Read Te Tusi Tapu I Te Gana Tuvalu Lomiga Lua NUMELA 32 Bible Online

NUMELA 32 - Te Tusi Tapu I Te Gana Tuvalu Lomiga Lua bible

NUMELA 32

¹A matakaiga o Leupena mo Kato ko oko eiloa i te uke o olotou pulumakau. I te mateaga ne latou a te lei o te fenua o Iaseli mo Kileata mo tausi pulumakau,

²tena ne olo atu ei latou ki a Mose mo Eleasalo mo takitaki katoa o te fenua kae fai atu penei,

³“A te kogā fenua tenei, tela ne fesoasoani te Aliki ki a Isalaelu ke puke ne latou—ko te fakai ko Atalota, Tipono, Iaseli, Nimala, Hesepono, Eleale, Sipama, Nepo mo Peono—se laukele lei mo lafu manu, me ko oko eiloa i te uke o tou manu.

⁵Fakamolemole tuku mai mo matou te laukele tenei ke fai mo tofi o matou, kae sa avegina matou ki te sua feitu o te Iolitana, o nofo i ei.”

⁶Ne tali atu a Mose penei, “A koutou e fiafia o nofo i konei kae tuku otou taina Isalaelu ke olo o taua?

⁷E mafai pefea ne koutou o fakavaivai a loto o tino Isalaelu ke se olo atu ki te sua feitu o te Iolitana ki te fenua tela ko oti ne tuku ne te Aliki mo latou?

⁸ Tena te mea ne fai ne otou tamana i te taimi ne uga ei ne au latou mai Katesa Paenea ke olo o onoono fakalei ki te fenua ne tuku mai ne te Atua.

⁹Ne olo atu latou ke oko eiloa ki te Vanu o Esekolo, tena matea ei ne latou te fenua, kae i te taimi ne foki mai ei, ne fakavaivai ne latou a loto o tino ke se olo ki te fenua ne tuku mai ne te Aliki mo latou.

¹⁰ Ne kaitaua te Aliki i te taimi tena, tela ne fai ei tena tautoga penei:

¹¹‘Au e tauto me mai luga o te se fakamaoni mai o latou ki a au, e seai eiloa se tino i te luasefulu tausaga o fano ki luga kola ne o'mai mai Aikupito e ulu atu ki loto i te fenua tela ne tauto ne au ki a Apelaamo, Isaako mo Iakopo.’

¹²A te mea tena e aofia ei a tino katoa, na ko Kalepo fua te tama a Iefune te tino Keni mo Iosua te tama a Nuno; ne fakamaoni eiloa laua kona ki te Aliki.

¹³Ne kaitaua te Aliki, tela ne fai ei ne ia a te fanauga a Isalaelu ke takasese sale i te vao i tausaga e fasefulu, ke oti atu ne 'mate a te tupulaga tela ne fakasala ne ia.

¹⁴Kae nei, ko 'kau eiloa koutou mo otou tamana, koutou se tupulaga fou kae fonu i tino amio masei kola ko taumafai foki o fakaoso te Aliki ke toe kaitaua ki tino Isalaelu.

¹⁵A koutou matakaiga o Leupena mo Kato, kafai koutou e ita ma tautali i te Aliki, ko tena uiga ka toe tiakina ne ia a te fenua o Isalaelu ke takasese i te vao nei, kae ko koutou e pogai ei te fakamalaiaga tena.”

¹⁶Ne toe olo latou ki a Mose kae fai atu penei, “Talia mai muamua ke faite aka ne pui mo omotou mamoe, mo ne fa'kai mo olotou pui, ke nofo i ei omotou fafine mo tamaliki.

¹⁷Ka oti ko olo ei matou mo omotou taina Isalaelu o taua, ko matou e muamua i te kautau, ke oko ki te taimi e maua ei ne latou te fenua tela ne tuku mai ne te Aliki mo latou. I te vaitaimi tena, ka ko isi ei ne fa'kai e fai a pui ke nofo ei omotou fafine mo tamaliki e sao ei latou mai i tino o te fenua tenei.

¹⁸E se mafai eiloa matou o foki mai ki omotou kaiga, vagana ke toka fakalei eiloa te fakanofoga o omotou taina Isalaelu i te fenua ne tusia mo latou.

¹⁹E seai se laukele e puke mo matou i te feitu tena o te Iolitana, me e tenei ko maua te vaega o matou i te feitu tenei ki te saegala o te Iolitana.”

