Read Te Tusi Tapu I Te Gana Tuvalu Lomiga Lua SAPAKUKA 2 Bible Online

SAPAKUKA 2 - Te Tusi Tapu I Te Gana Tuvalu Lomiga Lua bible

SAPAKUKA 2

¹Au ka kake ki luga i te taoa ke lavea ne au a nisi malo, kae o fakatalitali me se a te mea ka fai mai ne te Aliki ke faipati ne au, me se a foki tena tali[1] ki taku fakatagi.

²Tenei te tali a te Aliki ne tuku mai ki au: “Tusi faka'lei ki lalo i papa one a mea ka fakaasi atu ne au, ko te mea ke faitau gofie.

³ Tusi ki lalo, me e seki oko mai te taimi e fakataunu ei. A te taimi ka vave oko mai; a mea ne fakaasi atu ne au e taunu eiloa. E tuai o oko mai, kae fakatali eiloa ki ei. E oko mai eiloa, kae ka se tuai foki.

⁴ Kae tenei la te fekau: ‘A latou kola e amio masei ka se ola, ka ko latou kola e amiotonu ka ola, me i a latou e fakatuanaki ki te Atua.”’

⁵A te maumea se mea e faka'se tino. A tino fiafai mea e fakamata'mata kae se 'toka, e pela eiloa mo te mate e se mafai o malie. Tena te mea e puke fakasolosolo ne latou a malo mo latou.

⁶A tino kola ne taka'vale e fakalili kae fakamasei olotou mata ki tino kola ne o'mai o puke latou. Ka fai ake olotou pati penei, “E puke ne koutou a mea e se a koutou, ka ko koutou ko malaia! Ka gata afea te otou fia maumea, e fakasaua ei ne koutou a tino ne kaitalafu i a koutou ke na togi olotou kaitalafu?”

⁷Ka ko koutou kola ne fakatakavale ne koutou a nisi tino, ka poi koutou i a koutou ka nofo kaitalafu kae ka fai malo a koutou ke togi otou kaitalafu mo te pasene. Otou fili ka o'mai o fai koutou ke pole'pole kae 'ta koutou!

⁸Ko oti ne 'ta ne koutou a malo e uke, kae nei a latou kola e toe ka o'mai o 'ta koutou ona ko te tatino o koutou pela foki mo te saua o koutou ki tino mo fa'kai o te lalolagi.[2]

⁹Koutou ko malaia! Ne fakamaumea ne koutou otou kaiga ki mea ne fao malo ne koutou. Ne fai foki ne koutou otou fale ke saogalemu mai puapuaga!

¹⁰Ka ko otou fuafuaga ko aumai ei te masiasi ki otou kaiga. I te tāga ne koutou a malo e uke ko aumai fua ei ne koutou te masei valevale ki luga i a koutou.

¹¹Ke oko ki fatu o pui ko tagi ita ki a koutou, ka ko fuafua o fale e fakafoki mai ne latou te leo.

¹²Koutou ko malaia! Ne fakavae ne koutou te fa'kai i te agasala, kae atiake ne koutou i te tatino.

¹³A malo ne puke ne koutou ko fita i galuega se aoga, i mea ne faite ne latou ko 'ka katoa. Ko te Aliki Tafasili i te Malosi ne fai ne ia a mea kona.

¹⁴ Ka ko te lalolagi ka fonu i te poto o te mana o te Aliki, e pela mo te tai e fonu i te suatai.

¹⁵Koutou ko malaia! Mai te otou kaitaua ne fakaseaoga kae fakamasiasi ei ne koutou otou tuakoi. Ne fakatakasese ne koutou a latou e pela me ne tino konā.

¹⁶Ka oti aka, ko koutou ka masiasi kae ka se 'malu. A koutou ka inu kava kae takasese. Ko te Aliki ka fainu ne ia koutou ki te ipu o te fakasalaga, ka ko te otou 'malu ka fuli ki te masiasi.

¹⁷Ko oti ne kati ki lalo ne koutou te vao o Lepanona; kae nei, koutou ka 'ta ki lalo. Ne tamate ne koutou a manu i ei, kae nei koutou ka ma'taku i manu. Ka tupu te mea tenei ona ko te tatino ne fai ne koutou, e pela foki mo te fakasauaga ne koutou a tino mo fa'kai o te lalolagi.[3]

¹⁸Se a te aoga o tupua? Se mea fua ne faite ne tagata, kae seai se mea e mafai ne ia o fakamatala atu, na ko te loi fua. Se a te lei e maua ne te tino tela ne faite ne ia te tupua, ke talitonu a ia ki ei — me se atua fua e se mafai o faipati!

¹⁹Koutou ko malaia! Ne fai koutou ki te potu lakau penei, “Ala aka!” Io me ki se fatu, “Tu ki luga!” E a, e mafai ne se tupua o fakaasi atu se mea ki a koe? E ui eiloa e ufi ki siliva mo aulo, kae seai eiloa se ola i ei.

²⁰A te Aliki e nofo i tena Faletapu 'malu; ke filemu a tino katoa i te lalolagi i ona mua.