Read Te Tusi Tapu I Te Gana Tuvalu Lomiga Lua NUMELA 4 Bible Online

NUMELA 4 - Te Tusi Tapu I Te Gana Tuvalu Lomiga Lua bible

NUMELA 4

¹Ne fai mai a te Aliki ki a Mose

²ke lau te kaukaiga o Koate i kaukaiga foliki mo kaiga takitasi,

³kae fakamau a igoa o tagata kola ko tolusefulu tausaga ki te limasefulu tausaga, kola e tau o galue i te Faleie o te Aliki.

⁴A mea e tausi ne latou ne mea tafasili i te tapu.

⁵Konei a fakatonuga ne tuku mai ne te Aliki ki a Mose. Kafai ko oko ki te taimi ka fai malaga ei koutou, a Alona mo ana tama tagata e tau o ulu atu ki loto i toku Faleie o tuku ifo te laugatu pui tela i mua o te Pusa o te Feagaiga o ufi ki ei te Pusa o te Feagaiga.

⁶E tau o ufi atu foki ne latou se mea ne faite ki pakili manu i luga o te Pusa o te Feagaiga, kae 'tao atu mo se laugatu lanu usi i luga i ei, ko faulu atu ei mo mea sau o ia.

⁷E tau o fola foki ne latou se laugatu lanu usi i luga i te taipola tela e tuku ei te falaoa mo te Aliki, kae tuku atu ki luga i ei a mea fai meakai, mo pola e tuku sale i ei a mea manogi, mo pola o taulaga, mo tia e fakaaoga i faiga o taulaga uaina. E tau faeloa o isi se falaoa i luga i te taipola.

⁸E tau o fola ne latou se laugatu kula i luga i mea katoa konei, kae 'tao atu i luga i ei se laugatu ne faite ki pakili manu, ko faulu atu ei mo mea sau o ia.

⁹Masaua foki o ufi te tulaga‐moli ki se laugatu lanu usi, pena foki a moli, mo sikofi, mo telē, mo mea e utu ei a te sinu olive.

¹⁰E tau o pelupelu fakalei ne latou te tulaga‐moli mo ana mea katoa ki te ufi pakili manu, ko tuku ei ki luga i te laupapa tela e ave sale.

¹¹Ka oti ne fai a mea kona, ko fola aka foki ne latou se laugatu lanu usi i luga i te fata-fai-taulaga aulo, kae tao atu ki luga i ei se laugatu ne faite ki pakili manu, ko faulu atu ei mo ana amo.

¹²E tau foki o puke mai ne latou a meaafale pela mo sipunu mo tui, kola e fakaaoga i te Potu Tapu, o kofu ki se laugatu lanu usi, kae toe 'tao atu foki i luga i ei se laugatu faite ki pakili manu, ko ave ei o tuku i luga i te fata tela e ave sale.

¹³E tau o ave keatea ne latou te lefu sinusinua mai te fata-fai-taulaga, ko fola ei se laugatu kulakula i luga i ei.

¹⁴E tau o tuku atu ne latou ki luga i te fata-fai-taulaga a mea katoa kola e fakaaoga i ei: ko pani, ko mea fakalave, ko sevolo, mo pesini. Ka oti ko 'tao atu foki ne latou i luga i ei se laugatu faite ki pakili manu ko faulu atu ei mo ana amo.

¹⁵Kafai ko oko ki te taimi ka fano ei te malaga, ko te kaukaiga o Koate ka o'mai o amo a mea tapu kona manafai ko oti katoa eiloa ne ufi faka'lei ne Alona mo ana tama tagata. E se tau mo tino i te kaukaiga o Koate o fakapa'tele ki mea tapu kona, i a latou ma mate. Tena te tiute e fai ne te kaukaiga o Koate i taimi katoa e fakamasiki ei a te Faleie o te Aliki.

¹⁶A te tofi o Eleasalo, te tama a Alona te faitaulaga ko te tausiga o te Faleie katoa, pela foki a sinu o moli, mea ma'nogi, taulaga saito, te sinu milimili, mo nisi mea valevale aka foki i loto i te Faleie, kola ko oti ne fakatapu mo te Aliki.

