Read Te Tusi Tapu I Te Gana Tuvalu Lomiga Lua NUMELA 31 Bible Online

NUMELA 31 - Te Tusi Tapu I Te Gana Tuvalu Lomiga Lua bible

NUMELA 31

²“Fakasala atu a tino Mitiana e tusa mo te mea ne fai ne latou ki tino Isalaelu. Kafai ko oti ne fai ne koe te mea tena, ko koe eiloa ko mate.”

³Tena ne fai atu ei a Mose ki te fenua o Isalaelu penei, “Fakatoka o taua atu ki tino Mitiana, o fakasala latou e tusa mo lotou mea ne fai ki te Aliki.

⁴E taki toko afe mai matakaiga takitasi o Isalaelu e tau o olo o taua.”

⁵Tena ne fili mai ei e taki toko afe mai matakaiga takitasi, tela ko tusa ei mo te sefululua afe te aofaki katoa kola ko toka mo te taua.

⁶Ne uga atu latou ne Mose o taua, ka ko Fineaso te tama tagata a Eleasalo te faitaulaga ko te takitaki. Ko ia e tausi ne ia a mea tapu mo pu e fakailoa sale ei a fakailoga o te taua.

⁷Ne taua atu latou ki tino Mitiana, e pela mo te fakatonuga a te Aliki ki a Mose, tena ne tamate katoa ei ne latou a tagata katoa,

⁸fakatasi mo tupu o Mitiana kola e toko lima: ko Evi, ko Lekema, ko Sula, ko Hulo, mo Lepa. Ne tamate foki ne latou a Palaamo, te tama a Peolo.

⁹Ne puke fakapagota ne tino Isalaelu a fafine mo tamaliki Mitiana, ne puke foki ne latou a olotou lafu pulumakau mo lafu mamoe, pela foki a mea taua katoa,

¹⁰kae sunu a olotou fa'kai katoa.

¹¹Ne puke ne tino Isalaelu a mea kola ne 'fao mai ne latou, fakatasi mo pagota mo manu,

¹²aumai ei ne latou ki a Mose mo Eleasalo mo te fenua katoa o Isalaelu, kola e nofo i kogā koga laugatasi o Moapi i tafa o te Iolitana kae luta tonu mo Ieliko.

¹³Ne olo atu a Mose mo Eleasalo mo takitaki o te fenua o Isalaelu o fakafetaui ki te lotou kautau.

¹⁴Ne kaitaua Mose ki ofisa mo takitaki o potukau takitasi, kola ne foki mai mai te taua.

¹⁵Ne fesili atu a Mose penei, “Ai a e seki tamate ei ne koutou a fafine kona?

¹⁶ Masaua me ko fafine kola ne tautali i fakatonuga a Palaamo o fai te agasala tela ne mafua ei te se fakamaoni o tino ki te Aliki i Peolo. Tena te mea ne oko atu ei te mala ki te fenua o te Aliki.

¹⁷Tela la, tamate katoa i te taimi nei a tamaliki tagata kola ko oti ne olo ki fafine pela foki a fafine katoa kola ko oti ne moe mo tagata,

¹⁸kae tausi ma koutou a tamaliki fafine mo fafine kola e seki iloa tagata.

¹⁹A tino katoa o koutou kola ne tatino io me ne puke ki foitino o tino mate e tau o nofo i tua o te fa'kai i aso e fitu. I te tolu mo te fitu o aso, masaua o faka'ma otou foitino, pela foki mo fafine kola ne puke fakapagota ne koutou.

²⁰E tau foki o faka'ma ne koutou a gatu katoa, mo mea katoa ne faite ki pakili o manu, ki fulu o kouti, io me ne mea ne faite ki lakau.”

²¹Tena ne fai atu ei a Eleasalo ki tagata kola ne foki mai mai te taua penei: “Kona a fakatonuga ne tuku mai ne te Aliki ki a Mose:

²²aulo, siliva, palasi, fiti, apa, mo te poolo;

²³A mea katoa kola e se 'ka i te afi, e pela mo aulo, siliva, palasi, fiti, apa me ko polo mafa, e tau o faka'ma i te afi. Ka ko mea katoa e tau o faka'ma i te vai ke faka'ma.

