Read Te Tusi Tapu I Te Gana Tuvalu Lomiga Lua MIKA 6 Bible Online

MIKA 6 - Te Tusi Tapu I Te Gana Tuvalu Lomiga Lua bible

MIKA 6

¹Faka'logo mai ki te fakamasinoga a te Aliki ki a Isalaelu. Te Aliki, tu mai o fai tau fakamasinoga ki a Isalaelu, ko au pati ke lagona ne mauga lasi mo mauga fo'liki.

²A koutou mauga, a koutou fakavae o te lalolagi, ke faka'logo ki te fakamasinoga a te Aliki! E isi se fakamasinoga a te Aliki ki ona tino.

³Muna a te Aliki, “Oku tino, se a te mea ne fai ne au ki a koutou? I te feitu fea ne fai ei au mo fakalavelave ki a koutou? Tali mai.

⁴ Ne aumai ne au koutou keatea mai Aikupito; ne faka'sao ne au koutou mai te nofo pologa; ne uga ne au a Mose, Alona mo Miliama ke takitaki ne latou a koutou.

⁵ Oku tino, e masaua ne koutou te taumafaiga a Palako, te tupu o Moapi o 'ta koutou mo te tali a Palaamo, te tama a Peolo, tela ne 'sao ei koutou? E masaua ne koutou a mea kola ne 'tupu i te auala mai te laukele i Akasia ki Kilikala? Ke masaua a mea konei kae ka iloa ei ne koutou a te mea ne fai ne au mō faka'sao koutou.”

⁶Se a te mea ka aumai ne au ki te Aliki, te Atua o te lagi, i te taimi e tapuaki ei au ki a ia? E a, e aumai ne au a tama pulumakau tafasili i te gali o sunu mo fai a taulaga ki a ia?

⁷Mata e fiafia te Aliki manafai e avatu ne au ki a ia ne afe mo afe o mamoe, mo sinu olive e uke? E a, e tau o ofo atu ne au taku toekimua, ke togi ki ei aku agasala?

⁸Ikai, ko oti ne taku mai ne te Aliki ki a tatou te mea lei. A te mea e manako a ia ke fai ne tatou tenei: ke fai ne tatou te mea tonu, ke fakaasi atu te alofa tumau, kae ola mo te loto maulalo i mua o te tou Atua.

⁹A te mea sili i te 'lei ko te mataku ki te Aliki. E kalaga a ia ki te fa'kai penei, “Faka'logo mai, koutou kona e fakapotopoto i te fa'kai![5]

¹⁰A fale o tino masei ko fonu i koloa kola ne 'fao malo ne latou. E fakaaoga ne latou a fua 'se, ko te mea tela e se fiafia au ki ei.

¹¹E fakamagalo pefea ne au a tino e fakaaoga a fua 'se?

¹²Koutou tino maumea, e fakaloiloi ne koutou a tino ma'tiva mo te 'lei o koutou, ka ko koutou foki ne tino 'loi.

¹³Tela la, ko leva ne kamata[6] ne au te fakamaseiga mo te fakamalaiaga o koutou, ona ko otou agasala.

¹⁴Koutou ka 'kai, kae se makona — ko tena uiga koutou ka liki'liki faeloa. Ka ave ne koutou ne koloa, kae ka se mafai o tumau i a koutou; so se mea e tausi ne koutou, ka fakamasei ne au i te taua.

¹⁵Ka 'toki ne koutou a saito, kae ka se kai koutou i ei. Ka 'tau ne koutou a sinu mai olive, kae ka se mafai o fakaaoga ne koutou. Ka faite ne koutou a uaina, kae ka se inu lele eiloa ne koutou.

¹⁶Ka tupu te mea tenei ona ko koutou ne tautali ki faifaiga masei a te tupu ko Omeli mo tena tama tela ko Aapo te tupu. Ne tautali koutou i olotou faifaiga, tena ka fakamasei ei ne au a koutou, ka ko tino ka takalialia i a koutou.[7]