Read Te Tusi Tapu I Te Gana Tuvalu Lomiga Lua NAUMA 2 Bible Online

NAUMA 2 - Te Tusi Tapu I Te Gana Tuvalu Lomiga Lua bible

NAUMA 2

¹Nineva, ko oko mai tou malaia! Ko oko mai te malosi tela ka fakamasei ne ia a koe. Tu i otou tulaga! Leoleo te auala! Fakatoka o taua!

²Ka toe fakafoki atu ne te Aliki te manuia ki a Isalaelu, e pela eiloa mo aso mua ka koi tuai o fakamasei ne ona fili.

³A sotia o te fili ka olo mo olotou talita lanu kula Kae pei foki ki togiga lanu kula! Ko fakatoka latou o tau! Ko olotou kaliota e ma'lapu e pela me ne afi! Olotou solofanua[2] foki ko se maua o taofi!

⁴A olotou kaliota ko tele valevale i auala lasi, Ko tele valevale i malae o te fa'kai. E ma'lapu pela me ne molisulu Kae makini e pela mo te uila.

⁵Ko kalagagina a ona tino maluga; ko fakatau siga i te olotou auala ki mua. Ne tele fakavave atu a te kau o te fili ki te pui, O fakatu se fale e lafi ei latou i te tukiga o te pui.

⁶A mataloa i tafa o te vaitafe ko maofa; A tino i te palesi ko ga'tete i te mataku.

⁷A te tupu fafine ko ave fakapagota; Ana tavini fafine ko tagi fanoanoa e pela mo lupe kae tuki olotou fatafata i te fanoanoa.

⁸A tino ko tele ki tua o Nineva, e pela me se vai e tafe mai i se vaisameni ko mafā! E ui eiloa e kalaga atu: “Tu mai! Tu mai!” Ka ko seai eiloa se tino e saga mai.

⁹Fao mālo a siliva mo aulo me I te fa'kai ko fonu i te maumea e se lausia!

¹⁰A Nineva ko malaia, ko lavaki, ko masei valevale! Ko liu suavai olotou loto i te mataku; A tulivae ko polepole, te malosi ko seai; A mata ko lau'tea.

¹¹Tefea nei te fa'kai tela ko te ana o leona, Te koga tela ne fagai sale ei a tamā leona, Te koga tela e olo sale ki ei a leona tagata mo leona fafine mo olotou punuā leona o lafi i ei?

¹²Ne 'ta sale ei foki ne te leona a manu, Kae saesae likiliki mo fagai tena avaga mo ana tama; E faka'fonu foki ne ia tena lua i kano o manu.

¹³Fai mai te Aliki Maluga: “Au ko tou fili! Ka sunu fakapalele ne au au kaliota. Ko au sotia ka mate i te taua, kae ka ave keatea a mea katoa kola ne 'fao malo ne koe mai i nisi fenua. Ka se toe lagona a tou malosi i te lalolagi.”