Read Te Tusi Tapu I Te Gana Tuvalu Lomiga Lua NUMELA 34 Bible Online

NUMELA 34 - Te Tusi Tapu I Te Gana Tuvalu Lomiga Lua bible

NUMELA 34

¹Ne tuku mai ne te Aliki ki a Mose

²a fakatonuga konei mo tino Isalaelu: “Kafai ko ulu atu koutou ki te fenua o Kanana, tela ka avatu ne au mo koutou, masaua me konei a tuakoi o te otou fenua.

³A te tuakoi ki saute e fanatu mai te Vao o Sina o fano ki te tuakoi o Etoma. E kamata mai i te saegala i te mata ki saute o te Tai Mate.

⁴Mai kona ko fano ei pela ki saute o fano ki te auala i Akalapima, o fano eiloa i loto i te Vao o Sina ke oko eiloa ki Katesa Paenea i saute. Mai i kona ko fano ei pela ki matu togala ki Hasala Ata ke oko ki Asamona,

⁵kae mai kona ko fano ei pela ki te vanu i te tuakoi o Aikupito kae gata i te Tai Metitilani.

⁶“A te tuakoi ki te togala, ko te Tai Metitilani.

⁷“A te tuakoi ki matu e fanatu mai i te Tai Metitilani ke oko ki te Mauga o Holo,

⁸kae mai kona ke oko ki te Auala o Hamata. Ka fanatu eiloa ke oko ki Setata

⁹o fanatu eiloa ki Sifolono, kae gata mai, mai Hasala Enanu.

¹⁰“A te tuakoi ki te saegala e vau mai Hasala Enanu ke oko ki Sefama.

¹¹Mai i kona ko fano faka saute ki Hapelu, i te feitu ki te saegala o Aino, ke oko ki mauga foliki i te matafaga ki te saegala o te vai o Kalilaia,

¹²kae mai kona, ko fano ei pela ki saute o tautali i te Vaitafe o te Iolitana ke oko ki te Tai Mate. “Kona a tuakoi e fa o te otou fenua.”

¹³ Tena ne fai atu ei a Mose ki tino Isalaelu penei, “Tenei te fenua tela ka maua ne koutou i te faiga o te vili, te fenua tela ko oti ne fakasino ne te Aliki mo te toko iva matakaiga, pela foki te afa o te matakaiga o Manase.

¹⁴A matakaiga o Kato mo Leupena, mo te sua afā o te matakaiga o Manase ko oti ne maua te olotou vaega, tela ne vaevae eiloa i olotou kaiga,

¹⁵i te feitu ki te saegala o te Iolitana, kae 'luta tonu mo Ieliko.”

¹⁶Muna a te Aliki ki a Mose,

¹⁷“Ko Eleasalo te faitaulaga mo Iosua te tama a Nuno ka feagai mo te vaevaega o te fenua i tino Isalaelu.

¹⁸Puke mai foki e tokotasi te takitaki mai matakaiga takitasi ke fesoasoani ki te vaevaega o te fenua.”

¹⁹Konei a igoa o tagata ne filifili ne te Aliki: [Te Matakaiga] — [Te Takitaki] Iuta — Kalepo te tama tagata a Iefune Simeona — Selumielu te tama tagata a Amiuta Peniamina — Elitata te tama tagata a Tisilona Tanu — Puki te tama tagata a Iokila Manase — Hanielu te tama tagata a Efota Efalaima — Kemuelu te tama tagata a Sifatana Sepulona — Elisafana te tama tagata a Panako Isakala — Palatielu te tama tagata a Asana Asela — Aiuta te tama tagata a Selomi Nafatali — Petaelu te tama tagata a Amiuta

²⁹Kona a igoa o tagata kola ne fili ne te Aliki ke vaevae te fenua o Kanana mo tino Isalaelu.