Read Te Tusi Tapu I Te Gana Tuvalu Lomiga Lua SAKALIA 6 Bible Online

SAKALIA 6 - Te Tusi Tapu I Te Gana Tuvalu Lomiga Lua bible

SAKALIA 6

¹Ne toe oko mai te sua fakaasiga ki a au. I taimi nei, ne lavea ne au a kaliota e fa e ulu mai ki tua i te vaaga o mauga palasi e lua.

² A te kaliota muamua e toso ne solofanua kula, te lua e toso ne solofanua uli,

³ te tolu e toso ne solofanua kena, ka ko te fa e toso ne solofanua pule'pule.

⁴Tena ne fesili atu ei au ki te agelu penei, “Tou malu, se a te uiga o kaliota konei?”

⁵ Muna a ia, “A kaliota kona ko matagi kola e fa; ko fatoa ma'taga mai eiloa latou mai mua o te Aliki o te lalolagi katoa.”

⁶A te kaliota tela e toso ne solofanua uli e fano pela ki matū i Papelonia, a te kaliota tela e toso ne solofanua kena e fano ki te togala, ka ko te kaliota tela e toso ne solofanua pule'pule e fano ki te fenua i saute.

⁷I te ulumaiga o solofanua pule'pule ki tua, ko se maua eiloa o taofi te fia olo o latou o asiasi te lalolagi. Muna a te agelu, “Olo o asiasi atu te lalolagi!” — tela olo eiloa latou.

⁸Ne pakalaga mai a te agelu ki a au penei, “A solofanua kola ne olo ki matu i Papelonia ko oti ne fakamāmā ne latou te kaitaua o te Aliki.”

⁹Tenei te fekau ne tuku mai ne te Aliki ki a au.

¹⁰Muna a ia, “Puke a meaalofa kola ne aumai ne Heletai, Topita mo Ietaia, tino kola ne ave fakapagota, kae fano fakavave ki te fale o Iosia, te tama a Sefanaia. A tino katoa konei ko oti katoa ne foki mai i te tafeaga i Papelonia.

¹¹Faite se kalauna ki siliva mo aulo kola e aumai ne latou, kae tuku atu ki te ulu o te Faitaulaga Pule, tela ko Iosua, te tama a Iosataka.

¹² Fai ki a ia i te Aliki Tafasili i te Malosi ne fai mai penei, ‘A te tagata tela e fakaigoa ko Te Kaula ka tupu olaola a ia i te koga e nofo ei a ia, kae ka toe fakatu ne ia a te Faletapu o te Aliki.

¹³Ko ia tena ka faite ne ia a te Faletapu, kae ka maua foki ne ia te fakaaloaloga e 'tau fua ki te tupu, kae ka pule ne ia ona tino. E isi se faitaulaga ka tu i tafa o tena nofogaaliki, kae ka ga'lue fakatasi laua mo te fealofani.’

¹⁴A te kalauna ka fai mo mea fakamanatu i te Faletapu o te Aliki, e fakamanatu ei a tino konei: Heletai,[5] Topita, Ietaia mo Iosia.”[6]

¹⁵A tino kola e nofo mao ka o'mai o fesoasoani ki te faitega o te Faletapu o te Aliki. Kae kafai ko toe faite, ka iloa ei ne koe i a au ne uga mai ne te Aliki Tafasili i te Malosi. Ka taunu katoa a mea konei manafai e tausi faka'lei koe ki fakatonuga a te Aliki tou Atua.