Read Te Tusi Tapu I Te Gana Tuvalu Lomiga Lua SAKALIA 10 Bible Online

SAKALIA 10 - Te Tusi Tapu I Te Gana Tuvalu Lomiga Lua bible

SAKALIA 10

¹Fakatagi atu ki te Aliki ki ne vaiua, i te tau muakiga. Ko te Aliki e aumai ne ia a kaumana vaiua mo vaiua, e fakalauusiusi ei a fatoaga mō tino katoa.

² A tino e olo ki tupua mo tino poto i te fakamatalaga o mea ka tupu, ka ko tali e maua ne latou, ne tali loi kae se aoga. A nisi tino e fakamatala miti, kae e faka'se fua ne latou a koutou; a pati fakamafanafana a latou e se aoga. Tela la, a tino ko takase'se fua e pela me ne mamoe ko galo. Ko se iloa ne latou o fai se mea, me ko seai se olotou takitaki.

³Muna a te Aliki, “Au ko kaitaua ki tino fakaatea kola e pule ne latou oku tino, kae ka fakasala ne au a latou. A tino o Iuta e oku, kae ko au, te Aliki Tafasili i te Malosi, e tausi ne au a latou. Ka fai latou mo aku solofanua tau ma'losi.

⁴Mai i loto i a latou, ka sae mai a tino pule, takitaki, mo pule o taua, ko latou e fakatonutonu ne latou toku fenua.[9]

⁵A tino o Iuta ka manumalo, e pela me ne sotia e lakalaka ne latou olotou fili i lalo i pela o auala. Ka toka latou o taua, me i te Aliki e fakatasi mo latou, kae ka faka-takavale eiloa ne latou a olotou fili kola i luga o solofanua.

⁶“Ka fai ne au a Tino o Iuta ke mafi; Ka fakasao ne au a tino Isalaelu. Ka alofa au ki a latou Kae toe fakafoki mai latou ki te lotou fenua. Ka nofo latou e pela eiloa me seki ita au ki a latou. Au ko te Aliki te lotou Atua; kae ka tali atu au ki olotou talo.

⁷A tino o Isalaelu ka mafi pela me ne sotia, Kae fiafia e pela me ne tino ne inu i uaina. Ka masaua ne olotou fanau te manumalo tenei Kae ka fiafia ki mea ne fai ne te Aliki.

⁸“Au ka kalaga ki oku tino Kae fakamaopoopo fakatasi ne au a latou. Ka fakasao ne au a latou Kae fakatokouke e pela eiloa mo aso taumua.

⁹E ui eiloa ne fakasalalau ne au a latou ki malo kesekese Kae i koga mao eiloa e masaua eiloa ne latou a au. A latou mo olotou tama ka sao, Kae toe foki tasi eiloa ki olotou fenua.

¹⁰Ka aumai ne au a latou mai Aikupito mo Asulia O faka'nofo i te lotou fenua eiloa. Ka faka'nofo ne au a latou i Kileata pela foki i Lepanona; A te fenua katoa ka fonu eiloa i tino.

¹¹I te taimi ne ulu ei latou i loto i te tai fakamataku, Ko au, te Aliki, ka kini ne au a galu, ko te Naila eiloa ka masapakupaku. A Asulia fakamatamata ka fakamasiasi, Ka ko Aikupito malosi ka seai sena malosi.

¹²Ka fai ne au oku tino ke mafi; Ka tapuaki kae faka'logo latou ki a au.” Kona pati a te Aliki.