Read Te Tusi Tapu I Te Gana Tuvalu Lomiga Lua NUMELA 3 Bible Online

NUMELA 3 - Te Tusi Tapu I Te Gana Tuvalu Lomiga Lua bible

NUMELA 3

¹Konei a kaiga o Alona mo Mose i te taimi ne faipati mai ei a te Aliki ki a Mose i luga i te Mauga o Sinai.

² E tokofa a tamaliki tagata a Alona: Ko Natapu te ulumatua, ko Apiu, ko Eleasalo mo Itamala.

³A latou ne milimili kae faū ki te tofi faitaulaga,

⁴ ka ko Natapu mo Apiu ne mate i te taimi ne ofo atu ei ne laua a te afi se 'malu ki te Aliki i te Vao o Sinai. E seai ne tama tagata a te tokolua kona, tena la, ko Eleasalo eiloa mo Itamala ne galue i te tofi faitaulaga i aso o Alona.

⁵Muna a te Aliki ki a Mose penei,

⁶“Puke mai te kau sa Levi, kae fakaeke ki ei te tofi ke tavini ki a Alona te faitaulaga.

⁷Ka fai ne latou a galuega e tau mo toku Faleie, kae fai foki ne latou a tiute mo te faitaulaga, pela foki mo te fenua katoa.

⁸E tausi ne latou katoa a toku Faleie, kae fai foki ne latou galuega mo tino katoa o Isalaelu.

⁹Ko te tiute taua eiloa e tasi o tino sa Levi, ko te tavini atu ki a Alona mo ana tama tagata.

¹⁰Ka filifili ne koe a Alona mo ana tama tagata ke fai ne latou a galuega faka faitaulaga; so se tino fakaatea e taumafai o fai a galuega kona e ta ke mate.”

¹¹Muna a te Aliki ki a Mose,

¹² “A te matakaiga o Levi e oku. I te taimi ne tamate ei ne au a toekimua katoa o tino Aikupito, ka ko toekimua tagata katoa i kaiga takitasi o Isalaelu ne fakatapu ne au mo oku, e pela foki mo toekimua o manu katoa. Kae nei, ko te matakaiga o Levi ko fai mo oku, kae se ko toekimua tagata o Isalaelu; ka fai latou mo oku tino. Au ko te Aliki.”

¹³

¹⁴Ne fai te fakatonuga a te Aliki ki a Mose i te Vao o Sinai,

¹⁵ke fakamau a igoa o te matakaiga o Levi i olotou kaukaiga mo kaiga, kae fakamau foki a igoa o tamaliki tagata katoa kola ko takitasi masina te matua pela foki mo latou kola ko silia atu i te masina e tasi.

¹⁶Tena, ne fai eiloa ne Mose te mea tena.

¹⁷Konei a igoa o tama tagata a Levi: Kelesona, Koate mo Melali.

¹⁸Konei igoa o tama tagata a Kelesona kola ne fakaigoa ki tupuga mo kaukaiga o latou: Lipini mo Simei.

¹⁹Ko tama tagata a Koate ne fakaigoa ki olotou tupuga mo kaukaiga: Amalamo, Isala, Hepelona, mo Usieli.

²⁰Ko tama tagata a Melali kola ne fakaigoa ki olotou tupuga mo kaukaiga: Mali mo Musi. A latou ko tupuga o te matakaiga o Levi kola ne fakaigoa ki olotou igoa o olotou tupuga.

²¹A te kaukaiga o Kelesona e aofia ei a kaiga o Lipini mo Simei.

²²A te aofaki o tagata kola ko tasi te masina te matua o fano ki luga, kola ne fakamau olotou igoa, e tusa mo te 7,500.

²³A te kaukaiga tenei e tau o nofo i te feitu ki te togala, mai tua o te Faleie o te Aliki,

²⁴ka ko Eliasafo, te tama a Laelu ke fai mo takitaki o latou.

²⁵A te tofi o latou konei, e onoono fakalei ki te Faleie o te Aliki, tena pui tua mo tena pui loto, pela foki mo te laugatu pui o te mataloa,

²⁶laugatu pui o te koga fono tela e pui mai tua o te Faleie mo te fata-fai-taulaga pela foki mo te laugatu pui mo te mataloa o te koga fono. A te tofi o latou ko te onoono fakalei ki mea katoa konei.

²⁷A te kaukaiga o Koate e aofia ei te kaiga o Amalamo, te kaiga o Isala, te kaiga o Hepelona mo te kaiga o Usieli.

