Read Te Tusi Tapu I Te Gana Tuvalu Lomiga Lua SAKALIA 8 Bible Online

SAKALIA 8 - Te Tusi Tapu I Te Gana Tuvalu Lomiga Lua bible

SAKALIA 8

¹Tenei te fekau ne tuku mai ne te Aliki Malosi ki a Sakalia:

²“Au ko leva ne manako o fesoasoani ki Ielusalema, me i au e alofa malosi ki ona tino a toku alofa ko to lasi mo Ielusalema tela ko fai ne ia a au ke ita ki ona fili.

³Au ka toe foki ki Ielusalema, toku fa'kai tapu, o nofo i ei. Ka iloa ne tino me ko te fa'kai fakamaoni, ka ko te mauga o te Aliki Tafasili i te Malosi ka fakaigoa ko te mauga tapu.

⁴A toeaina mo loma'tua kola ko to ma'tua, kae ko fakaaoga ne latou a tokotoko mo olotou sasale, ka toe matea atu ke sagasaga i koga sautala o te fa'kai.

⁵Ka ko auala ka toe fonu i tamaliki tagata mo tamaliki fafine e tafao.

⁶“Se taumate, te mea nei e tai faigata ki tino o te fenua konei koi toe, kae e se faigata lele eiloa ki a au.

⁷Ka fakasao ne au a oku tino mai fenua kola ne ave fakapagota ki ei latou,

⁸kae ka toe aumai ne au a latou mai te saegala mo te togala ke nofo i Ielusalema. Ka fai latou mo oku tino, ka ko au ka fai mo olotou Atua, o pule i luga i a latou mo te fakamaoni mo te fai mea tonu.

⁹“Ke 'toa otou loto! Ko toe lagona nei ne koutou a pati kola ne faipati foki ne pelofeta i aso ne fakatakato ei te fakavae ke toe faite toku Faletapu.

¹⁰Mai mua o te taimi tena, e seai se tino e mafai o togi ne ia se tino io me se manu ke fakagalue ne ia i se taimi toetoe, e seai foki se tino e sao mai ona fili. Ne fai ne au a tino ke fakatau taua eiloa i a latou.

¹¹Kae nei, ko kese aku faifaiga ki tino o te fenua nei kola koi ola mai.

¹²Ka toki olotou lakau kaina mo te filemu. A olotou vine ka fua mai, ka ola mai a lakau kaina i te laukele, ka lasi foki te vaiua. Ka tuku atu ne au a fakamanuiaga katoa konei ki tino o toku malo kola koi toe mai.

¹³Tino o Iuta mo Isalaelu! I aso ko teka, ne fai ne au a tino fakaatea ke fakatau muna tuku i a latou eiloa penei, ‘Ke oko atu ki a koutou te malaia tela ne oko ki Iuta mo Isalaelu!’ Ka ko koutou ka fakasao ne au, kae ka toe fai'pati aka a tino o fenua fakaatea i a latou eiloa penei, ‘Ke oko atu ki a koutou te fakamanuiaga tela ne oko ki Iuta mo Isalaelu!’ Tela la, ke 'toa otou loto kae sa ma'taku.”

¹⁴Muna a te Aliki Tafasili i te Malosi penei, “I te taimi ne fai ei au ne otou tupuga ke kaitaua, ne fakatoka ei ne au se mala mo latou, kae ne seki fuli eiloa oku mafaufauga, ne fakaoko eiloa ne au te mea ne mafaufau au ki ei.

¹⁵Kae nei, au ko mafaufau ke fakamanuia a tino o Ielusalema mo Iuta. Tela la, sa ma'taku.

¹⁶ Konei a mea e tau o fai ne koutou: Fai'pati ki te mea tonu, sua tino ki sua tino. Fai te mea tonu i taimi o fakamasinoga me e maua i ei te filemu.

¹⁷Sa fai ne fuafuaga ma'sei ke fakapakia ei tou taina. Sa molimau pelo ka ko oti ne fai tau tautoga. Au e se fiafia ki te loi, te fai mea 'se, mo te saua.”

¹⁸Tenei te fekau ne tuku mai ne te Aliki Malosi ki a Sakalia:

¹⁹“A fakalikilikiga kola e fai sale i te fa o masina, te lima, te fitu mo te sefulu, ke fai mo aso e lifu kae fiafia ei a tino o Iuta. E tau mo koutou o fia'fia ki te mea tonu mo te filemu.”

²⁰Muna a te Aliki Tafasili i te Malosi penei, “Ko oko mai aso kola ka solo mai ei a tino mai fenua fakaatea[7] ki Ielusalema.

²¹A tino o te fa'kai e tasi ka fai atu ki tino o te sua fa'kai penei, ‘Matou ka olo o tapuaki ki te Aliki Tafasili i te Malosi kae talo ki ei mō se fakamanuiaga. O'mai ke olo tasi tatou!’

²²E tokouke a tino valevale mo malo ma'losi eiloa ka o'mai ki Ielusalema o tapuaki ki te Aliki Tafasili i te Malosi, kae ke talo mo se fakamanuiaga mai i a ia.

²³I aso kona, ka o'mai a tino o fenua fakaatea e tokosefulu ki se Iutaia e tokotasi, kae fai atu ki a ia penei, ‘Matou e ma'nako o kau mo koe, me ne lagona ne matou me i te Atua e fakatasi mo koe.”’