Read Te Tusi Tapu I Te Gana Tuvalu Lomiga Lua SEFANAIA 2 Bible Online

SEFANAIA 2 - Te Tusi Tapu I Te Gana Tuvalu Lomiga Lua bible

SEFANAIA 2

¹Te fenua matafatu, fakamasaala aka otou mafaufau,

²koi tuai koutou o mage'mage kae mate e pela me se pulalakau, koi tuai foki o oko mai a te kaitaua malosi o te Aliki, koi tuai o oko mai te aso ka fakaasi mai ei tena kaitaua fakamataku.

³Fuli mai ki te Aliki, koutou katoa tino loto malalo o te fenua, kola e faka'logo ki ana fakatonuga. Ke fai ne koutou a te mea tonu, kae olo atu koutou mo te loto malalo ki mua o te Aliki. E se taumate ka 'sao mai koutou mai te fakasalaga i te aso e fakaasi ei ne te Aliki tena ita.

⁴ Ka seai eiloa se tino e 'toe i te fakai lasi o Kasa. Ka tiakina foki ne tino a te fa'kai ko Asekelona. A tino Asetota ka afuli keatea i se āfa aso,[4] mo tino Ekelona foki ka afuli keatea mai te fa'kai lasi o latou.

⁵Ko malaia a koutou tino Filisitia, mo koutou foki tino kola e nofo i fa'kai e pili ki te tai. Ko oti ne fakaiku ne te Aliki te sala a koutou. Ka tamate ne ia koutou, kae ka seai eiloa se tino o koutou e 'toe mai.

⁶A te otou laukele tela e pili ki te tai ka fai mo koga ateatea e tu i ei a fale o tausi mamoe mo sai mamoe.

⁷A te fanauga a Iuta kola ka sao mai i te fakasalaga ka 'nofo i te otou fenua. Ka fagai a lafu mamoe a latou i te koga tena, kae moe latou i fale o tino Asekelona. A te Aliki te lotou Atua ka nofo fakatasi mo latou kae ka toe fakamanuia ne ia a latou.

⁸ Muna a te Aliki Malosi, “Ko oti ne lagona ne au te faifai muna mo muna fakaitaita a tino Moapi mo tino Amoni ki tino o toku fenua, kae fai foki muna fiasili me ka fao malo ne latou a te fenua ko Isalaelu mō latou.

⁹ E pela eiloa mo te mea e iloa ne koutou i a au ko te Atua ola o Isalaelu, au e tauto atu me i a Moapi mo Amoni ka fakamalaia ne au ke pela mo Sotoma mo Komolo. Ka fai a fenua kona mo lua masima kae ka tumau te se aoga o laua ki te se gata mai, i te mea ka tupu ake i ei a te vao mouku. A tino o toku fenua kola ka 'sao mai i te fakasalaga, ka fao malo ne latou olotou koloa kae puke a fenua kona mō latou.”

¹⁰Ka fakasala eiloa a tino Moapi mo tino Amoni pena ona ko te fakamatamata mo te fiasili o latou kae faifai muna foki ki tino o te Aliki Malosi.

¹¹Ka fakamatakutaku a latou ne te Aliki. Ka fai foki ne ia ke seai ne atua o te lalolagi, ka ko tino o malo katoa ke tapuaki atu ki a ia, i olotou fenua eiloa.

¹² A te Aliki ka ta foki ne ia a tino Sutana ke mate.

¹³ Ka fakaaoga ne te Aliki a tena mana o fakamasei a te fenua ko Asulia. Ka fai foki ne ia a te fakai ko Nineva ke lavaki, ke seai foki ne vai i ei.

¹⁴Ka fai te koga tena mo koga ka 'moe i ei a pulumakau mo mamoe, ke oko eiloa ki vaega manu kesekese katoa. A lulu ka nofo tumau i ona koga ne maofa kae tagitagi mai i ona fakamalama. [5] Ko manu eva ko leveni ka tagitagi mai i ona mataloa. Ka tapale keatea ne tino a laupapa ko alasi mai i fale i kona.

¹⁵Tena eiloa te mea ka tupu ki te fa'kai lasi ko Nineva tela ne fakamatamata ona ko tena malosi, kae mafaufau i a ia e sao 'lei. E mafaufau foki ona tino me i te fa'kai o latou ko te toe fa'kai lasi eiloa i te lalolagi. Kalofa eiloa me ka fai a ia mo se koga sili i te masei, se koga tela ka moe i ei a manu vaefa o te vao. So se tino tela e fakasili i ona tafa ka poi i te mataku!