²⁴I te fitu o aso e tau mo koutou o 'ta otou gatu, tena ko 'ma ei koutou, ko talia ei koutou o ulu atu ki loto i te fa'kai.”

²⁵Muna a te Aliki ki a Mose,

²⁶“Olo mo Eleasalo mo takitaki o te fenua o lau a mea katoa kola ne puke mai ne koutou i te taua, pela foki a pagota mo manu.

²⁷Vae pau a mea kona i vaega e lua, te vaega e tasi ma sotia ka ko te sua vaega ma te fenua katoa.

²⁸Mai te vaega tela e fano ki sotia, taofi mai i ei ke fai mo lafoga ki te Aliki e toko tasi te pagota mai te taki lima selau, e pena foki a pulumakau, asini, mamoe mo kouti.

²⁹Tuku te tusaga tena ki a Eleasalo ke fai mo tusaga fakapitoa ki te Aliki.

³⁰Mai te vaega tela ne ave ma te fenua, puke mai i ei a toko tasi te pagota mai i te taki lima sefulu pagota, e pena foki a pulumakau, asini, mamoe mo kouti. Tuku atu te tusaga tena ki te matakaiga o Levi kola e tausi ne latou te Faleie o te Aliki.”

³¹Tena, ne fai eiloa ne Mose mo Eleasalo te fakatonuga a te Aliki.

³²A mea konei ko fakasologa o mea kola ne pukegina ne sotia, fakaopoopo atu ki mea kola ne puke eiloa ma latou: 675,000 mamoe mo kouti, 72,000 pulumakau, 61,000 asini kae 32,000 taupou tamafine.

³³

³⁴

³⁵

³⁶A te afa o te tusaga o sotia e tusa mo te 337,500 mamoe mo kouti, tela a te 675 ko te lafoga mo te Aliki; 36,000 pulumakau ma sotia, tela a te 72 ko te lafoga ma te Aliki; 30,500 asini ma sotia, tela te 61 ko te lafoga ma te Aliki; 16,000 taupou tamafine ma sotia, kae ko te 32 ko te lafoga ma te Aliki.

³⁷

³⁸

³⁹

⁴⁰

⁴¹Ne tuku atu ei ne Mose ki a Eleasalo a te tusaga tela ne kati mai i te vaega o sotia e fai mo tusaga fakapitoa ki te Aliki, e pela eiloa mo tena fakatonuga ki a Mose.

⁴²A te vaega o te fenua e 'tusa mo te vaega o sotia: e 337,500 mamoe mo kouti, 36.000 pulumakau, 30,500 asini, kae 16,000 taupou tamafine.

⁴³

⁴⁴

⁴⁵

⁴⁶

⁴⁷Mai te vaega tena, ne kati mai ne Mose i ei, e tasi te pagota mai te limasefulu pagota, e pena foki te aofaki e kati mai i manu, o ave ma te kau sa Levi kola e tausi te Faleie o te Aliki e pela eiloa mo te fakatonuga a te Aliki.

⁴⁸Tena, ne olo atu a ofisa kola e takitaki i te kau sotia ki a Mose

⁴⁹o lipoti atu ki a ia penei, “Tou malu, ne lau fakalei ne matou a sotia i omotou potukau kae e seai eiloa se sotia e galo.

⁵⁰Ko aumai nei ne matou a mea taulima aulo, ko taulima, ko ligi, ko ligi taliga, mo malele kola ne puke ne matou. Ko tuku atu ne matou a mea kona ki te Aliki e togi ei omotou ola, ko te mea ke tausi mai ne ia matou.”

⁵¹Tena, ne puke ei ne Mose mo Eleasalo a mea taulima aulo katoa kona.

⁵²A te aofaki o mea taulima ne aumai ne ofisa e pili ki te luaselau kilokalame te mafa.

⁵³A latou kola e se ne ofisa ne tausi eiloa olotou mea kola ne puke i olotou fili.

⁵⁴Tena ne ave ei ne Mose mo Eleasalo a aulo kona ki te Faleie o te Aliki, ko te mea ke puipui ne te Aliki a tino Isalaelu.