Read Te Tusi Tapu I Te Gana Tuvalu Lomiga Lua SAPAKUKA 1 Bible Online

SAPAKUKA 1 - Te Tusi Tapu I Te Gana Tuvalu Lomiga Lua bible

SAPAKUKA 1

¹Tenei te fekau tela ne fakaasi ne te Aliki ki te pelofeta ko Sapakuka.

²Te Aliki, afea e fakalogo mai ei koe ki aku talosaga mo se fesoasoani, o fakasao matou mai te fakasaua ne omotou fili?

³Ai a e fai ei ne koe ke lavea ne au a puapuaga kona? E mafai pefea ne koe o kufaki tou kilokilo atu ki faiga se tonu kona? A te fakamasei mo te fakasaua ko faivalevale i oku feitu, ka ko taua mo kinauga ko salalau i koga valevale.

⁴A te tulafono ko vaivai ka ko se aoga foki, ka ko te faimeatonu ko se fai. A tino amio 'tonu e faka'loiloigina fua ne tino amio masei, tela la, te fai mea tonu ko fuli 'se.

⁵ Ne faipati atu te Aliki ki ona tino penei, “Onoono faka'lei ki malo kona i otou feitu, me ka ofo koutou i mea e lavea ne koutou. Ka fai ne au se mea tela ka se talitonu ki ei koutou manafai e lagona ne koutou.

⁶ Ka fakamalosi ne au a tino Papelonia, tino fakama'taku kae se nofo 'toka. Ko ma'laga atu latou i loto i te lalolagi o puke malo a nisi fenua.

⁷E fai ne latou ke ma'taku valevale te lalolagi; a fakamasinoga mo tulafono a latou e faite eiloa ne latou.

⁸“A olotou solofanua e ma'kini atu i manu ko lepoti, kae fakama'taku atu i kuli vao fia'kai. A olotou tino faka'tele solofanua e tele mai fenua mao; a olotou solofanua e tukeli i luga i te laukele. E pela latou me ne aeto kola e eva ifo o afuli a manu mo olotou kai.

⁹“A olotou kautau ko olo ki mua o puke malo a fenua mo te saua, ka ko tino katoa ko ma'taku valevale manafai ko sae ake latou. A olotou pagota ko pela eiloa mo te uke o te one.

¹⁰Ko fakaseaoga ne latou a tupu, kae katakata ki tino maluga. E seai se olo e mafai o pono i olotou mua — e tanu ne latou a one i feitu o olo, ka kake ei ki luga o fao malo a te fa'kai.

¹¹Ka oti aka, ko latou eiloa ko olo; a te lotou atua ko te lotou malosi.”

¹²Te Aliki, koe ko te Atua mai te kamataga. Koe ko toku Atua, e tapu kae tumau ki te se gata mai. Te Aliki toku Atua mo toku puipuiga, ko oti ne fili ne koe a tino Papelonia kae fai ne koe ke malosi ko te mea ke fakasala ne latou a matou.

¹³Kae e mafai pefea ne koe o kufaki a amioga masei a tino konei? A koe ko to 'malu, e se tau o kilokilo ki amioga ma'sei kae se mafai o kilokilo ki faiga ma'sei a tino. Ai a la e nofo mu ei koe, ka ko latou konei e ta a tino e amiotonu atu i a latou?

¹⁴Ai a e fai ei ne koe a tino pela me ne ika io me e pela me ne mumuga sē kola e seai ne takitaki o fakatonutonu latou?

¹⁵E fakalave ne tino Papelonia a tino ki kafilo e pela me ne ika. E toso ne latou i tili kae ka'laga fiafia i olotou mea ne maua!

¹⁶E tapuaki foki latou ki olotou tili kae ofo taulaga ki ei, me e maua olotou mea gali mai olotou tili.

¹⁷E a, ka fakaaoga faeloa ne latou olotou pelu ki te se gata mai, kae tumau faeloa o ta fakapalele a malo mo te se alofa?