¹⁷Muna a te Aliki ki a Mose mo Alona penei,

¹⁸“Taumafai o fakamao keatea a tino i te kaukaiga o Koate mai i mea tapu konei

¹⁹i te mea ma sona tamate fua ei latou. Tela la, a te faiga e tau o fai ke mo a se mea pena e tupu, ko Alona mo ana tama tagata ke ulu atu ki loto i te Faleie o te Aliki o fakasino ki tino takitokotasi a olotou tiute e tau o fai mo mea e tau o amo ne latou.

²⁰Kae kafai e ulu atu a tino o te kaukaiga o Koate ki loto i te Faleie o te Aliki, kae matea ne latou a faitaulaga e fakatoka mai a mea tapu mo te malaga,[1] ko latou ka mate.”

²¹Ne fai mai te Aliki ki a Mose

²²ke lau a tino o te kaukaiga o Kelesona i te matakaiga o Levi i olotou kaukaiga foliki mo kaiga,

²³kae fakamau a igoa o tagata katoa kola ko tolusefulu ki te limasefulu tausaga, kola e tau o galue i te Faleie o te Aliki.

²⁴Konei a mea e tau o amo ne latou:

²⁵ko te Faleie, tena pui loto, tena pui tua, ko te laugatu pakili manu tela e ufi mai luga i ei, ko te laugatu pui o te mataloa,

²⁶ko laugatu pui mo lopu o te koga fono kola mai tua o te faleie mo te fata-fai-taulaga, ko laugatu 'pui o te mataloa o te koga fono, mo mea likiliki katoa kola e fakaaoga i te faka'tuga o mea konei. E tau o fai ne latou a tiute katoa kola e tau o fai mo mea konei.

²⁷A Mose mo Alona e tau o onoono faka'lei ke fakataunu eiloa a tiute o te kaukaiga o Kelesona, kae amo foki ne latou a mea kola ko oti ne fakasino ne Alona mo ana tama tagata ke ave ne latou.

²⁸Kona a tiute o te kaukaiga o Kelesona i te Faleie; e amo ne latou a mea kona i lalo o te fakatonutonuga a Itamala, te tama a Alona te faitaulaga.

²⁹Ne fai mai te Aliki ki a Mose ke lau aka a te kaukaiga o Melali i te matakaiga o Levi, i olotou kaukaiga foliki mo kaiga,

³⁰kae fakamau a igoa o tagata ko taki tolusefulu tausaga ki te limasefulu kola e tau o galue i te Faleie o te Aliki.

³¹Konei a mea e tau o amo ne latou: ko feitu fale, ko talava, ko pou mo tulaga o te Faleie,

³²mo pou, tulaga, fao lakau, mo lopu o te koga fono tela mai tua o te faleie mo te fata-fai-taulaga fakatasi mo mea fakamau e fakatu ei te Faleie. E tofu te tino mo te mea e ave ne ia.

³³Kona a tiute o te kaukaiga o Melali i te lotou galuega i te Faleie o te Aliki: e tau o ave ne latou a mea kona mai ilalo o te fakatonutonuga a Itamala te tama a Alona te faitaulaga.

³⁴Mai luga i te fakatonuga a te Aliki, tela ne lau ei ne Mose mo Alona mo takitaki o te fenua, a kaukaiga mo matakaiga o Koate, Kelesoma mo Melali, i te matakaiga o Levi. Ne lau ne latou i kaukaiga foliki mo kaiga, kae fakamau a igoa o tagata katoa mai te tolusefulu tausaga ki te limasefulu tausaga, kola e 'tau mo te galuega i te faleie o te Aliki. Tenei te aofaki o tino: [Kaukaiga] — [Aofaki] Koate — 2,750 Kelesona — 2,630 Melali — 3,200 Te aofaki kātoa: — 8,580

⁴⁹Ne fakamau eiloa a igoa o tino taki tokotasi e pela eiloa mo te fakatonuga a te Aliki ki a Mose. Mai i te fakatonuga a te Aliki ki a Mose, tela ne vaevae ei a tagata taki tokotasi ki olotou tofi.