Read Te Tusi Tapu I Te Gana Tuvalu Lomiga Lua HAKAI 1 Bible Online

HAKAI 1 - Te Tusi Tapu I Te Gana Tuvalu Lomiga Lua bible

HAKAI 1

¹ I te lua o tausaga ne tupu ei a Taliu i Pelesia, i te aso muamua o te ono o masina, ne faipati mai ei te Aliki ki te pelofeta ko Hakai. Ka ko tena fekau ne fakasino tonu eiloa ki te kovana o Iuta ko Selupapelu, te tama a Salatielu, mo te Faitaulaga Pule ko Iosua te tama a Iosataka.

²A te Aliki Malosi ne faipati mai penei ki a Hakai, “A tino konei e manatu ifo pela, me e se tenei te taimi tonu ke toe fakatu ake ei a te Faletapu.”

³Tena te mea ne aumai ei a te fekau a te Aliki ki tino, kae ne auala mai i te pelofeta ko Hakai, e penei:

⁴“Toku fenua, ai a e nofo ei koutou i fale gali kae tenei toku Faletapu e takato malepelepe fua?

⁵E se lavea ne koutou a te mea tenei ko tupu ki te otou fenua?

⁶E uke a saito ne toki ne koutou, kae mutana fua a otou mea ne maua mai i ei. E isi foki ne otou meakai, kae se makona koutou i ei. E isi ne otou uaina, kae se konā koutou i ei! E isi otou lavalava, kae se lava mo fakamafanafana otou foitino. A te tino galue foki e se lava te tausiga o tena ola i tena togi.

⁷E a, e se lavea ne koutou me ai a ne tupu ei a te mea tenei?

⁸Olo nei koutou ki luga o mauga, kati mai a lakau, kae toe faite te Faletapu; ko au ke fiafia kae ke tapuaki mai foki koutou ki a au, me se mea tau eiloa.

⁹“A koutou ne fakamoemoe ki taukai 'lasi, kae maua ake nei ne taukai foliki fua. I te taimi e laku mai ei ne koutou te taukai ki otou kāiga, kae ka fue ne au keatea.[1] Ai a ne fai ei pena ne au? Ne fai pena, me ko saga ifo eiloa koutou o faite otou fale, kae tiaki eiloa toku Faletapu ke malepe.

¹⁰Tena te mea e seai ei ne vaiua kae se ola foki a lakau.

¹¹Ko aumai ne au te tau lā ki te fenua ke oko foki eiloa ki ona mauga, fatoaga, togavine mo togaolive, ke oko ki lakau 'fua katoa o te laukele, e pela foki ki tino mo manu vae fa, ke oko eiloa ki mea katoa e toki ne koutou.”

¹²Tena la, a Selupapelu mo Iosua mo tino katoa kola ne foki mai i te tafeaga [2] i Papelonia, ne fai ne latou a mea kola ne fai mai ei te Aliki te olotou Atua ke fai. A tino ne ma'taku kae faka'logo ki te pelofeta ko Hakai, ko te avefekau tena a te Aliki.

¹³Ne taku atu ne Hakai ki tino a te fekau tenei a te Aliki: “Au ka fakatasi atu ki a koutou, ko taku feagaiga eiloa tena.”

¹⁴Ne fakatupu ne te Aliki te loto fiafia ki tino takitokotasi ke galue i te Faletapu: ko Selupapelu te kovana o Iuta, Iosua te Faitaulaga Pule, mo tino katoa kola ne 'foki mai i te tafeaga.[3] Ne kamata te galuega ki te Faletapu o te lotou Atua, tela ko te Aliki Malosi,

¹⁵i te po luasefulu fa o te ono o masina, i te lua o tausaga ne tupu ei a Taliu.