Read Te Tusi Tapu I Te Gana Tuvalu Lomiga Lua HAKAI 2 Bible Online

HAKAI 2 - Te Tusi Tapu I Te Gana Tuvalu Lomiga Lua bible

HAKAI 2

¹Ko te po luasefulu tasi o te fitu o masina i te tausaga eiloa tena, ne toe faipati mai ne te pelofeta ko Hakai a te fekau a te Aliki.

²Ne fai mai te Aliki ki a Hakai ke faipati atu ki a Selupapelu, te kovana o Iuta, mo Iosua te Faitaulaga Pule, e pela foki mo tino o te fenua ke fai atu ki a latou penei,

³ “E isi na se tino i a koutou koi masaua ne ia a te gali o te Faletapu mua? E a, se a nei te kilo a koutou ki ei? Ko seai eiloa se gali o ia.

⁴Tela la, mo a eiloa se tino i a koutou e loto vaivai. Fai te galuega, me i a au e fakatasi atu ki a koutou.

⁵ I te taimi ne o'mai ei koutou mai Aikupito, au ne tauto atu me ka fakatasi eiloa au ki a koutou. Au nei e fakatasi faeloa mo koutou, tela la, sa ma'taku.

⁶ E se toe 'mao nei kae ka lulu ne au a te lagi mo te lalolagi, e pela foki te laukele mo te tai.

⁷Ka fakatakavale ne au a malo katoa, ka ko olotou koloa tāua ka laku mai ki konei ke faka'fonu ei te Faletapu.

⁸A siliva mo aulo katoa o te lalolagi e aku.

⁹A te Faletapu fou ka gali atu i te Faletapu mua, kae mai i kona ka tuku atu ei ne au ki toku fenua a te manuia mo te filemu.” Kona muna a te Aliki Malosi.

¹⁰I te po luasefulu fa o te iva o masina, i te lua o tausaga ne tupu ei a Taliu, a te Aliki Malosi ne toe faipati ki te pelofeta ko Hakai.

¹¹Ana muna, “Fesili atu ki faitaulaga ki se tulafono e fakasino ki te mea tenei:

¹²Kafai e ave ne se tino i te peluga o tena gatu loa, se kogā kano o te manu tela ko oti ne fakatapu ke fai mo taulaga; kae kafai la ko patele a tena gatu ki se falaoa ko paku, me ko te uaina me se sinu olive, io, me ko nisi vaega meakai valevale; e mafai o tapu a mea kona?” I te otiga o te fesili tena, ka ko faitaulaga ne tali atu penei, “Ikai, e se mafai.”

¹³ Tena fesili atu ei Hakai penei, “Kafai la ko lailai se tino mai tena pukega ki se foitino o tino mate, ka ko vau o fakapatele ki so se mea i meakai konei. E a, e lailai foki a meakai kona?” Ne tali atu a faitaulaga, “Ao, e lailai.”

¹⁴Tena fai atu ei Hakai ki a latou penei, “Muna a te Aliki, me e pena a tino o te fenua nei, ke oko eiloa ki mea e fai ne latou; tela la, a mea katoa kola e ofo mai ne latou i luga o te fata-fai-taulaga ko fakamaseigina katoa.”

¹⁵Muna a te Aliki, “E a, e se matea ne koutou a te mea tenei e tupu i a koutou? I te taimi ne kamata ei ne koutou te fakatuga o te Faletapu,

¹⁶ne olo koutou ki se fakatupuga saito mo te fakamoemoega ke maua mai ei te luaselau kilokalame, kae fai ake nei, e selau fua ne maua. Ne olo foki koutou o asu mai se selau lita o sua vine mai se tani, kae e fasefulu fua lita ne maua ne koutou.

¹⁷Ne tuku atu ne au te matagi vela mo te vaiua fatu ke fakamasei valevale a mea katoa kola ne taumafai ki ei koutou o 'toki, kae tela la, e se sala'mo eiloa koutou.

¹⁸A te aso tenei ko te po luasefulu fa o te iva o masina, ko te aso tela ko oti lei ei a te fakavae o te Faletapu. Onoono faka'lei me se a te mea ka tupu mai i te taimi tenei ke oko ki aso konei mai mua.

¹⁹E tusa eiloa me ko seai nei ne saito e toe, kae seki fua mai foki a vine mo mati mo limoni mo togā olive, kae nei, ka fakamanuia koutou ne au.”

²⁰I te aso foki eiloa tena, i te po luasefulu fa o te masina, ne tuku atu ne te Aliki ki a Hakai a te lua o fekau ki a

²¹Selupapelu, te kovana o Iuta, e penei: “Kafai nei o lūlū ne au a te lagi mo te lalolagi

²²ka fakatakavale ne au a tupu o malo kae ka fakagata foki ne au a olotou malosi, ka 'fuli ne au ki lalo a kaliota fakatasi mo olotou tino fakateletele; a solofanua ka mate, ka ko tino e sopo i ei ka fakatau taua eiloa i a latou.

²³I te aso tena, ka fakasopo ne au koe, e Selupapelu taku tavini, ke pule i toku igoa. Ko koe eiloa te tino tela ko oti ne filifili ne au.” Kona muna a te Aliki Malosi.