Read Te Tusi Tapu I Te Gana Tuvalu Lomiga Lua SAKALIA 3 Bible Online

SAKALIA 3 - Te Tusi Tapu I Te Gana Tuvalu Lomiga Lua bible

SAKALIA 3

¹ I te sua fakaasiga, ne fakaasi mai ne te Aliki ki a au a te Faitaulaga Sili tela ko Iosua, e tu i mua o te agelu a te Aliki. I tafa o Iosua e tu ei a Satani,[1] tela ko toka o 'moli a ia.

² Muna a te agelu a te Aliki[2] ki a Satani, “Satani, ke fakamalaia koe ne te Aliki! A te Aliki tela e alofa ki Ielusalema, ke fakamalaia ne ia a koe. A te tagata tenei e pela me se potu lakau ko tapale keatea mai i loto i te afi.”

³A Iosua e tu eiloa i mua o te agelu a te Aliki mo ona gatu lailai.

⁴Muna a te agelu ki nisi agelu kola e tu i ona tafa, “Ave keatea a gatu lailai konei e pei ei te tagata tenei.”Fai atu ei a ia ki a Iosua penei, “Ko oti ne ave keatea ne au au agasala, kae ka tuku atu ne au ki a koe ne gatu fou mo ou pei.”

⁵Ne fakatonu foki ne te agelu a te Aliki a nisi agelu ke tuku se pulou laugatu 'ma ki te ulu o Iosua. Ne tau'tali eiloa latou i te fakatonuga, oti aka, fakapei atu ei ne latou ana gatu fou, ka ko te agelu a te Aliki e tu mai eiloa i kona.

⁶Tela ne fai mai ei te agelu a te Aliki ki a Iosua, i te Aliki Tafasili i te Malosi ko oti ne fai ana pati penei:

⁷“Kafai e fakalogo koe ki aku tulafono kae fai a galuega kola ne tuku atu ne au ke fai, ka tumau eiloa tau pule i toku Faletapu mo ana koga tapuaki, kae ka talia ne au au talosaga, e pela eiloa mo te talia ne au a talosaga a aku agelu i oku tafa.

⁸ Iosua, tela ko te Faitaulaga Pule, fakalogo mai, pena foki koutou ana faitaulaga kola ko fakailoga o te 'lei o aso fakamuli: Ka fakaasi atu ne au taku tavini, tela e fakaigoa ki Te Kaula!

⁹Ka tuku ne au i mua o Iosua se fatu e tasi kae fitu ona feitu. Ka lomi ne au se fakailoga i ei, kae i te aso e tasi ka ave keatea ne au a agasala a te fenua tenei.

¹⁰ Kafai e oko mai te aso tena, ka kami ne koutou otou taugasoa ke o'mai o nofo i te filemu, te fiafia mo te saogalemu, kae fakatamilo ne togā‐mati mo toga‐vine.