²⁰Ne tali atu a Mose, “Kafai e tonu eiloa otou pati kona e fai mai, na fakatoka la nei, i mua o te Aliki, mo te taua.

²¹A otou sotia katoa e tau o ulu i loto i te Iolitana kae ka takitaki latou ne te Aliki o taua atu ki otou fili ke oko eiloa ki te taimi e fakatakavale ei latou ne te Aliki,

²²kae puke te fenua. Kafai ko toka te feitu tena, ko foki mai ei koutou ki te otou tofi tenei, me ko oti te otou tiute ki te Aliki pela foki ki otou taina Isalaelu. Tena, ka talia ei ne te Aliki ke fai mo koutou te laukele tenei i te feitu ki te saegala o te Iolitana.

²³Kae kafai e se tausi ne koutou te otou feagaiga, a koutou e agasala ki te Aliki. Sa manatu fataua ki te mea tena, a koutou e fakasala eiloa mafai e agasala koutou.

²⁴Tena la, faite otou fa'kai mo pui o otou mamoe, kae masaua o tausi te otou feagaiga!”

²⁵Tena, ne fai atu ei a tagata o matakaiga o Kato mo Leupena penei, “Tou malu, e fai eiloa ne matou tau fakatonuga.

²⁶A omotou avaga mo tamaliki, mo omotou pulumakau mo mamoe e nofo i konei, i fa'kai o Kileata.

²⁷Ka ko matou katoa ko toka katoa o olo ki te taua i lalo o te Aliki. Ka olo atu matou ki te sua feitu o te Iolitana o taua, e pela eiloa mo au pati ne fai.”

²⁸ Tena, ne tuku mai ei ne Mose a fakatonuga konei ki a Eleasalo, Iosua, mo nisi takitaki o Isalaelu:

²⁹“Kafai e olo atu a tagata o te matakaiga o Kato mo te matakaiga o Leupena ki te sua feitu o te Iolitana o fakatoka o tau i te fakatonuga a te Aliki, kae kafai e manumalo koutou mai te fesoasoani o latou, masaua la o tuku atu mo latou te fenua o Kileata ke fai mo tofi o latou.

³⁰Kae kafai e se olo atu latou ki te sua feitu o te Iolitana ke tau fakatasi koutou, ko 'tau ei o talia ne latou se vaega mo latou i te fenua o Kanana, e pena eiloa mo koutou.”

³¹Ne tali atu a tagata i matakaiga o Kato mo te matakaiga o Leupena penei, “Tou malu, e fai eiloa ne matou te fakatonuga a te Aliki.

³²A matou e olo eiloa ki te sua feitu o te Iolitana ki te fenua o Kanana o taua, e tusa mo te fakatonuga a te Aliki, ko te mea ke nofo eiloa matou mo te motou tofi i konei, i te feitu ki te saegala o te Iolitana.”

³³Tena ne tuku ei ne Mose ki matakaiga o Kato mo Leupena, pela foki ki te āfa o te matakaiga o Manase a te kogā fenua katoa o te Tupu o Amoli ko Sekono, mo te Tupu o Pasana ko Oko, e aofia ei a fa'kai mo te fenua i olotou tafa.

³⁴Konei a fa'kai fai pui kola ne toe faite fakalei ne te matakaiga o Kato: ko te fa'kai o Tipono, Atalota, Aloela,

³⁵Atalota Sofana, Iaseli, Iokopea,

³⁶Petanimala, mo Peta Halana.

³⁷A fa'kai ne toe faite fakalei ne te matakaiga o Leupena ko te fa'kai o Hesepono, Eleale, Kiliataima,

³⁸Nepo, Paala Meono, te igoa tena ne fuli, mo Sipama. Ne toe fakaigoa ne latou ki igoa fou a fa'kai kona ne toe faite fakalei ne latou.

³⁹A te kaukaiga o Makila, te tama a Manase, ne fao ne ia te fenua o Kileata kae afuli a tino Amoli kola ne nofo i ei.

⁴⁰Tena ne tuku atu ei ne Mose a te fenua o Kileata ki te kaukaiga o Makila, tena ne nofo eiloa latou i kona.

⁴¹A te kaukaiga o Iaila i te matakaiga o Manase, ne fao malo ne latou a nisi fa'kai foniki kae fakaigoa ne latou ko “Fa'kai o Iaila.”

⁴²A Nopa, ne fakatakavale ne tena potukau a te fenua o Kenata mo fa'kai i ona tafa, tena ne fakaigoa ei ne ia ki tena igoa, ko Nopa.