Read Te Tusi Tapu I Te Gana Tuvalu Lomiga Lua SAKALIA 9 Bible Online

SAKALIA 9 - Te Tusi Tapu I Te Gana Tuvalu Lomiga Lua bible

SAKALIA 9

¹ Tenei te fekau a te Aliki: Ko oti ne iku i a ia ke fakasala te fenua o Hatalaka mo Tamaseko. E se ko matakaiga fua o Isalaelu e o te Aliki, kae e pena foki te laumua o Sulia.

²A Hamata, tela e tu i luga i Hatalaka, e o te Aliki foki, e pela foki mo fa'kai o Tulo mo Saitonu mo vaega poto katoa o latou.

³Ko oti ne fakatu ne tino o Tulo ona olo, kae fakaputu foki ne latou a siliva mo aulo tela ko pela fua me ne kaiga!

⁴Kae ka ave katoa keatea ne te Aliki ana mea. Ka pei ne te Aliki ona koloa ki te tai, ka ko te fa'kai ka sunu ke liu lefu.

⁵ Ka lavea ne te fa'kai o Asekelona te mea tenei, kae ka ma'taku. Ka lavea foki ne te fa'kai o Kasa kae ka puapuaga valevale i te mae. E pena foki a Ekelona, a ona fakamoemoega ka galo atu katoa. Ka seai se tupu o Kasa, ka ko Asekelona ka lavaki.

⁶A tino o fenua valevale ka nofo i Asetota. Muna a te Aliki, “Ka fakamasiasi ne au a tino fakamata'mata katoa konei o Filisitia.

⁷Ka se toe kai latou ki ne meafasi e isi ne toto i ei, io me so se meakai tapu aka foki. A latou katoa kola e toe mai, ka fai mo oku tino, ka pela latou me se puikaiga i te matakaiga o Iuta. A tino Ekelona ka fai mo oku tino, e pela mo tino Iepusa.[8]

⁸Ka puipui faka'lei ne au toku fenua kae fakatapu foki ne au a kautau o ulu i loto i ei. Ka se toe talia ne au ne pule saua ke toe fakapuapuaga ne latou oku tino. Ko oti ne lavea ne au te puapuaga o oku tino.”

⁹ Tino o Siona, lifu kae fiafia! Tino o Ielusalema, ka'laga mo te fia'fia! Kiloke, te otou tupu ko vau ki a koutou! E vau a ia mo te manumalo, kae tela la, a ia se tino malālo Fua kae sopo mai i luga o te asini — se tamā asini.

¹⁰ Muna a te Aliki, “Ka ave keatea ne au a kaliota tau mai i Isalaelu kae ave keatea foki a solofanua mai i Ielusalema; A kausana kola e fakaaoga i taua ka fakamasei katoa. Ka fai ne te otou tupu ke maua te filemu i va o malo kesekese; Ka pule a ia mai te sua feitu lalolagi ki te sua feitu lalolagi, Mai te vaitafe o Eufilate ke oko eiloa ki kapakapalagi.”

¹¹ Muna a te Aliki, “Ka fakasaoloto ne au otou tino, Ke sao mai i lua kola e seai ne vai i ei, E tusa mo taku feagaiga mo koutou tela ne fakamautakitaki Ki toto o manu o taulaga.

¹²A koutou kola i te tafeaga, kola ko isi nei ne fakamoemoega, Na foki, foki ki te koga e sao lei ei koutou. Au e fai atu ki a koutou nei, Ka taui fakalua ne au koutou ki fakamanuiaga ona ko puapuaga ne oko atu ki a koutou.

¹³Ka fakaaoga ne au a Iuta pela me se kausana a te sotia, Ka ko Isalaelu pela me se matasana, Ka fakaaoga ne au a tino o Siona e pela me se pelu, E pela me se pelu, ke taua atu ki tino Eleni.”

¹⁴A te Aliki ka sae mai i luga o ona tino; Ka sana ana matasana e pela me ne uila. Ka fakatagi ne te Aliki Maluga a te pu; Ka sasale a ia i te afā mai saute.

¹⁵Ka puipui ne te Aliki Tafasili i te Malosi a ona tino, Kae ka ta fakapalele ne latou olotou fili. Ka ka'laga latou i taimi o te taua e pela me ne tino ko'na, Kae ka fakamaligi ne latou a toto o olotou fili; Kae ka tafe e pela me se toto o se manu ne ta mo fai te taulaga, Tela e ligi ki luga i te fata-fai-taulaga mai se pesini.

¹⁶Ka oko mai te taimi tena, Ka fakasao ne te Aliki a ona tino e pela me se tausi mamoe E fakasao ne ia a tena lafu mai mea faiga'ta. Ka maina latou i tena fenua e pela me ne fatu tauā o se kalauna.

¹⁷Ko oko eiloa i te gali kae lei o te fenua! A te kautama tuputupu ka tupu ma'losi i te lei o ona saito mo uaina.