Read Te Tusi Tapu I Te Gana Tuvalu Lomiga Lua NUMELA 24 Bible Online

NUMELA 24 - Te Tusi Tapu I Te Gana Tuvalu Lomiga Lua bible

NUMELA 24

¹I te taimi nei, ko iloa ne Palaamo i te Aliki e manako ke fakamanuia ne ia a te fanauga a Isalaelu, tela ne seki taumafai ei a ia o fano ke fetaui laua mo te Atua e pela mo taimi mua. Ne kilo atu ona mata ki te toafa,

²matea ei ne ia a tino Isalaelu e nofo mai i olotou matakaiga takitasi. Ne ulufia Palaamo ne te agaga o te Atua,

³tela ne faipati ei ne ia a te valoaga tenei: “Tenei te fekau a Palaamo, te tama tagata a Peolo, Mea nei ko pati a te tagata tela e lavea faka'lei ne ia a mea,[21]

⁴Tela e lagona ne ia a muna a te Atua. Ne kilo atu oku mata, kae lavea ne au se fakaasiga mai i te Atua Tafasili i te Malosi.

⁵A faleie o Isalaelu ko oko eiloa i te gali,

⁶E pela me ne lakau ko pama e fakalaina i laina 'loa, Io me e pela me ne fatoaga i kaugutu o se vaitafe; E pela me ne lakau ko aloe ne toki ne te Aliki Io me ne alasi e ola i tafatafa o te vai.

⁷Ka uke a vaiua e maua ne latou Kae ka toki olotou fuaga lakau i malae fatoaga e uke te vai i ei. A te lotou tupu ka sili atu i a Akako Ka ko tena pule ka salalau i koga 'mao

⁸Ko te Atua ne aumai ne ia latou mai Aikupito; Ko te Atua e taua mo latou e pela me se pulumakau vao. E fakatakavale ne latou olotou fili, E tukipala ne latou a ivi o olotou fili, kae fatifati olotou matasana.

⁹ A te malo o Isalaelu e pela me se leona fakamataku; Kafai e moe, e seai eiloa se tino e mafai o 'fagu ne ia. So se tino e fakamanuia ne ia Isalaelu ka fakamanuiagina, Kae so se tino e fakamalaia ne ia Isalaelu, e fakamalaiagina foki.”

¹⁰Ne kumi a lima o Palako i te kaitaua kae fai atu ki a Palaamo penei, “A koe ne aumai ne au ke fetu ne koe oku fili, kae nei ko tolu taimi e fakamanuia faeloa ne koe latou.

¹¹Vau nei o foki ki tou fa'kai! Au ne tauto ke togi faka'lei ne au a koe, kae ko fai nei ne te Aliki ke se maua ne koe te togi.”

¹²Ne tali atu Palaamo penei, “Au ne fai ki tagata kola ne o'mai mo tau fekau

¹³me e tiga eiloa e aumai ne koe a siliva mo aulo katoa i tou palesi, kae e se mafai lele eiloa ne au o teke a te fakatonuga a te Aliki o fai te mea e loto au ki ei. A te mea e faipati ne au ko te mea e fai mai ne te Aliki.”

¹⁴Ne fai atu a Palaamo ki a Palako penei, “Au nei ka foki atu ki toku fa'kai, kae koi tuai au o fano, ka fakailoa atu ne au te mea ka fai ne tino Isalaelu ki otou tino fakamuli.”

¹⁵Tena, ne faipati ei ne ia a te valoaga tenei: “Tenei te fekau a Palaamo te tama tagata a Peolo, Mea nei ko pati a te tagata tela e lavea faka'lei ne ia a mea,[22]

¹⁶Tela e lagona faka'lei ne ia a muna a te Atua, Kae maua foki ne ia a te poto tela e vau mai i te Atua Tafasili i te Maluga. Ne kilo atu oku mata, kae lavea ne au te fakaasiga mai te Atua Tafasili i te Malosi.

¹⁷Au ne kilo ki aso fakamuli, kae matea ne au a te malo o Isalaelu. E isi se tupu e pela me se fetu maina, tela ka vau mai te malo tena. Ka pela a ia me se fetu e igoa ko te pusa loa tela e vau mai Isalaelu. Ka fakatakavale ne ia a takitaki o Moapi Kae ta a tino o te gafa o Setu.[23]

¹⁸Ka fakatakavale ne ia ona fili i Etoma Kae puke mo ia a te fenua o latou. A Isalaelu ka manumalo faeloa.

¹⁹Ka lakalaka latou ne te malo o Isalaelu Kae ta fakapalele a latou kola koi toe.”

²⁰I te fakaasiga tena, ne matea foki ei ne Palaamo a tino Amaleka, tela ne faipati mai foki ei ne ia a te valoaga tenei: “A te malo o Amaleka se malo tafasili i te malosi, Kae fakamuli, ka galo atu eiloa se toe matea atu.”

²¹I te fakaasiga tena, ne matea ne ia a tino Keni, tela ne faipati mai foki ei ne ia a te valoaga tenei: “A te koga e nofo ei koutou e malu 'lei, E pela me se ofaga e tu i luga i se kaupapa maluga,

²²Ka ko koutou tino Keni, e oko mai eiloa te taimi ka ta fakapalele ei koutou, Manafai ko puke fakapagota koutou ne tino Asulia.”[24]

²³Ne faipati foki ne Palaamo a te valoaga tenei: “Ko oi a tino konei e fakapotopoto i matu?

²⁴A tino tau ka o'mai mai Kupelu i olotou vakamutu; Ka puke ne latou a Asulia mo Epela, Kae fakamuli, ko latou foki eiloa ka galo atu.”

²⁵Tena, ne fakatoka ei a Palaamo, foki atu eiloa ki tena fa'kai, ka ko Palako ne fano foki eiloa i tena auala.