Read Te Tusi Tapu I Te Gana Tuvalu Lomiga Lua MALAKI 2 Bible Online

MALAKI 2 - Te Tusi Tapu I Te Gana Tuvalu Lomiga Lua bible

MALAKI 2

¹Muna a te Aliki Tafasili i te Malosi ki faitaulaga, “A te fakatonuga tenei mō koutou:

²E 'tau mo koutou o ava mai ki a au i mea a koutou e fai. Kafai e se faka'logo koutou ki aku muna, ka fakamalaia ne au a koutou. Ka fakamalaia ne au a mea kola e maua ne koutou mō tausi otou olaga. A te tonuga, ko leva eiloa ne fakamalaia ne au a mea kona, me i a koutou seki saga tonu o tausi aku fakatonuga.

³Ka fakasala ne au otou tamaliki, kae nani otou mata ki fekau o manu vaefa kola e ofo mai ne koutou — kae ave koutou ki te fakatūga fekau.

⁴ Ka iloa ei ne koutou me ne avatu ne au a te fakatonuga tenei, ko te mea ko taku feagaiga mo faitaulaga, kola mai te gafa o Levi, ke tumau.

⁵ “I taku feagaiga, ne tauto au ke maua ne latou te ola mo te manuia ko te mea ke fakaaloalo mai ki a au. I aso kona, a latou ne ma'taku kae fakaaloalo ki a au.

⁶Ne akoako atu ne latou te mea tonu kae se ko te mea 'se. Ne faka'logo latou ki a au; ne fai ne latou te mea tonu, se gata i ei kae fesoasoani foki latou ki nisi tino ke fakagata olotou amioga ma'sei.

⁷Ko te tiute o faitaulaga o akoako atu ke iloa tonu ne tino a te Atua. E tau mo tino o olo ki ei o tauloto toku loto, me i a latou ko ave fekau a te Aliki Tafasili i te Malosi.

⁸“Kae nei, koutou faitaulaga ko kalo keatea mai te auala tonu. A otou akoakoga ko mafua mai i ei te fai amioga ma'sei o tino e tokouke. Ko oti ne ofa ne koutou taku feagaiga ne fai mo koutou.

⁹Tela la, ka fai ne au a tino Isalaelu ke takalialia ki a koutou me i a koutou e seki faka'logo ki aku muna, kae i te taimi foki e akoako ei ne koutou oku tino, ne seki faka'pau ne koutou a tino katoa.”

¹⁰E a, e se tasi te Tamana o tatou? E a, e seki faite tatou ne te Atua e tokotasi? Ai a la e ofa ei ne tatou 'tou feagaiga, sua tino ki sua tino, kae ai a foki e ofa ei ne tatou te feagaiga a te Atua tela ne fai mo 'tou tupuga?

¹¹A tino o Iuta ko oti ne ofa ne latou te lotou feagaiga ki te Atua kae fai se mea mataga i luga i Ielusalema e pela foki i luga i te fenua katoa. Ko oti ne soli ne latou te Faletapu tela e fiafia ki ei te Aliki. A tagata ko avaga ki fafine kola e tapuaki ki atua fakaatea.

¹²A te Aliki ke ave keatea ne ia mai te fakapotopotoga o tino Isalaelu, so se tino e fai ne ia te mea tenei, kae ke mo a e toe kau i taulaga a te motou fenua e ave ki te Aliki Tafasili i te Malosi.

¹³Tenei te sua mea e fai ne koutou. Ko faka'fonu ne koutou te fata-fai-taulaga a te Aliki ki loimata, o tagi kae ka'laga me ko se talia ne ia a taulaga a koutou e ofo ki a ia.

¹⁴Fesili aka me ai a ko se toe talia ne ia. Ko te mea ko iloa ne ia me ko oti ne ofa ne koe tau feagaiga ki te fafine tela ne avaga koe ki ei i te taimi koi tamataene ei koe. A ia ko tou soa, ka ko oti ne ofa ne koe tau feagaiga ki a ia, ka ko koe ko oti ne tauto ki te Atua me i a koe e fakamaoni eiloa ki te fafine tena.

¹⁵E a, e seki fai ne te Atua a koulua ke tasi i te foitino mo te agaga? Ai a ne fai ei ne ia te mea tena? Ko te mea ke maua ne koe ne tamaliki kola ko tino tonu o te Atua. Tela la, onoono faka'lei ke mo a se tino i a koutou e ofa tena feagaiga ki tena avaga.

¹⁶Muna a te Aliki, te Atua o Isalaelu, “Au e se fiafia ki te avaga mavae. Au e se fiafia manafai e fai ne se tino i a koutou se vaegā mea masei penei ki tena avaga. Masaua ke mo a e ofa ne koe tau tautoga ki tau avaga.”

¹⁷Ko oti ne fakafi'ta ne koutou te Aliki ki otou pati. Kae ne fesili aka koutou penei, “I te feitu fea ne fakafi'ta ei ne matou te Aliki?” E fakafi'ta ne koutou ki otou pati penei, “A te Aliki Tafasili i te Malosi e manatu pela i tino amio ma'sei katoa e 'lei; a te tonuga, e fiafia a ia ki a latou.” E fesili foki koutou penei, “Tefea te Atua tela e tau o fai te mea tonu?”