Read Te Tusi Tapu I Te Gana Tuvalu Lomiga Lua NUMELA 27 Bible Online

NUMELA 27 - Te Tusi Tapu I Te Gana Tuvalu Lomiga Lua bible

NUMELA 27

¹Konei a igoa o tama fafine a Selofeata: ko Mahala, ko Noa, ko Hokala, ko Milika mo Tilesa. A Selofeata ko te tama tagata a Hefa, tela ko te tama tagata a Kileata.

²A Kileata ko te tama tagata a Makila tela ko te tama tagata a Manase. A Manase ko te tama tagata a Iosefa. Ne olo atu a tama fafine a Selofeata o tu i mua o Mose mo Eleasalo te faitaulaga mo takitaki o te fenua o Isalaelu, mo te fenua katoa, i te mataloa o te Faleie o te Aliki kae fai atu penei,

³“A te motou tamana ne mate i te vao kae seai eiloa sena tama tagata. A ia e se kau i te kau a Kola kolā ne mate me ne teke ki te Aliki; a ia ne mate eiloa i tena agasala tokotasi.

⁴E iloa ne matou me e seai ne tama tagata a te motou tamana, kae ai a ka sona solo fua ei tena igoa i Isalaelu? Aumai ne laukele ma matou mai laukele o kaiga o te motou tamana.”

⁵Ne fakaasi atu ne Mose ki te Aliki a te fakatagi tena a tama fafine kona a Selofeata,

⁶kae ne fai mai mo te Aliki penei,

⁷ “A te fakatagi a tama fafine a Selofeata se mea tonu; tuku ki a latou ne manafa mai laukele o kaiga o te lotou tamana. A te tofi o Selofeata ke tuku atu ki a latou.

⁸Fai atu ki tino Isalaelu me kafai e mate se tagata kae seai sena tama tagata, ko tena tama fafine e tuku ki ei ana mea.

⁹Kafai e seai ne ana tama fafine, ko ana taina e tuku ki ei ana mea.

¹⁰Kafai e seai ne ana taina, ko taina o tena tamana e tuku ki ei ana mea.

¹¹Kafai e seai ne ana taina io me ko taina o tena tamana, ko te kaiga pili eiloa o ia ka puke mo ia a te tofi. Tena te tulafono e tau o tautali ki ei a tino Isalaelu, e pela eiloa mo te mea ko oti ne fakatonu atu ne au.”

¹² Muna a te Aliki ki a Mose, “Fano ki luga i te Mauga o Apalima kae kilo ou mata ki te fenua tela ka tuku atu ne au mo tino Isalaelu.

¹³Kafai ko oti ne matea ne koe, ko koe eiloa ko mate, e pela mo tou taina ko Alona,

¹⁴me i a koulua ne teke ki taku fakatonuga i te Vao o Sina. I te taimi ne muimui mai ei a tino Isalaelu ki a au i Melipa, ne seki fai ne koulua te mea tela ne fakatonu atu ne au.” Melipa ko te igoa o te vaipuna tela i Katesa, i te Vao o Sina.

¹⁵Tena ne talo ei a Mose penei,

¹⁶“Te Aliki te Atua, te pogai o te ola, au e talo atu ke fili ne koe se tagata tela e mafai ne ia o taki te fenua o Isalaelu,

¹⁷ kae mafai foki o fakatonu ne ia latou i taimi o taua, ko te mea ko tou fenua ke moa e fai pela me se lafu mamoe e seai se takitaki.”

¹⁸ Muna a te Aliki ki a Mose, “Puke mai a Iosua, te tama tagata a Nuno, se tagata fai mea mafai, kae na atu ou lima ki luga i tena ulu.

¹⁹Fai ki ei ke tu i mua o Eleasalo te faitaulaga, mo te fenua katoa, kae i kona, i mua o latou katoa, ka fakailoa kae fakasopo ne koe a ia ke fai mo ou sui.

²⁰Tuku atu ki a ia tau pule, ko te mea ke faka'logo ki a ia a te fenua katoa o Isalaelu.

²¹ Ka fakalagolago a ia ki a Eleasalo te faitaulaga, tela ka sukesuke ne ia toku loto i te fakaaogaga ne ia o te Ulima mo te Tumema.[26] I te faiga tena, ka takitaki ei ne Eleasalo a Iosua mo te fenua katoa i olotou mea e fai.”

²²Tena, ne fai eiloa ne Mose a mea ne fakatonu atu ne te Aliki. Ne aumai ne ia a Iosua ke tu i mua o Eleasalo te faitaulaga mo te fenua katoa.

²³ E pela eiloa mo te fakatonuga a te Aliki, ne na atu ei ne Mose ona lima ki te ulu o Iosua kae fakailoa atu ne ia me ko fai nei mo sui o ia.