Read Te Tusi Tapu I Te Gana Tuvalu Lomiga Lua MIKA 1 Bible Online

MIKA 1 - Te Tusi Tapu I Te Gana Tuvalu Lomiga Lua bible

MIKA 1

¹ I te taimi ne tupu ei a Iotama, Aasa mo Hesekia i Iuta, ne avatu ei ne te Aliki te fekau tenei ki a Mika, tela se tagata mai te fa'kai ko Moleseta. Ne fakaasi ne te Aliki ki a Mika a mea katoa konei e uiga ki a Samalia mo Ielusalema.

²Faka'logo mai ki te mea tenei, koutou malo katoa; Faka'logo mai ki te mea tenei, a koutou katoa kola e nofo i te lalolagi; A te Aliki Sili ka faipati ki te amio se 'lei o koutou. Fakalogo mai! A ia e faipati mai i tena faletapu i te lagi.

³A te Aliki e vau mai i tena nofoaga tapu, Ka vau a ia ki lalo o sasale i ulu o mauga.

⁴Ko mauga eiloa ka liuvai, e pela me se gako e 'ka i te afi; Ka ma'ligi ifo latou ki vanu E pela me ne vai e 'tafe ifo i se mauga.

⁵A te mea tenei ka tupu, me i tino Isalaelu ko oti ne agasala kae 'teke ki te Atua. Ko oi ka pei ki ei te 'se e uiga ki te 'teke o Isalaelu? Ko Samalia eiloa, te laumua o Isalaelu ki matu! Ko oi e agasala ki te ifo ki tupua i Iuta? Ko Ielusalema eiloa!

⁶Tela ne fai mai ei te Aliki penei, “Ka fai ne au a Samalia ke pela me se fakatūga kaiga i se koga ateatea, ko fai ei mo koga e toki ei togavine. Ka ligi ne au a mea kola ne fakamasei o te fa'kai ki te vanu, kae ka tuku faka'sau fua a fakavae o te fa'kai.

⁷A tupua taua katoa i ei ka tuki fakalikiliki. A mea katoa kola ne ave ma fafine tali tagata i olotou faletapu, ka sunu katoa i te afi. A fatagata katoa foki ka liu lefu. Ne aumai ne Samalia a mea konei mo fai tapuakiga ke maumea te lotou laukele, kae nei ka ave a mea katoa kona ne olotou fili mo fai olotou tapuakiga i se koga fakaatea.”

⁸Muna a Mika, “Ona ko te mea tenei, au ka tagi mo te fanoanoa. Au ka sasale seai ne oku taka, kae tele fuafua, o fakaasi toku fanoanoa. Au ka tagi pela me se kuli vao, kae ki pela mo te manu ko te ositiliti.

⁹A pa'kiaga o Samalia ko se toe mafu, kae ko pili foki nei o oko ki Iuta se vaega malaia pena. A te fakamaseiga ko oko ki mataloa o Ielusalema, te koga a nofo i ei oku tino.”

¹⁰Sa fakaasi atu ki o'tou fili i Kata i a tatou ne takavale; ke mō a foki e iloa ne latou i a koutou ne tagi. Koutou tino Peta Leafala, [1] fakaasi te otou fanoanoa o takafilifili i lalo i te pefu!

¹¹Koutou tino o Safila, olo fuafua mo te masiasi ki te tafeaga. A latou kola e nofo i Sanani ko se mafai o o'mai ki tua mo te lotou fa'kai. Kafai ko lagona ne koutou te tagi fanoanoa o tino Peteseli, ka iloa ne koutou me e seai se lafiga 'lei i ei.

¹²A tino o Malota ka fakatalitali fua ki se filemu, i te Aliki ne aumai ne ia te malaia ke pili ki Ielusalema.

¹³A koutou kola e nofo i Lakisa, 'sai a solofanua ki kaliota. A koutou ne fakaakoako ki agasala a Isalaelu, tela ko iku ei ki te agasala o Ielusalema.

¹⁴Kae nei, koutou tino o Iuta, fakatofa atu ki te fa'kai o Moleseta Kata. Ka seai se fesoasoani e maua ne te tupu o Isalaelu mai te fa'kai o Akasipa.

¹⁵Tino Malesa, a koutou ka tuku ne te Aliki ki te otou fili, tela ka 'fao malo ne ia te otou fa'kai. A takitaki sili o Isalaelu ka olo o muni i te ana i Atulama.

¹⁶Koutou tino o Iuta, 'kati otou laulu o fakaasi te otou tagi fanoanoa ona ko otou tamaliki fagasele. 'Kati ke 'kila e pela me ne manu ko aeto, me i tamaliki a koutou ka ave i te tafeaga.