Read Te Tusi Tapu I Te Gana Tuvalu Lomiga Lua NAUMA 1 Bible Online

NAUMA 1 - Te Tusi Tapu I Te Gana Tuvalu Lomiga Lua bible

NAUMA 1

¹ Tenei te fekau mai te Atua e uiga ki a Nineva, se fakaasiga ne lavea ne Nauma, se tagata mai i te fenua ko Elekosi.

²A te Aliki te Atua e se alofa ki ona fili; E fakasala ne ia a latou kola e 'teke ki a ia. Ona ko tena kaitaua e toe taui atu ei ne ia ki a latou.

³A te Aliki e se vave ita kae e i a ia te mana malosi. Kae se fakasao ne ia te tino agasala. So se koga e sasale ei te Aliki, e agi i ei te afā; A kaumana, ko pefu kona e agina i ana vae!

⁴E fakatonu ne ia te moana, ko te mea loa ko masa pakupaku! E faka'masa ne ia a vaitafe. A fatoaga o Pasana ko lau mate'mate, Te mauga o Kalamelu ko lanu kena'kena, Mo pulalakau o Lepanona ko mage'mage.

⁵E galulu a mauga i mua o te Aliki; A mauga foki e liuvai i ona mua. A te laukele e gasuesue manafai e vau te Aliki; A te lalolagi mo tino katoa i ei ka pole'pole.

⁶Kafai e ita a ia, ko oi te tino e mafai o sao? Ko oi foki te tino e mafai o sao mai tena kaitaua fakamataku? E 'ligi atu tena ita lasi e pela me se ulaga afi; E liu lefu a kaupapa i ona mua.

⁷E lei te Aliki; e puipui ne ia ona tino i taimi o puapuaga; E tausi fakalei ne ia a latou kola e fuli mai ki a ia.

⁸E 'ta fakapalele ne ia ona fili, e pela mo te tafe malosi mai o te lofiaga;[1] E tamate ne ia latou kola e teke atu ki a ia.

⁹Ai a e mafaufau ei koutou o teke atu ki te Aliki? Ka fakamalaia ne ia koutou. E se mafai ne se tino o teke fakalua ki a ia.

¹⁰Ka sunu fakapalele eiloa koutou ki te afi, E pela mo lakau makaikai mo kau o saito ko pakupaku!

¹¹Ka ko koe e Nineva, e vau mai i a koe se tagata e fonu i mea masei, ko ia tela e mafaufau o teke atu ki te Aliki.

¹²Kae penei muna a te Aliki e fai atu ki tino Isalaelu: “E ui eiloa i te malosi mo te tokouke o tino Asulia, ka fakamalaia eiloa latou, ko galo atu ei latou. Toku fenua, ne fakapuapuaga ne au koutou, kae ka se toe fai eiloa ne au pena.

¹³Nei, ka fakagata ne au te pule a Asulia i luga i a koe, ka 'motu foki ne au a seni kola ne saisai ei koe.”

¹⁴Tenei te fakatonuga a te Aliki e uiga ki a Asulia: “Ka se toe ai ne olotou fanau e fakaola ei te olotou igoa. Ka ofa ne au a tupua i loto i faletapuaki o olotou atua. Ka fakatoka ne au se tanuga mo tino Asulia, e se tau o toe ola latou!”

¹⁵ Kiloke, a te avefekau e vau mai luga i te atu mauga mo te tala 'lei! Ko vau a ia i tena auala o folafola mai te manumalo! Tino Iuta, fai otou 'kaiga fiafia kae avatu ki te Atua a mea ne tauto atu ei koutou ki a ia. A tino amio masei ka se toe faitaua atu ki te otou fenua, me ko oti ne 'ta fakapalele!