Read Te Tusi Tapu I Te Gana Tuvalu Lomiga Lua SEFANAIA 3 Bible Online

SEFANAIA 3 - Te Tusi Tapu I Te Gana Tuvalu Lomiga Lua bible

SEFANAIA 3

¹Ielusalema ko malaia, te fa'kai amio masei kae se fakalogo, kae fakapologa foki ne ia ona tino.

²Ne seki fakalogo foki a ia ki te Aliki, seki talia foki ne ia tena akoakoga. Ne se fakatuanaki a ia ki te Aliki io me fakamolemole atu ki a ia mō se fesoasoani.

³A ona tino maluga ko pela mo ne leona fe'kai, mo ona famasino ko pela me ne kuli vao fiakai, ko se mafai ne latou o tiakina se pogaivi ki te sua aso ona ko to lasi a te kaimanako.

⁴A pelofeta ne tino se fakatuanakigina kae fonu i te fai togafiti masei; ko faitaulaga ko soli ne latou a te mea tela e tapu, kae fuli sē aka foki a te tulafono a te Atua mō te lei o latou.

⁵Ka ko te Aliki tenei eiloa e nofo i te fa'kai; e fai faeloa ne ia a te mea tonu, kae seai se mea 'se. I taeao katoa, e fai faeloa ne ia a te fakamasinoga tonu ki tena fenua. Kae e ui eiloa i te mea tena, a tino amio masei i te koga tena e tumau eiloa o fai amioga se tonu kae e se ma foki i ei.

⁶Muna a te Aliki, “Ko oti ne solo keatea ne au a malo lasi ke seai; ko oti foki ne fakamasei ne au olotou fa'kai lasi, mo pui mo olotou taoa ko malepelepe katoa. A fakai 'lasi ko tuku tiakina ne tino, a auala ko lavaki, me ko seai eiloa se tino e toe mai.

⁷Au ne manatu ifo pela, kaati la toku fenua ka maua ne latou se agaga āva ki a au kae talia ne latou taku akoakoga, kae ka se puli lele i a latou[6] a te pogai ne akoako ei a latou ne au. Kae ne seki leva foki, ko toe fai foki ne latou a amioga ma'sei.”

⁸Muna a te Aliki, “Faitali malie, faitali ki te aso tela ka fakasala ei ne au a malo. Ko tonu eiloa i a au me ka puke fakatasi ne au a fenua mo malo, ko te mea ke lagona ne latou a te malosi o toku kaitaua. A te lalolagi katoa ka fakamaseigina ne te afi o toku kaitaua fakamataku.

⁹“Ka fuli ne au a loto o tino i fenua, kae ka talo mai latou ki a au fua eiloa, kae se ki nisi atua. A latou ka fakalogo eiloa ki a au.

¹⁰Me pefea a te 'mao o Sutana, ka ko oku tino kola e nofo i ei ka aumai ne latou a taulaga ki a au.

¹¹A koutou toku fenua, i te taimi tena, e se tau mo koutou o 'ma ona ko te tekemaiga o koutou ki a au. Ka ave ne au keatea a tino katoa kola e fakamatamata kae fiasili, kae ka se toe teke lele mai a koutou ki a au i toku mauga tapu.

¹²Ka tuku ne au i te koga tena ko tino fua kola e loto maulalo mo te filemu, kola ka o'mai ki a au mō se fesoasoani.

¹³ A tino Isalaelu kola e 'sao mai ka fai ne latou mea tonu ki so se tino, ka se pati 'loi io me taumafai o fakaloiloi a tino. Ka manuia kae nofo 'lei latou, kae ko se ma'taku foki ki so se tino.”

¹⁴Usu pese kae ka'laga fiafia, koutou tino Isalaelu! Fiafia mo te loto kātoa, koutou tino Ielusalema!

¹⁵Ko oti ne fakagata ne te Aliki a tou fakasalaga; Ko oti foki ne ave keatea ne ia a otou fili katoa. A te Aliki, te tupu o Isalaelu, ko fakatasi ki a koutou; E seai se mea e toe ma'taku koutou ki ei,

¹⁶Ko oko mai te taimi e faipati ake latou ki a Ielusalema, “Sa ma'taku, a koutou tino i te fa'kai o Siona! Sa fakagavalivali otou lima!

¹⁷I te Aliki te otou Atua ko fakatasi mo koutou, Ko tena mana e maua ei ne koutou a te manumalo. A te Aliki ka saga atu ki a koutou mo te fiafia, Kae ona ko tena alofa ka maua ei ne koutou te ola fou.[7] Ka usu pese a ia kae loto fiafia ona ko koutou,

¹⁸E pela eiloa mo tino e nofo i se 'kaiga fiafia.” Muna a te Aliki, “Ko oti ne fakagata ne au te fakamataku o te fakasalaga, Kae ave foki keatea mai a koutou te masiasi.

¹⁹Ko oko mai te taimi Tela ka fakasala ei ne au a otou fili saua; Ka fakaola ne au a tino 'pili katoa, Kae fakafoki mai a tino ne fakatafea ki olotou kaiga. Ka 'fuli ne au te masiasi o latou ki te malu, Ka ko te lalolagi katoa ka tavae ki a latou.

²⁰Ko oko mai te taimi Tela ka faka'foki mai ne au otou tino kola ne salalau; Ka fai ne au a koutou ke takutakua i te lalolagi katoa Kae ke toetupu olaola mo te manuia.” Kona pati a te Aliki.