Read Te Tusi Tapu I Te Gana Tuvalu Lomiga Lua NUMELA 22 Bible Online

NUMELA 22 - Te Tusi Tapu I Te Gana Tuvalu Lomiga Lua bible

NUMELA 22

¹Ne toe ma'laga atu a tino Isalaelu ki koga kogā laugatasi o Moapi, i te feitu ki te saegala o te Iolitana, kae 'luta tonu mo te fa'kai o Ieliko; i kona ne fakama'nava ei latou.

²I te logoga o Palako, te tupu o Moapi kae ko te tama tagata a Sipola i te mea ne fai ne tino Isalaelu ki tino Amoli,

³tena ne ma'taku ei latou.

⁴Ne fai atu a tino Moapi ki takitaki o tino Mitiana, “Ko se leva nei kae palele a mea i tafa o tatou ne fakamasei ne te potukau tenei, e pela me se pulumakau tagata e kai faka'ma ne ia a mouku i se malae mouku.”

⁵ Tena, ne uga ei a te fekau a Palako ki a Palaamo te tama tagata a Peolo ke fanatu ki a ia. A Palaamo e nofo i Petolo, i tafa o te Vaitafe o Eufilate i te fenua o tino Amao. Ne olo atu a avefekau a Palako mo te fekau tenei ki a Palaamo: “E fakailoa atu ne au me e isi se malo tenei ne vau mai Aikupito; a tino o te malo tenei ko salalau i koga valevale, kae konei e taumafai o fao te tou fenua.

⁶E tokouke atu latou i a matou, tela la, fakamolemole, vau aka o fakamalaia latou; setaumate ka mafai ei ne tatou o fakatakavale kae afuli keatea a latou mai te tou fenua. E iloa ne au me kafai e fakamanuia ne koe a tino, e taunu eiloa, e pena foki manafai e fakamalaia ne koe.”

⁷Tena, ne olo atu ei a takitaki o tino Moapi mo takitaki o tino Mitiana mo te tupe e togi ei Palaamo ke muna tuku ne ia a tino Isalaelu.

⁸Muna a Palaamo ki a latou, “Moe i konei i te po nei, taeao ko fakailoa atu ne au a te tali a te Aliki.” Tena, nofo ei a takitaki o Moapi mo Palaamo i te po tena.

⁹Ne vau te Atua ki a Palaamo kae fesili mai penei, “Ko oi a tino konei ne o'mai ki a koe?”

¹⁰Ne tali atu a Palaamo penei, “A tino konei ne uga mai ne Palako o fakailoa mai ki a au

¹¹me e isi se malo ne vau mai Aikupito, kae konei ko salalau valevale i luga i te fenua katoa. A ia e manako ke fakamalaia ne au a te malo tena, ko te mea ke mafai ne ia o fakatakavale kae afuli keatea.”

¹²Muna a te Atua ki a Palaamo, “Sa fano i tino kona, sa fakamalaia foki ne koe a tino Isalaelu me i a latou ne fakamanuia ne au.”

¹³I te taeao o te sua aso, ne fanatu ei a Palaamo ki tino kola ne o'mai mo te fekau mai a Palako kae fai atu penei, “Foki nei ki te koga ne o'mai ei koutou; e se talia ne te Aliki ke fanatu au i a koutou.”

¹⁴Tena, ne foki atu ei a avefekau kona ki a Palako kae fakailoa atu ki a ia i a Palaamo e ita ma vau i a latou.

¹⁵Tena, ne toe uga atu foki ne Palako a takitaki e tokouke, kola e taulia atu i te kau kola muamua.

¹⁶Ne olo atu latou konei mo te fekau tenei mai i a Palako: “Fakamolemole, a koe ke vau eiloa ki a au!

¹⁷Ka togi ne au a koe ki mea e uke kae fai so se mea e manako koe ki ei. Fakamolemole, vau o fakamalaia aka a tino konei.”

¹⁸Kae ne tali atu a Palaamo penei, “E ui eiloa e tuku mai ne Palako a siliva mo aulo katoa i tena palesi, ka ko au e se mafai eiloa o teke a te fakatonuga a te Aliki toku Atua, faitalia me se fakatonuga foniki io me se fakatonuga lasi.

¹⁹Kae fakamolemole, nofo ke moe tatou i te po nei, ke toe fakalogologo aka au me e isi ne muna a te Aliki e fia fai mai ki a au, me e seai.”

²⁰I te po tena, ne vau a te Aliki ki a Palaamo kae fai mai penei, “Kafai a tino konei ne o'mai ke olo koutou, fakatoka la ke olo koutou, kae masaua o fai eiloa a te mea e fai atu ne au.”

