Read Te Tusi Tapu I Te Gana Tuvalu Lomiga Lua SAKALIA 14 Bible Online

SAKALIA 14 - Te Tusi Tapu I Te Gana Tuvalu Lomiga Lua bible

SAKALIA 14

¹A te aso o te Aliki ko pili o oko mai. I te aso tena, a Ielusalema ka fakamaseigina ka ko mea taua kola ne maua mai i ei ka vaevae i otou mua.

²Ka tuku fakatasi ne te Aliki a malo katoa o tau ki Ielusalema. A te fa'kai ka puke, a mea taua i loto i fale ka fao malo, ka ko fafine ka puke malo. A te afa o te fenua ka ave fakapagota, ka ko te sua afa ka nofo eiloa i te fenua.

³Ka oti aka, ko te Aliki ka fano o taua ki malo kona, e pela eiloa mo aso mua.

⁴I te taimi tena, ka tu a ia i luga i te Mauga o Olive, i te feitu ki te saegala o Ielusalema. Tena, ka vaelua te Mauga o Olive mai te saegala ki te togala, ne te vanu i te kogaloto. A te afa o te mauga ka gasue ki matu ka ko te sua afa ki saute.

⁵Ka sola koutou i loto i te vanu tenei, tela e vaelua ne ia te mauga tenei. Ka sola koutou e pela mo otou tupuna i te taimi ne poko ei te mafuie i aso o te tupu o Iuta ko Usia. Ka vau te Aliki toku Atua mo ana agelu katoa.

⁶Ka oko mai te taimi tena, ka se toe ai se moko mo afusaga moko,[14]

⁷ka se toe ai foki se pouliga. Ka ao faeloa, e tusa foki eiloa manafai ko te taimi o te po. Ko te Aliki fua e iloa ne ia te taimi e tupu ei te mea tenei.

⁸ Ka oko mai te aso tena, a te vai ka 'tafe mai i Ielusalema. A te afa o ia e tafe ki te Tai Mate, ka ko te sua afa ki te Tai Metitilani. Ka tafe faeloa i te tausaga katoa, i te tau vela e pela foki i te tau moko.

⁹Tena, ka fai ei te Aliki mo tupu i te lalolagi katoa; a tino katoa ka tapuaki ki a ia me ko te Atua, kae ka iloa foki ne latou a ia i te igoa tena.

¹⁰A te koga tela mai Kepa i matu ke oko ki Limoni i saute ka fakalaugatasi. A Ielusalema ka maluga atu i fenua i ona feitu; a te fa'kai ka vau mai te Mataloa o Peniamina ke oko ki te Mataloa o Matulimanu, tela ne isi ei se mataloa muamua. E vau foki mai te Taoa o Hananelu ke oko ki te koga faite uaina a tupu.

¹¹ Ka nofo ei a tino i kona mo te filemu, ko se toe ma'taku i te malaia.

¹²Ka aumai ne te Aliki se famai fakamataku ki malo kola e faitaua ki Ielusalema. A olotou 'kano ka pala kae koi ola mai eiloa latou; a olotou mata mo olotou alelo ka pala foki.

¹³I te taimi tena, ka faka'numi ne te Aliki olotou mafaufau, tela ko ma'taku ei latou kae fakatau ta i a latou eiloa.

¹⁴A tagata o Iuta ka tau atu o pulu a Ielusalema. Ka pule ne latou a koloa o malo katoa — ko aulo, siliva mo gatu e uke.

¹⁵A te masaki fakamataku ka oko atu foki ki solofanua, ki miula, kamela mo asini mo manu vaefa katoa kola i te koga e nofo ei olotou fili.

¹⁶ A tino katoa kola e toe mai i malo kola ne faitaua ki Ielusalema ka olo sale ki te koga tena i tausaga takitasi, o tapuaki ki te Aliki Tafasili i te Malosi, i a ia ko te tupu, kae fakamanatu foki ne latou a te Kaiga Fiafia o Fale Fakamalumalu.

¹⁷Kafai e isi se malo e se talia ne ia o tapuaki atu ki te Aliki Tafasili i te Malosi, me ko te tupu, ka seai se vaiua e to i te lotou fenua.

¹⁸Kafai e se talia ne tino Aikupito ke fakamanatu a te Kaiga o Fale Fakamalumalu, ka fakaoko ne te Aliki ki a latou te famai tela ka aumai ne ia ki malo katoa kola e ita ma olo.

¹⁹Tena te fakasalaga ka oko ki luga i Aikupito pela foki ki nisi malo katoa aka foki, manafai e se fakamanatu ne latou a te Kaiga o Fale Fakamalumalu.

²⁰I te taimi tena, a pēle i luga i solofanua ko tusi i ei a pati konei, “E fakatapu mo te Aliki.” A ulo tunu meakai i te Faletapu ka malu e pela mo pola i mua o te Fatafaitaulaga

²¹A ulo tunu meakai katoa i Ielusalema mo Iuta kātoa ka tuku fakaatea ke fakaaoga mō tapuakiga ki te Aliki Tafasili i te Malosi. A tino kola e ofo atu a taulaga ka fakaaoga ne latou a ulo mo tunu ei a kano manu o taulaga. Kafai e oko mai te taimi tena, ka se toe ai ne tino faimeatogi i te Faletapu o te Aliki Tafasili i te Malosi.