Read Te Tusi Tapu I Te Gana Tuvalu Lomiga Lua NUMELA 25 Bible Online

NUMELA 25 - Te Tusi Tapu I Te Gana Tuvalu Lomiga Lua bible

NUMELA 25

¹I te taimi ne nofo ei a te fanauga a Isalaelu i te Vanu o Akasia, ne moe sale olotou tagata mo fafine Moapi kola e nofo i te koga tena.

²Ne kami sale ne fafine konei a tagata Isalaelu ki olotou 'kaiga i taimi e fai ei olotou taulaga, e tapuaki atu ei ki te atua o tino Moapi. Ne kai a tino Isalaelu ki meakai kona, kae tapuaki atu foki ki te atua ko Paala i Peolo.

³Tena ne kaitaua ei te Aliki ki a latou

⁴kae fai atu ki a Mose penei, “Puke a takitaki katoa o tino Isalaelu, kola e se fakalogo mai ki a au, kae kati katoa olotou ua i te ao malamalama,[25] ko se kaitaua ei au ki tino Isalaelu.”

⁵Ne fai atu a Mose ki ana ofisa penei, “Ka tamate ne koutou a tino katoa i otou matakaiga kola e tapuaki ki a Paala i Peolo.”

⁶E isi se tagata Isalaelu e tokotasi ne avatu ne ia a te fafine Mitiana ki loto i tena faleie, kae e matea mai eiloa ne Mose mo te fenua katoa kola e tagi fanoanoa i te mataloa o te Faleie o te Aliki.

⁷Ne lavea ne Fineaso, te tama tagata a Eleasalo, kae ko te mokopuna o Alona te faitaulaga, a te tagata Isalaelu mo te fafine Mitiana, tela ne tu aka ei a ia o tautali atu i te tokolua kona.

⁸Ne puke ne ia te tao, tautali atu eiloa i tua o te tokolua kona ki loto i te faleie, te mea eiloa ko suki tasi atu ne ia a te tagata mo te fafine tena. I te faiga tena ne gata ei a te mala tela e mate sale ei a tino Isalaelu.

⁹Ne gata te mala tena, ka ko tino Isalaelu kola ko oti ne mate ko tusa mo te luasefulu fa afe.

¹⁰Muna a te Aliki ki a Mose,

¹¹“A te mea ne fai ne Fineaso, ko fai ne ia a au ke se kaitaua ki tino Isalaelu. E se talia ne ia ke tapuaki atu a tino ki se atua fakaatea na ko au eiloa, tena te mea e seki ta ei ne au a latou i toku kaitaua.

¹²Tena la, fai ki a Fineaso, me ka fai ne au se feagaiga mo ia tela ka tumau mo taimi katoa fakamuli.

¹³A ia mo tena gafa ka nofo tumau i te tofi faitaulaga, me ne seki talia ne ia ke tapuaki atu a tino ki se atua fakaatea, tena te mea ne fakamagalo ei ne au a agasala a te fanauga a Isalaelu.”

¹⁴A te igoa o te tagata Isalaelu tela ne mate tasi mo te fafine Mitiana ko Semeli, te tama tagata a Salu, se ulu o te kaiga e tasi i te matakaiga o Simeona.

¹⁵A te igoa o te fafine ko Kosipi. A tena tamana ko Sula, se matai o se potukau i kaukaiga o tino Mitiana.

¹⁶Ne fakatonu mai te Aliki ki a Mose penei,

¹⁷“Olo atu o ta a tino Mitiana,

¹⁸e tusa mo amioga masei ne fai ne latou ki a koutou, i te fakaloiloiga ne latou a koutou i Peolo; e tusa foki mo te fafine o latou ko Kosipi, tela ne mate i te taimi o te mala i Peolo.”