Read Te Tusi Tapu I Te Gana Tuvalu Lomiga Lua NUMELA 29 Bible Online

NUMELA 29 - Te Tusi Tapu I Te Gana Tuvalu Lomiga Lua bible

NUMELA 29

¹I te po muamua o te fitu o masina, e tau mo koutou o maopoopo mo tapuakiga, kae ke mo a e fai ne otou galuega i te aso tena. I te aso tena, ko tau o fakatagi a pu.

²Ofo atu se taulaga sunu ki te Aliki, ko tena manogi e fiafia ki ei a ia: e tasi te tamā pulumakau tagata, e tasi te mamoe tagata, kae e fitu tamā mamoe tagata ko takitasi tausaga. A manu katoa kona ke seai katoa ne pona o latou.

³Ofo mai foki te aofaki tau o falaoa e palu mo te sinu olive: e tolu kilokalame falaoa e ofo tasi mo te pulumakau tagata, e lua kilokalame ke ofo tasi mai mo te mamoe tagata,

⁴kae e tasi te kilokalame falaoa i tamā mamoe tagata takitasi.

⁵Ofo mai foki se kouti tagata ke fai mo taulaga mo te fakamagaloga o agasala, tena ko fai ei se sauniga e faka'ma ei a tino o te fenua.

⁶Ofo mai a mea kona e fakaopoopo ki taulaga sunu e ofo sale i aso muamua o masina takitasi, pela foki ki taulaga sunu i aso takitasi, kola e ofo tasi mo taulaga saito mo taulaga uaina. A te manogi o taulaga meakai konei e fiafia ki ei te Aliki.

⁷ I te po sefulu o te fitu o masina e tau mo koutou o maopoopo mo tapuakiga. E tapu koutou e kai i te aso tena, e seai foki ne galuega e tau o fai.

⁸Ofo mai se taulaga sunu, ko tena manogi e fiafia ki ei te Aliki: e tasi te tamā pulumakau tagata, e tasi te mamoe tagata, kae fitu tamā mamoe tagata ko takitasi tausaga. A manu katoa kona ke seai katoa ne pona o latou.

⁹Ofo mai te aofaki tau o falaoa e palu mo te sinu olive, ke olo fakatasi mo manu kona: e tolu kilokalame o falaoa ke ofo tasi mo te tamā pulumakau tagata, e lua kilokalame falaoa ke ofo tasi mo te mamoe tagata,

¹⁰kae tasi te kilokalame falaoa i tamā mamoe takitasi.

¹¹Ofo mai foki se kouti tagata e tasi ke fai mo taulaga o te fakamagaloga o agasala, e fakaopoopo ki te kouti tela e ofo i te taimi e fai ei te sauniga o te fakamaga o tino o te fenua, pela foki ki te taulaga sunu i aso takitasi mo te taulaga saito mo te taulaga uaina tela e fakatasi ki ei.

¹² I te po sefulu lima o te fitu o masina e tau koutou o maopoopo mo tapuakiga. Fakamanatu te Kaiga fiafia tenei e fakaaloalo ei te Aliki i aso e fitu, kae mo a koutou e fai ne otou galuega.

¹³I te aso muamua, ofo se taulaga meakai ki te Aliki, ko tena manogi e fiafia ki ei te Aliki: e sefulu tolu tamā pulumakau tagata, e lua mamoe tagata, kae sefulu fa tamā mamoe tagata ko takitasi tausaga. A manu katoa kona e tau o seai ne pona o latou.

¹⁴Masaua o ofo mai te aofaki tau o falaoa e palu tasi mo sinu olive: e tolu kilokalame o falaoa i te pulumakau tagata e tasi, e lua kilokalame i te mamoe tagata e tasi,

¹⁵kae tasi te kilokalame i tamā mamoe takitasi, fakatasi mo te aofaki tau o te uaina.

¹⁶Ofo mai foki se kouti tagata ke fai mo taulaga mo te fakamagaloga o agasala. Ofo mai a mea kona e fakaopoopo ki te taulaga sunu tela e ofo i aso takitasi, fakatasi mo te taulaga saito mo te taulaga uaina.

¹⁷I te lua o aso, ofo mai e sefulu lua tamā pulumakau tagata, e lua mamoe tagata, kae sefulu fa tama mamoe tagata ko takitasi tausaga, kae tapu se manu e isi sena pona,

¹⁸Ofo atu katoa eiloa, fakatasi mo nisi taulaga kola e manakogina mo te aso muamua.

²⁰I te tolu o aso, ofo mai e sefulu tasi tamā pulumakau tagata, e lua mamoe tagata, kae sefulu fa tamā mamoe tagata ko takitasi tausaga, kae tapu se manu e isi sena pona,

²¹Ofo atu katoa eiloa, fakatasi mo nisi taulaga kola e manakogina mo te aso muamua.

²³I te fa o aso, ofo mai e sefulu tamā pulumakau tagata, e lua mamoe tagata, kae sefulu fa tamā mamoe tagata ko takitasi tausaga, kae tapu se manu e isi sena pona,

²⁴Ofo atu katoa loa, fakatasi mo nisi taulaga kola e manakogina mo te aso muamua.

²⁶I te lima o aso, ofo mai e iva tamā pulumakau tagata, e lua mamoe tagata, kae sefulu fa tamā mamoe tagata ko takitasi tausaga, kae tapu se manu e isi sena pona.

²⁷Ofo atu katoa loa, fakatasi mo nisi taulaga kola e manakogina mo te aso muamua.

²⁹I te ono o aso, ofo mai e valu tamā pulumakau tagata, e lua mamoe tagata, kae sefulu fa tamā mamoe tagata ko takitasi tausaga, kae tapu se manu e isi sena pona.

³⁰Ofo atu katoa loa, fakatasi mo nisi taulaga kola e manakogina mo te aso muamua.

³²I te fitu o aso, ofo mai e fitu tamā pulumakau tagata, e lua mamoe tagata, kae sefulu fa tamā mamoe tagata ko takitasi tausaga, kae tapu se manu e isi sena pona.

³³Ofo atu katoa loa, fakatasi mo nisi taulaga kola e manakogina mo te aso muamua.

³⁵I te valu o aso, e tau koutou o maopoopo o fai tapuakiga kae tapu ne galuega e fai.

³⁶Ofo mai se taulaga sunu mo fai se taulaga meakai ki te Aliki, ko tena manogi e fiafia ki ei a ia: e tasi te tamā pulumakau tagata, e tasi te mamoe tagata, kae e fitu tamā mamoe tagata ko takitasi tausaga, kae seai katoa ne pona;

³⁷Ofo atu katoa loa, fakatasi mo nisi taulaga kola e manakogina mo te aso muamua.

³⁹Kona a fakatonuga e uiga ki te faiga o taulaga sunu, taulaga saito, taulaga uaina, mo taulaga fakafetai kola e tau o ofo ne koutou ki te Aliki i otou kaiga fiafia takitasi. A mea kona ko taulaga e fakaopoopo ki taulaga kola e ofo ne koutou mo te fakataunuga o se feagaiga io me ko taulaga o te loto malie.

⁴⁰Tena ne fakailoa atu ne Mose ki tino Isalaelu a mea katoa kola ne fakatonu atu ne te Aliki ki a ia.