Read Te Tusi Tapu I Te Gana Tuvalu Lomiga Lua MIKA 7 Bible Online

MIKA 7 - Te Tusi Tapu I Te Gana Tuvalu Lomiga Lua bible

MIKA 7

¹Au ko se aoga! Au ko pela me se tagata mate fia kai, tela e seai ne fuaga e maua ne ia i luga i lakau, seai foki ne fuagavine i luga i vine. A fuagavine katoa, pela foki mo mati magalo ko palele katoa ne tau.

²E seai eiloa se tino amiotonu e 'toe i te fenua, e seai foki se tino fakamaoni ki te Atua. A tino katoa ko fakatalitali ki se avanoa o 'ta tino. A tino katoa ko lamalama ki tino foki eiloa o te olotou fenua.

³A latou ne tino masani katoa i te faiga o amioga masei. A tino maluga mo famasino e talia ne latou a 'togi faka'kolekole. A te tino gutu poto, e fai ki a latou te mea e manako a ia ki ei, tela ko kau fakatasi ei latou.

⁴Ke oko foki eiloa ki tagata lei kae fakamaoni, ko se aoga e pela me ne mouku. Ko oko mai te aso tela ka fakasala ei ne te Atua a tino, e pela eiloa mo ana folafolaga ki pelofeta. Nei la, ko se iloa fāka ne latou o fai se mea.

⁵Sa talitonu ki otou tuakoi, sa fakatuaga foki ki otou taugasoa. Fakaeteete foki ki pati e fai ne koe ki tau avaga.

⁶ I taimi konei, a tamaliki tagata ko fai ne latou olotou tamana pela me ne vale, a tamaliki fafine ko teke ki olotou matua, ka ko fafine ko kinau mo matua o olotou avaga. A fili o te tagata, ko tino eiloa o tena kaiga.

⁷Ka ko au ko fakatalitali ki te Aliki; ka fakatalitali au mo te loto talitonu ki te Atua, tela ka fakasao ne ia au. Toku Atua ka lagona ne ia aku talosaga.

⁸E se tau mo otou fili o kata fakatauemu ki a tatou. Tatou ne takavale, kae nei ka toetu aka. Tatou nei e nofo i te pouliga, ka ko te Aliki ka tuku mai ne ia te mainaga.

⁹Tatou ne agasala ki te Aliki, tela la, e 'tau mo tatou nei o kufaki atu te fakasalaga ka aumai ne ia ki a tatou. Kae fakamuli, ka puipui ne ia tatou ka fakatonu foki ne ia a mea 'se kola ne fai ki a tatou. Ka aumai ne ia tatou ki se mainaga; ka ola tatou ke matea ne tatou te fakasaoga o tatou ne ia.

¹⁰Ka matea ne 'tou fili te mea tenei, kae ka masiasi latou — ko 'tou fili kona kola ne o'mai o fakalili tatou penei, “Tefea te Aliki te otou Atua?” Ka matea ne tatou me ka takavale latou,[8] kae lakalaka ki lalo pela me ne pela i auala.

¹¹Tino o Ielusalema, ko pili mai te taimi ka toe faite ei a pui o otou fa'kai. I te taimi tena, ka toe fakalasi ei te otou fenua.

¹²Otou tino kola e salalau ka toe foki mai — mai Asulia i te saegala, mai Aikupito i saute, mai kogā koga i Eufilate, mai vasa mao mo mauga mao.

¹³Ka ko te lalolagi ka lavaki ona ko te amio ma'sei o tino kola e nofo i ei.

¹⁴Te Aliki, tausi ki ou tino kola ne filifili ne koe. E ui eiloa e nofo latou i te vao, e isi eiloa ne laukele ola i olotou tafa. Tuku atu latou ke olo o kaikai i mouku lausiusi o Pasana mo Kileata, e pela eiloa mo aso mua.

¹⁵Te Aliki, fai aka ne vavega mō matou[9] e pela mo mea ne fai ne koe i aso kola ne aumai ei ne koe matou mai Aikupito.

¹⁶E pefea eiloa te ma'losi o malo, kae kafai e lavea ne latou te mea tenei, ka tukaki ei olotou loto. I te lotou se fiafia, tela ka pono ei olotou gutu kae faka'tuli olotou taliga.

¹⁷Ka tolo latou i te pefu e pela me ne gata; ka o'mai latou mai olotou olo mo te polepole kae ma'taku. Ka fuli latou mo te ma'taku ki te Aliki te tou Atua.

¹⁸Te Aliki, e seai se Atua e pela mo koe; e fakamagalo ne koe a agasala a ou tino kola ne ola mai. E se tumau tou ita, kae fiafia koe o fakaasi mai ki a matou tou alofa 'nau.

¹⁹Ka toe alofa mai koe ki a matou. Ka fakamagalo kae fakapuli ne koe omotou agasala!

²⁰Ka fakaasi ne koe tou fakamaoni mo tou alofa tumau ki ou tino, ko te fanau tena a Apelaamo mo Iakopo, e pela eiloa mo tau tautoga ki omotou tupuga i aso mua.