.