²⁸A te aofaki o tagata kola ko tasi te masina te matua o fano ki luga e tusa mo te valu afe ono selau.

²⁹A te kaukaiga tenei e tau o nofo i te feitu ki saute o te Faleie o te Aliki,

³⁰ka ko Elisafana, te tama a Usieli ke fai mo takitaki o latou.

³¹A te tofi o latou ko te tausiga o te Pusa o te Feagaiga, te taipola, te tulaga‐moli, ko fata-fai-taulaga, ko mea fai meakai kola e fakaaoga ne faitaulaga i te Potu Tapu, mo te laugatu pui i te mataloa o te Potu Tafasili i te Tapu. A te tofi o latou ko te tausiga o mea konei.

³²A te takitaki o te matakaiga o Levi ko Eleasalo, te tama a Alona te faitaulaga. Ko ia e takitaki ne ia a latou kola e galue i te Potu Tapu.

³³A te kaukaiga o Melali e aofia ei a kaiga o Mali mo Musi.

³⁴A te aofaki o tagata kola ko takitasi masina te matua o fano ki luga e tusa mo te ono afe lua selau.

³⁵A te kaukaiga tenei e tau o nofo i te feitu ki matu o te Faleie o te Aliki, ka ko Sulielu, te tama a Apihaila, ke fai mo takitaki o latou.

³⁶A te tofi o latou ko te tausiga o feitu fale o te Faleie, ona talava, ona pou, ona fakavae, mo ana mea fakamau katoa. A te tofi o latou ko te tausiga o mea katoa kona.

³⁷E tausi foki ne latou a pou, tulaga, fao lakau, mo lopu o te koga fono ki tua.

³⁸A Mose mo Alona mo ana tama tagata e tau o nofo i te feitu ki mua o te Faleie o te Aliki, i te feitu ki te saegala. A te tofi o latou ko te faiga o tiute mo sauniga i loto i te Potu Tapu mo tino Isalaelu. So se tino aka e taumafai o fai te tofi tena e tau o tamate.

³⁹A te aofaki katoa o te matakaiga o Levi kola ko takitasi masina o fano ki luga, kola ne fakamau ne Mose i olotou kaukaiga i te fakatonuga a te Aliki, e tusa mo te luasefulu lua afe.

⁴⁰Muna a te Aliki ki a Mose: “Fakamau katoa a toekimua tagata o Isalaelu, e kamata mai i te tamaliki ko tasi te masina tena matua ke oko eiloa ki te tino matua, fakamau olotou igoa.

⁴¹Kae nei, a te matakaiga o Levi ke talia ne koe ke fai mo oku, ko sui ne latou a toekimua tagata o Isalaelu! Au ko te Aliki! A pulumakau a tino sa Levi ko puke foki ma aku, e sui ei a toekimua o pulumakau katoa o Isalaelu.”

⁴²Ne fakalogo eiloa Mose, tela ne fakamau ei ne ia a toekimua tagata katoa

⁴³kola ko takitasi masina te matua o fano ki luga. A te aofaki katoa e tusa mo te luasefulu lua afe lua selau fitusefulu tolu.

⁴⁴Muna a te Aliki ki a Mose penei,

⁴⁵“Fakatapu mai nei ki a au a tino sa Levi e fai mo sui o toekimua tagata katoa o Isalaelu. Fakatapu mai foki a pulumakau a tino sa Levi ke fai ma aku, e fai mo sui o toekimua o pulumakau katoa a tino Isalaelu.

⁴⁶E tusa mo te luaselau fitusefulu tolu te silia o toekimua tagata o Isalaelu i tino sa Levi, tela la, e tau o toe togi mai ne koutou mai i a au a te aofaki tena e silia.

⁴⁷E lima tupe siliva i te toekimua tagata e tokotasi, e pela eiloa mo te togi faka-te-malo.

⁴⁸A te tupe tena e ave ki a Alona mo ana tama tagata.”

⁴⁹Ne puke ei ne Mose a tupe o te faka'maga, kola ne silia ne togi ne tino sa Levi;

⁵⁰Ne puke mai ne ia mai i ulumatua o Isalaelu te afe toluselau onosefulu lima tupe siliva, e fakapitoa mo te faletapu.

⁵¹Tena ne tuku ei ne Mose a te tupe tena o te faka'maga ki a Alona mo ana tama tagata, e pela eiloa mo muna a te Aliki, mo te fakatonuga a te Aliki ki a ia.