Read Te Tusi Tapu I Te Gana Tuvalu Lomiga Lua NUMELA 35 Bible Online

NUMELA 35 - Te Tusi Tapu I Te Gana Tuvalu Lomiga Lua bible

NUMELA 35

¹ I te kogā koga laugatasi o Moapi i tafa o te Iolitana kae 'luta mo Ieliko, ne faipati mai ei a te Aliki ki a Mose penei,

²“Fai ki tino Isalaelu ke masaua o tuku ne fa'kai mo nofo te kau sa Levi mai olotou vaega ne maua, mo ne laukele moukua i tafatafa o fa'kai kona mo fagai olotou manu.

³A fa'kai kona ka puke mo te kau sa Levi kae ka nofo eiloa i ei. A te laukele moukuā, mo fagai olotou pulumakau mo nisi manu ake.

⁴A te laukele mo fagai manu e tau o faselau limasefulu mita mai i te pui o te fa'kai o fano ki tua i ona feitu katoa,

⁵ko te mea ke isi ne mea fakata'fa i feitu katoa o te fa'kai, e taki iva selau mita te lasi, ka ko te fa'kai e tu i te kogaloto.

⁶E tau o tuku ne koutou e ono a fa'kai ki tino sa Levi, ne fa'kai e faka'lafi sale ki ei a tino manafai ne ta ne latou ne tino kae se ko olotou loto o tatino. Tuku atu foki e fasefulu lua fa'kai fakaatea

⁷mo olotou laukele moukuā, tena la, ko tusa ei mo te fasefulu valu fa'kai.

⁸A te aofaki o fa'kai o te kau sa Levi mai matakaiga takitasi e fuafua eiloa ki te lasi o te kogā fenua.”

⁹ A te Aliki ne fai mai ki a Mose

¹⁰ke fai atu ki tino Isalaelu penei: “Kafai ko olo atu koutou ki te sua feitu o te Iolitana, o ulu atu ki loto i te fenua o Kanana,

¹¹e tau o fili ne koe ne fa'kai e mafai o lafi ki ei a tino ne tatino i se feitu fakafuasei.

¹²I kona e sao ei a ia mai kaiga o te tagata tela ne mate. A te tino ne ti ki ei te agasala ko te tatino e se tau o tamate kae seki ai se fono tulafono o ia ne fai.

¹³Fili aka e ono fa'kai,

¹⁴e tolu i te feitu ki te saegala o te Iolitana kae tolu i loto i te fenua o Kanana.

¹⁵A fa'kai konei ka fakaaoga mo faka'lafi sale a tino Isalaelu mo tino fakaalofa kola e nofo tumau io me e se nofo tumau i te fenua. So se tino e ta sena tino kae se ko tena loto, e mafai o tele o fakalafi i fa'kai kona.

¹⁶“Kae kafai ne fakaaoga ne se tino se fiti io me se fatu io me se lakau o tamate se tino, e taia a ia i te agasala ko te tatino, tela la, e tau foki a ia o tamate.

¹⁷Io, me ko sose tino ne tuki ne ia te sua tino ki te fatu i ana lima tela ko pogai ei te mate o te sua tino, kae ne sukesuke ake me i te mea tena se ta tino; a te tino tatino tena e tau foki o tamate.

¹⁸Io, me kafai se tino ne pago ne ia te sua tino ki se mea tau ne faite ki te laupapa kae mate, a ia ko taia i te agasala ko te tatino, tela la, e tau foki a ia o tamate.

¹⁹Se tiute o te kaiga pili eiloa o te tagata ne mate o tamate te tino ne ta ne ia tena kaiga. Kafai e maua ne ia te tino tatino, e tau o tamate ne ia.

²⁰“Kafai se tino e ita ki te sua tino kae tamate ne ia, faitalia me ne tule ne ia io me ne pei ne ia ki se mea

²¹io me ne fusu ne ia, a ia e taia eiloa i te agasala ko te tatino, tela la, e tau foki a ia o tamate. Ko te tiute o te kaiga pili eiloa o te tagata ne mate o tamate te tino ne ta ne ia tena kaiga. Kafai e maua ne ia e tau o tamate ne ia.

²²“Kae kafai e isi se tino e se ita ki te sua tino, kae ne tamate ne ia, me ne tule ne ia ki lalo, io me ne pei ne ia ki se mea.

²³I te sua feitu, kafai ne sagavale se tino kae pei ne ia te fatu kae poko i se tino e seki fakamoemoe a ia o fakapakia kae se se fili foki o ia, kae ne mate eiloa te tino tena.

²⁴I vaega mea pena, e tau eiloa mo te fenua o kau i te tino ne pogai ei te mate o te sua tino, kae se kau ki te kaiga o te tagata ne mate, tela e taumafai o taui te mate o tena kaiga.

²⁵E tau mo te fenua o fakasao te tagata ne tatino i se feitu fafuasei mai te kaiga o te tagata ne mate, kae fakafoki atu ne latou ki te fa'kai fakalafi tela ne fakalafi ei a ia. E tau a ia o nofo i te fa'kai tena ke oko eiloa ki te taimi e mate ei a te Faitaulaga Pule.

²⁶Kafai e tiakina ne te tagata tena te fa'kai ne lafi a ia i ei,

²⁷kae maua atu ne te kaiga o te tagata ne mate kae tamate ne ia, e se taia te kaiga o te tagata ne mate i te agasala ko te tatino.

²⁸A te tagata ne tatino i se feitu fafuasei e tau eiloa o nofo i te fa'kai ne fakalafi ei a ia ke oko ki te taimi e mate ei te Faitaulaga Pule, ko mafai ei ne ia o foki atu ki tena fa'kai.

²⁹A tulafono konei e fakasino ki a koutou mo otou gafa, faitalia me tefea te koga e nofo ei koutou.

³⁰ “A te tino e ave ki te fono me ne tatino e mafai o 'se, manafai e tokolua io me tokouke atu a molimau. A te molimau e tokotasi e se lava o faka'se ei se tino ne tatino.

³¹A te tino tatino e tau o tamate. E se mafai ne ia o fakasao a ia o togi tupe.

³²Kafai se tino ne tele o fakalafi i se fa'kai fakalafi, e tapu e talia ne koutou se togi e tuku mai ne ia ko ia ke na foki atu ki tena fa'kai, kae e seki mate te Faitaulaga Pule.

³³Kafai e talia ne koe, ko fakalailai ne koe te fenua e nofo koe i ei. A te tatino e fakalailai ne ia te fenua. E seai eiloa se auala e mafai ei o faka'ma te laukele ne tamate ei se tino ne sua tino; ko te tamate fua o te tino tatino.

³⁴Sa fakalailaigina te fenua tena e nofo koutou i ei, me ko au ko te Aliki, e nofo tasi mo tino Isalaelu.”