Read Te Tusi Tapu I Te Gana Tuvalu Lomiga Lua NUMELA 30 Bible Online

NUMELA 30 - Te Tusi Tapu I Te Gana Tuvalu Lomiga Lua bible

NUMELA 30

¹Konei a fakatonuga ne tuku mai ne Mose ki takitaki o matakaiga o te fenua o Isalaelu.

² Kafai se tino ne tauto ke tuku atu sena mea ma te Aliki, io me tauto ke se toe fai ne ia se mea e masani o fai sale ne ia, e tau eiloa o tausi ne ia tena feagaiga ne fai.

³Kafai se tamafine tela koi nofo i te fale o tena tamana ne tauto ke tuku atu se mea ki te Aliki, io me ne tauto ke se toe fai ne ia se mea e masani o fai sale ne ia,

⁴e tau eiloa mo ia o fakataunu tena feagaiga ne fai, manafai e loto ki ei tena tamana.

⁵Kae kafai e se talia ne tena tamana ke fakataunu ne ia tena feagaiga, mafai ko logo a ia i te feagaiga, e mafai ne te tamafine tena o se tausi tena feagaiga. Ka fakamagalo a ia ne te Aliki, me i tena tamana e se loto ke fai ne ia te mea ne tauto a ia ki ei.

⁶Kafai se fafine seki avaga ne fai tena tautoga mo tena loto o fai, io me ne fai fa'katakata, io me ne tauto ke se toe fai ne ia se mea tela e masani o fai sale ne ia, kae se leva ko ia eiloa ko avaga,

⁷e tau eiloa mo ia o fakataunu tena feagaiga ne fai, manafai se ita tena avaga i te taimi e logo i ei.

⁸Kae kafai e se talia ne tena avaga ke fakataunu ne ia tena feagaiga i te taimi ko logo i ei, e mafai eiloa ne te fafine tena o se tausi tena tautoga. A ia e fakamagalo eiloa ne te Aliki.

⁹So se fafine ko mate tena avaga io me se fafine ko mavae mo tena avaga e tau eiloa o fai ne ia a mea ne tauto ei a ia ke fai ne ia io me ko mea ne tauto a ia ke se toe fai ne ia.

¹⁰Kafai se fafine avaga e fai sena tautoga, io me tauto ke se toe fai ne ia se mea ne masani o fai sale ne ia,

¹¹e tau eiloa o fakataunu tena feagaiga ne fai manafai e se ita tena avaga i te taimi ne logo ei.

¹²Kae kafai e se talia ne tena avaga ke tausi ne ia tena feagaiga i te taimi ko logo ei, e mafai faeloa ne ia o se tausi tena feagaiga. E fakamagalo eiloa a ia ne te Aliki me i a ia ne vao ne tena avaga ke se fai te mea ne tauto a ia ke fai.

¹³A tena avaga e isi se saolotoga o ia o talia io me se talia ke fai ne ia te mea ne tauto ei a ia.

¹⁴Kae kafai ne logo te tagata i te feagaiga a tena avaga ne fai, kae seai eiloa sena pati e fai ke oko eiloa ki te sua aso, ko tena uiga e tau eiloa o fakataunu ne te fafine a mea ne tauto a ia ki ei. Ko oti ne talia ne te tagata te tautoga a tena avaga, me e seki teke ne ia i te aso mai tua o te aso ne logo ei a ia.

¹⁵Kae kafai e teke ne te tagata te tautoga a tena avaga fakamuli, ko ia ka amo ne ia te agasala manafai e se fakataunu ne tena avaga a te mea ne tauto a ia ki ei.

¹⁶A mea kona ko tulafono kola ne tuku mai ne te Aliki ki a Mose e uiga ki tautoga kola e fai ne fafine seki avaga, kola koi nofo i tafa o olotou tamana, io me ko fafine ko oti ne avaga.