Read Te Tusi Tapu I Te Gana Tuvalu Lomiga Lua SAKALIA 7 Bible Online

SAKALIA 7 - Te Tusi Tapu I Te Gana Tuvalu Lomiga Lua bible

SAKALIA 7

¹I te fa o tausaga ne tupu ei Taliu, kae i te fa o aso o te iva o masina, te masina o Kisilevu, ne tuku mai ei ne te Aliki te fekau ki a au.

²Ko oti ne uga ne tino o Peteli a Salesa mo Leikimeleki mo olotou tino ki te Faletapu o te Aliki Tafasili i te Malosi, o talo mō se fakamanuiaga mai i a ia

³kae ke fesili atu foki ki faitaulaga mo pelofeta te fesili tenei: “E a, ka tumau faeloa tatou o tagi fanoanoa i te maofaga o te Faletapu, o fakaliki'liki i te lima o masina e pela eiloa mo te mea ne masani o fai ne tatou i tausaga e uke ko teka ke oko mai ki te taimi nei?”

⁴Tenei te fekau a te Aliki tela ne oko mai ki a au.

⁵Muna a ia, “Fai atu ki tino o te fenua mo faitaulaga me i taimi ne fakaliki'liki sale ei latou i te lima mo te fitu o masina, i tausaga e fitusefulu konei ko teka, ne seki fai ne latou mo te āva mai ki a au.

⁶Kae i taimi e kai kae inu ei latou, mō te lotou lei eiloa.”

⁷Konei a pati a te Aliki ne fai ki pelofeta taumua, i te taimi ne maumea malosi ei Ielusalema kae fonu i tino; i te taimi ne tokouke malosi ei a tino e nofo i fakai fo'liki, i tafa o te fa'kai lasi, e pela foki i te feitu ki saute o te fenua, ke oko eiloa ki tafito mauga i te togala.

⁸Tenei te fekau ne tuku mai ne te Aliki ki a Sakalia:

⁹“I aso mua eiloa, ne tuku atu ne au a fakatonuga konei ki oku tino: ‘Masaua ke fai faeloa ne koutou te mea tonu; fakatau a'lofa kae fai faka'lei te tino ki sua tino.

¹⁰Sa fakapuapuagagina a fa'fine ko seai ne avaga, io me ko tamaliki ko seai ne matua, ke oko atu eiloa ki tino fakaatea kona e nofo tasi koutou, io me so se tino puapuaga. Sa fai foki ne fuafuaga ma'sei e malaia ei a nisi tino.’

¹¹“Ka ko oku tino ne ita eiloa ma faka'logo. Ne pono olotou mafaufau

¹²kae fakama'keke olotou loto e pela me ne fatu. Au ne kaitaua malosi me ne seki fia faka'logo ki aku akoakoga kola ne fakaoko atu ne pelofeta kola ne ola i aso taumua eiloa.

¹³Ne seki tali au ki talosaga a latou me ne seki fakalogo latou ki taku faipatiga.

¹⁴E fue ne au a latou keatea e pela me se afā ke nofo i fenua fakaatea. A te fenua gali tenei ko lavaki, ko seai se tino e nofo i ei.”