Read Te Tusi Tapu I Te Gana Tuvalu Lomiga Lua MIKA 4 Bible Online

MIKA 4 - Te Tusi Tapu I Te Gana Tuvalu Lomiga Lua bible

MIKA 4

¹I aso mai mua nei, Te mauga tela e tu ei te Faletapu Ka maluga atu i mauga katoa. Ka uke a malo e o'mai ki ei,

²Ka ko olotou tino ka fai aka penei, “Tou olo ki luga i te mauga o te Aliki, Ki te Faletapu o te Atua o Isalaelu, Me ka akoako mai ne ia ki a tatou a mea kola e manako a ia ke fai ne tatou; Ka sasale tatou i auala ne filifili ne ia. Me i te akoakoga a te Aliki e vau mai Ielusalema; E faipati mai a ia ki tena fenua mai Siona.”

³ Ka fakalei ne ia a kinauga i va o malo, Malo pili mai mo malo mao. Ka tuki olotou pelu ke fai mo mea fakamalū laukele Ka ko olotou tao ke fai mo naifi vele vao. A malo ka se toe fai taua; Se toe fakatokatoka foki mō se taua.

⁴ A tino katoa ka nofo filemu i olotou togavine mo togamati, Kae ka seai se tino e toe fai ne ia ke mataku latou. Ko te Aliki Malosi ne tauto ke maua ne tino a te filemu pena.

⁵A malo katoa e tapuaki kae faka'logo ki olotou atua, ka ko matou e tapuaki kae faka'logo ki te Aliki te motou Atua ki te se gata mai.

⁶Muna a te Aliki, “Ka oko mai te taimi ka toe fakapotopoto ei ne au a tino kola ne fakasala ne au, ko latou kola ne puapuagatia i te tafeaga.

⁷Ko se katoatoa te olotou malosi kae mao mo te olotou fenua. Kae seafaina me ka toe fakafou ne au te olotou malo ki a latou kola e toe, kae ka fai latou mo malo takutakua. Ka pule ne au latou mai luga o te Mauga o Siona, mai i te taimi tena ke oko eiloa ki te se gata mai.”

⁸Ka ko koe Ielusalema, te fenua tela e tausi i ei ne te Atua ona tino e pela me se tausi mamoe; ka toe fai koe mo laumua o te malo tela e o koutou i aso mua.

⁹Ai a e tagi pakalaga ei koe? Ai a e puapuagatia ei koe e pela me se fafine ka fanau? Me ko seai sou tupu, ka ko ou tino poto foki ko mate?

¹⁰Tino Ielusalema, fiti kae kono fita [4] e pela me se fafine ka fanau, i a koutou ka olo keatea mo te fa'kai o nofo i koga ateatea o se fenua. A koutou ka olo ki Papelonia. Ka ko te Aliki ka fakasao ne ia koutou i kona mai otou fili.

¹¹E uke malo ko 'kau fakatasi o 'ta koutou. Muna a latou, “A Ielusalema e 'tau o fakamasei valevale! Ka matea ne tatou te masei valevale o te fa'kai tenei!”

¹²Kae e se iloa eiloa ne malo konei a mafaufauga o te Aliki. Se iloa eiloa ne latou me ne fakapotopoto latou ke fakasala e pela me ne kalite e fakaputu ke tuki.

¹³Muna a te Aliki, “Koutou tino Ielusalema, olo o fakasala otou fili! Ka fai ne au a koe ke malosi e pela me se pulumakau tagata e fai ana sau fiti ka ko ona alofivae ne palasi. Ka tuki pala ne koe a malo e uke, ka ko koloa kola ne fao malo ne latou, ka tuku mai ne koutou ki a au, te Aliki o te lalolagi katoa.”