²¹Tena, taeao ake, ne fakatoka te asini a Palaamo olo atu eiloa mo takitaki o Moapi ki te lotou tupu.

²²Ne ita te Atua i a Palaamo ne fano, tela la, ne uga ne te Atua a tena agelu ke pono ne ia a te auala o Palaamo tela e fanatu i luga i tena asini, mo tena tokolua tavini e tautali i a ia.

²³I te laveaga ne te asini a te agelu e tu i te auala mo te pelu e puke i tena lima, ko te asini eiloa ko fakapiko keatea mo te auala o fano ki fatoaga. Ne kini ne Palaamo a tena asini ke toe foki ki te auala.

²⁴Ne fanatu te agelu, o tu i te koga lauliki o te auala, i te va o toga vine e lua kola e pui ki fatu.

²⁵I te toe laveaga ne te asini a te agelu, ne fakatafa atu a ia faī ki te pui fatu tela ne itia ei te vae o Palaamo. Tena, ne toe kini foki ei ne Palaamo a tena asini.

²⁶Ne toe fanatu te agelu o tu i te koga lauliki eiloa o te auala, tela ko seai se avanoa o te asini e mafai ei o fakatafa i so se feitu o te agelu.

²⁷I te laveaga ne te asini a te agelu, ko te mea eiloa ko takato ifo ki lalo. Ne kaitaua Palaamo, kini ei ne ia a te asini ki tena tokotoko.

²⁸Tena, ne fai ei ne te Aliki a te asini ke mafai o faipati, tela ne fai atu ei te asini ki a Palaamo penei, “Se a taku mea ne fai ki a koe? Ai a ne kini fakatolu ei ne koe au?”

²⁹Ne tali atu Palaamo, “Au ko pela me se vale ne fai ne koe! Moi ne isi saku pelu ko oti koe ne tamate ne au.”

³⁰Ne fai atu te asini penei, “Ko au eiloa tenei ne sopo sale ei koe i tou olaga katoa. Kai fai eiloa ne au se mea penei ki a koe?” Ne tali atu Palaamo, “Ikai.”

³¹Tena, ne fai ei ne te Aliki ke lavea ne Palaamo a te agelu tela e tu mo tena pelu i te koga tena. I te laveaga ne Palaamo a te agelu, ko ia eiloa ko fakasiga ifo ki lalo mo ana mata e fuli ki lalo i te laukele.

³²Muna a te agelu, “Ai a ne kini fakatolu ei penei ne koe a tau asini? Au ne vau o pono tou auala, me e se tau koe o fano i te malaga tenei.

³³Ne matea au ne tau asini, tela la, ne fakaseke keatea eiloa a ia e fakatolu taimi. Moi ne seki fakaseke, e penei e tamate ne au a koe kae sao tau asini.”

³⁴Ne tali atu Palaamo, “Au ko agasala. E seiloa lele eiloa ne au i a koe ne tu sale i te auala o pono au; kae nei la, kafai e iloa ne koe me e se tau mo au o fano, ko tena uiga ko au ka foki.”

³⁵Kae ne fai atu a te agelu penei, “A koe e fano i tagata kona, kae masaua me e fai fua ne koe a te mea e fai atu ne au.” Tena, ne fano eiloa Palaamo i tagata kona.

³⁶I te Iogoga o Palako i a Palaamo tela ko vau, ne fanatu ei a ia o fakafetaui a Palaamo i te fa'kai o Ala, tela e tu i te Vaitafe o Alinona, i te tuakoi o Moapi.

³⁷Ne fai atu a Palako ki a Palaamo penei, “Ai a seki vau ei koe i te taimi muamua? A koe ne mafaufau pela me e se lava tou togi i a au?”

³⁸Ne tali atu Palaamo penei, “Tenei au ko vau, kae masaua me e seai se mea e mafai ne au o fai. A te mea e fai ne au ko te mea e fai mai ne te Atua.”

³⁹Tena, ne olo atu ei a Palako mo Palaamo ki te fa'kai o Husota,

⁴⁰te koga ne ta ei ne Palako a pulumakau mo mamoe kae ne tuku ne ia ne kano o manu kona ma Palaamo, pela foki a takitaki kola ne o'mai mo Palaamo.

⁴¹I te tafataeao o te sua aso, ne taki ne Palako o Palaamo ki te taulu o te mauga o Pamota Paala, ke matea faka'lei ne Palaamo a te vaega e tasi o tino o te fenua o Isalaelu.